【愛情】關於我一覺瞓醒發現喺初戀屋企⋯！: 13. 只有我一人

「今日OT會夜番，唔洗鎖門」

喺臨近3點嘅時候，係cafe好得閒嘅時候，我收到阿立嘅message

「Okay」我簡短咁回覆佢

既然佢今晚OT，咁我今晚番到去唔鎖門就係啦～

⋯





「唔⋯」我企喺門邊嘅燈掣前，喺閂燈前望一望時間

今日阿立又會咁晏都未番嚟嘅⋯？雖然佢今日晏晝嗰陣WhatsApp咗我同我講佢要開OT遲番，宜家嘅時間大概係12點27分

之前都有試過佢話OT，但上次佢9點就番咗嚟，今次係第一次咁晏都未番

我一閂咗廳燈，成個廳都係漆黑一片，因為我拉埋咗窗簾，我地夜晚都一定會拉窗簾

「躂躂躂躂！」我好似火箭一樣快，從門口跑到番房閂埋房門





「好得人驚⋯好靜⋯」我用被將自己包到實一實，等自己從被窩中感受到安全感

我幾怕夜晚只有自己一個喺屋企，當太陽落山之後，冇人氣嘅屋企顯得有啲孤單，但入黑之後嘅屋企因為開咗燈亦唔會太令人擔心

但當屋企閂晒燈之後，就會有種不安感將我籠罩住，除咗我間房因為開咗枱燈，有光所以感覺比較舒服之外，門外嘅漆黑一片都會令我有隱隱約約嘅不安感

「想去toilet⋯」偏偏喺呢個時候想去廁所，我唔想特登開門出去

我快步行出房衝去廁所閂埋門，一個人停留喺冇開燈嘅地方好可怕





「啱啱係唔係有聲⋯？」我洗完手之後諗起啱啱沖水嘅時候好似聽到聲，「會唔會係阿立番嚟⋯？」

我小心咁打開廁所門行出廁所，然後好順手咁將廁所門閂埋，本來光咗一下嘅走廊又暗番落嚟

我探頭望向門口，又望一望客廳，冇人⋯？會唔會係我聽錯？

「可能我太緊張聽錯啫～冇事冇事⋯」我輕拍自己嘅心口安慰下自己

我望向自己嘅房門口，我都係番房啦，外面呢度咁黑，搞到我都擔心到有幻聽⋯

「哐啦—」

但喺我要轉身番房嘅時候，忽然傳嚟一聲，嚇到我即刻企喺原地慢慢轉身

「唔⋯好黑呀⋯」我轉身行到走廊口探頭望，但啱啱嘅聲又冇咗，「12點幾唔好嚇人啦⋯」





唔知點解我一直聽到廚房有聲，但廚房冇開燈⋯阿立番咗嚟應該唔會唔開燈掛⋯？喺屋企仲要摸黑⋯？

「去望一眼應該都唔怕嘅⋯」我細聲咁對自己講，但我覺得自己都緊張到喺度震緊，「一眼唔怕嘅⋯我由廚房番房，用跑嘅話3秒應該都到⋯」

我一步一步慢慢行去廚房，企喺離廚房門邊，而且離廚房門口三、四步嘅距離，遠遠咁探頭好快咁望一眼

「冇嘢喺廚房⋯」我好快咁就判斷到，廚房入面咩都冇，「咁點解啱啱有聲嘅⋯？」

屋企唔會有啲咩污糟嘢呀可⋯？阿立都住咗一排都冇嘢，而且一開始佢冇同我講話屋企有啲咩⋯

但正常你搵人同你合租都唔會特登講，咁樣講完邊個敢住？但⋯阿立唔會咁對我嘅⋯大家畢竟都相識一場⋯

屋企會唔會有小偷入咗嚟⋯？但呢度係34樓⋯小偷點爬都爬唔到上嚟呢度掛⋯？





「阿立⋯？」我仍然企喺同一個位置，有啲怯咁對廚房嗌咗一聲，「阿立你係唔係番咗嚟⋯？」

我講係咁講完，但冇人應我嘅⋯？阿立未番嚟⋯？

「阿立⋯？」我又嗌多一聲，然後閃咗去廚房燈掣嗰邊，「我開燈㗎啦⋯！」

我嘅右手掩住右耳，左手放喺燈掣上，成個人都係準備好一開完燈就跑嘅狀態

「躂躂躂躂—」一陣急促嘅腳步聲忽然從廚房入面由遠至近傳嚟，嚇到我都唔記得咗我要做啲咩

「哇呀！！！」「知珩！」

我直接緊閉雙眼，掂住燈掣嘅左手鬆開咗，雙手掩住耳仔蹲低同時下意識大叫

「嗯⋯？」好似係阿立把聲，我慢慢睜開眼，不過因為閂咗燈，所以睇得唔太清楚，「阿立⋯！」





「噠—」阿立伸手開咗廚房燈，大門嘅位置即刻光亮起嚟，我都可以睇清楚阿立嘅表情

「你坐喺地下做咩⋯？」阿立一個困惑不解嘅表情望住我

「嚇、嚇死我⋯！」我坐喺地上，木地板嘅冰涼傳嚟，我個心仲喺度噗噗跳，「你做咩番到嚟唔開燈又唔出聲呀！？嚇死我啦⋯！」

「我以為你瞓咗，咪冇特登開燈又好大動靜⋯點知你咁細膽⋯」阿立一個無奈嘅眼神望我，「唔好坐喺地，起身啦⋯」

「我啱啱嗌你，你做咩唔應我？」我起身拍一拍雙手，然後我抹一抹雙眼，啱啱嚇到我眼淚都出埋嚟

「戴咗耳機。」阿立將耳機除落嚟遞比我睇，佢望住我然後沒好氣咁笑一笑，「你有喊嘅必要⋯？」

「咁⋯我怕黑嘛⋯」我聽到佢咁講，下意識就自然咁扁起嘴





「下次我未番嘅，你可以開住走廊嘅壁燈或者梳化隔離嘅地燈。」阿立指一指走廊又指一指放喺梳化隔離嘅地燈，「你可以開。」

「當初冇講過嘛，我又唔敢一直長開住⋯」我耷低頭細聲咁講，就好似係我做錯事一樣，「電費好貴㗎⋯」

「OkayOkay，我知你怕黑，你係驚嘅話就開住啦。」阿立好自然咁講咗句

「嗯⋯知道啦⋯」我微微點頭，然後轉身，「我番房啦⋯」

我匆匆忙忙咁番房閂埋門灘番落床，阿立番咗啦，我都冇咁擔心，果然搬咗出嚟冇爸爸媽咪喺身邊，有時都會有啲驚⋯

不過宜家阿立講咗比我開住燈就更Okay，我怕佢覺得我長開住燈又唔係用好嘥電費，所以都唔敢開住，但宜家講咗就冇問題啦

「唉⋯」我灘番喺床上面拎起手機，「好彩阿立番咗嚟⋯如果唔係我都要嚇死⋯」

我呀，真係好怕黑⋯但只要知道有熟人同我喺同一間屋入面，我嘅心都會定落嚟⋯

有啲眼瞓啦⋯聽日仲要番工⋯




IG Link: https://www.instagram.com/nd_cotttoncandy/?hl=zh-tw