【愛情】關於我一覺瞓醒發現喺初戀屋企⋯！: 12. 謊言
「今個月第幾個？」樂恩行到吧枱前細聲咁問我一句，「好似係第三個已經。」
「呢個人成日都嚟，次次嚟都要講兩句⋯」我搖搖頭後細聲咁講道
「睇穿佢係想搭訕啦～」樂恩望向門口嘅方向，手上拎住嘅抹布一直抹緊同一個位
「由佢啦⋯下次唔理佢就係啦⋯」我無奈講道，「當冇IG。」
喺黃昏嘅時候，cafe內嘅客人一個一個咁走，由坐滿變坐滿一半，由一半變到冇客喺度
我地都由忙到死變成得閒到同一張枱都抹幾次，同一隻杯都覺得要洗兩次先乾淨
「唉⋯一時一堆人，一時一個人都冇⋯」我無奈一笑，拎起樂恩擺過嚟嘅幾個咖啡杯去洗
我企喺洗手盆前開住水喉將啲杯先洗一轉，就喺我雙手都濕漉漉嘅時候，放喺圍裙袋中嘅手機一直震
「哎⋯」我細聲咁嘆一聲氣，然後閂上水喉，右手捉住抹手布抹兩下就拎手機出嚟，係媽咪打過嚟比我：「喂？」
「知珩你今晚番唔番嚟食飯呀？你唔記得咗你話搬出去之後，每個星期都要番嚟一次咩？」媽咪嘅聲線聽起嚟就係覺得我唔記得咗所以扮緊嬲
「記得～今晚番嚟啦～」我講道，「我放工再同你講啦～」
「嗯好啦，拜拜。」媽咪問完要問嘅嘢就收線
今晚番去食飯，媽咪實問我同靖佑一齊住點樣⋯我要做好心理準備，唔好多口講錯嘢
「比媽咪知道同我一齊住嘅係阿立就死硬⋯」我喺心裏稍微幻想一下都知講錯嘢嘅後果，「佢同爸爸實嬲死都似⋯」
所以我絕對絕對唔可以講錯嘢⋯！一定要聽清楚媽咪問咩先好再答⋯！
同我一齊住嘅係靖佑⋯！同我一齊住嘅係靖佑⋯！同我一齊住嘅係靖佑⋯！
收工之後，我行出cafe，搭地鐵番屋企，真係番屋企今次
⋯
我坐喺餐枱前等食，番到嚟屋企真係好，可以食到媽咪煮嘅飯好開心～
「趁熱食啦～凍咗唔好食㗎啦～」媽咪拎住最後一碟餸出嚟放喺枱面
「食飯～」我開心咁拎起筷子，就算係白飯都好，都係媽咪煲嘅最好食
「你宜家同你個朋友一齊住點呀？靖佑呢～」媽咪果然真係問起，我即刻有啲緊張咁捏緊筷子
「都係咁啦～冇咩問題。」我笑笑口講道
「你唔好麻煩到人呀～」媽咪提醒我，「同喺呢度唔一樣，你唔好比麻煩人地，好好相處知唔知？」
「知啦⋯媽咪你當我小朋友咩～」我無奈咁講道，「我同靖佑相處得好好啦～」
「你地平時邊個煮飯？」媽咪問出一個有啲難答嘅問題
因為自從我搬咗出去之後，我同阿立基本上日日都食緊外賣，因為放工好攰又唔想煮，而且我又唔太識煮飯，公仔麵加腸仔已經係我嘅拿手菜
「你唔好話我知你地日日食外賣呀⋯」媽咪一眼就睇穿我嘅小表情，即刻就皺起眉頭，「食外賣冇益呀⋯！成日食外賣點得？」
「放工好攰嘛，而且我地都唔識煮飯⋯」我無奈咁講道
「你每個星期都要搵日番嚟食飯呀，如果靖佑想上嚟食都可以㗎！」媽咪擔心咁講道，「成日食外賣唔健康。」
「知啦，我會啦！」我聽到媽咪咁講，唔知點解心入面有啲內疚自己講咗大話
一開始我係真係打算同靖佑一齊住，抱住「唔想一直靠屋企」同「想出去同朋友一齊住」嘅想法搬出去
「如果我冇一早講實比我媽知搵好地方，今日就唔會又內疚又尷尬⋯」我喺心裏講嘅時候，臉上掛住似笑非笑嘅微笑，「最衰就係靖佑，又話可以，轉個頭就話同男朋友住，然後介紹個新嘅同屋主比我⋯」
我本來都以為係女仔，點知靖佑介紹個男仔比我，更離譜嘅係佢喺唔知情嘅情況下將我前男友介紹番比我做同屋主
「靖佑呀⋯我真係唔知要笑定喊好⋯」我望住飯碗啖一口氣
「我買咗一盒士多啤梨，你拎番去同靖佑食呀～」我媽指一指廚房
「哦好呀⋯」我循住媽媽指住嘅方向望去
⋯
「咔—」我用鎖匙開門，將門推開，「我番嚟啦⋯」
阿立望向呢邊，我將手上拎住嘅提起比佢睇一睇
「睇下～媽咪話買咗士多啤梨比我地食～」我拎住袋士多啤梨行近阿立
佢好奇咁往袋中望一眼，睇嚟佢有興趣，因為阿立最中意食水果
「熊本士多啤梨⋯」我將盒士多啤梨拎出嚟睇，包住保鮮紙嘅膠盤放喺粉紅色嘅紙盒中，每粒士多啤梨好似我手心咁大粒
「係咪好貴？」阿立抬頭望住我問
「唔知喎～媽咪買㗎～媽咪話比我地食～」我微微聳肩，「不過我都好耐冇食過士多啤梨⋯」
「多謝阿姨。」阿立順口咁講咗一句
「我放喺雪櫃，你要食就攞啦～」我望住佢一個為食樣就忍唔住想笑
我轉身朝廚房行去，細聲咁笑道：「為食鬼～」
我喺廚房行出嚟嘅時候，阿立坐悠悠閒咁坐喺梳化開住電視睇手機
但到我沖完涼拎住污糟衫行出嚟嘅時候，佢手上已經拎住士多啤梨食緊
將士多啤梨咬咗一半嘅阿立抬頭同我對望着，我又望住佢，呢一幕忽然間有啲好笑
「做咩呀？」我笑一笑問道，悠閒咁走去廚房將衫掉入我嘅洗衣籃中
「冇。」阿立微微聳肩，然後又耷低頭邊食士多啤梨邊睇手機
我拎住士多啤梨喺廚房行出嚟，我咁啱睇到電視播緊遊戲節目就坐低喺梳化睇
「哈哈！」我邊笑邊食水果，都唔記得咗阿立喺我隔離，「哈哈哈哈！」
我同阿立坐喺梳化嘅兩邊，我同佢又好似冇事發生一樣一齊喺同一個屋企入面
我地一齊住之後，好少提起以前嘅事，只係我好多時會諗起同佢有關嘅過去
但我先講明，唔係因為我對佢有咩想法，只係因為我係女仔，比較容易記住以前嘅事
「哈哈哈哈！」我望住有趣嘅遊戲環節又笑起嚟
「哈哈！」我忽然聽到阿立嘅笑聲，我偷偷地望佢一眼，原來佢喺唔知咩時候開始都睇緊
「你有冇睇開？呢個節目。」我只係順便問一句，畢竟大家一齊住，都唔可能一直好似陌生人咁，「我之前喺屋企每個星期都睇～」
「一時時啦，都唔係成日睇，有時咁啱佢播咪睇一陣。」阿立望住電視，笑容都冇消失過，「我都唔係特別中意睇電視。」
的確，阿立的確唔太睇電視，佢中意睇YouTube多啲，電視反而少睇，不過我諗好多人都係，因為選擇多咗，電視亦唔係唯一嘅選擇
「哎～差唔多要做嘢啦～」阿立再坐多陣之後望一望掛喺牆上嘅鐘講道，「士多啤梨好好食，幫我同阿姨講聲多謝。」
「嗯，知啦。」我點點頭，喺阿立起身番房做嘢之後，客廳就得番我一個
我將電視嘅聲量較細啲，雖然阿立將房門閂咗，但係電視太大聲都有機會打擾到佢，所以我都係較細聲啲比較好
IG Link: https://www.instagram.com/nd_cotttoncandy/?hl=zh-tw