【愛情】關於我一覺瞓醒發現喺初戀屋企⋯！: 19. 我們算陌生人？
「嗯。」阿立抬頭望一望我，然後又繼續做佢嘅嘢，「你冇買飯呀？」
「哦係呀，諗住番嚟煮。」我除鞋換上拖鞋行入廚房煮個麵
我煮好個麵，拎住個碗行出去坐喺餐枱前，坐喺阿立嘅斜對面
「食嘢先～」我細聲咁講嘅同時拎起筷子
我邊睇手機邊食嘢，食完第一啖嘅時候，手機嘅畫面突然間變咗來電顯示
我呆咗一下之後感覺有少少慌張，我媽直接打電話比我⋯！
我抬眼望咗阿立一眼，阿立專心做嘢應該唔會突然出聲嘅，我估唔會啦，亦希望唔會
「喂⋯？」我㩒咗接聽之後先係小心翼翼咁開口，「媽咪？做咩呀？」
「你今個星期日係唔係番嚟食飯？」媽咪問我
「係呀，我今日冇同你講咩？」我有啲困惑，明明我記得今日晏晝我send咗message同佢講
「問多你一聲confirm嘛～你係真係番嚟嘅話我就煲湯。」媽咪講道
「我番呀～一定番。」我回答，媽咪煲嘅湯係世上最好飲嘅湯，所以我一定要番去食飯，「你講得煲湯我就更加要番嚟啦～」
「你同靖佑一齊住冇咩大問題呀嘛？」媽咪忽然間提起靖佑，我個心都因為佢突然咁樣問而離咗一離
「冇呀冇呀，可以有咩大問題？」我擠出笑容講道
「你唔好要人地照顧你呀。」媽咪又提醒我
我無奈咁輕皺起眉頭抬眼望向阿立，我冇要佢照顧我，我地一齊住咋嘛，有必要講到照唔照顧咩⋯？
「下次約埋靖佑一齊食飯，你幫我問下佢幾時得閒啦～」媽咪笑道，但我唔太笑得出
「靖佑瞓咗啦⋯下次問啦⋯」我隨便講咗個大話，阿立聽到之後望咗我一眼，「嗯，拜拜⋯」
唔知點解，本來好溫馨嘅對話，就喺我媽咪提起靖佑之後變得好大壓力
我放低手機繼續食麵，帶住抱歉嘅心對媽咪講咗大話之後，都已經冇心情去睇手機
「你媽咪？」阿立突然開口問咗一句
「吓⋯？嗯⋯係呀⋯」我微微點頭
「你冇同阿姨講你最後轉咗同邊個合租？」阿立都唔洗我再講再解釋，直接就問出直中紅心嘅問題
「點講呀⋯？」我無奈咁嘆氣，夾起麵擺入口，「你知我媽咪㗎啦⋯我講咗好耐佢先比我搬出嚟住，而且嗰陣我都講好晒同靖佑住⋯再加上，我又試下搬出嚟住⋯」
阿立微微點頭，以前大家都熟，所以佢都見過我媽，有時我媽咪同佢媽咪都會約埋一齊食飯，不過宜家就冇啦
「總之就係宜家我媽唔知我唔係同靖佑一齊住啦⋯！」我一句總結成件事，「佢唔知我最後係同緊你住！」
「知啦，保密。」阿立都唔洗我再講落去就知我想講啲咩，「識做，但，阿姨遲早知你同我一齊住係遲早嘅事⋯」
「咁好難講㗎嘛，可能我之後搬走，媽咪都唔知道我同你一齊住過呢～」我喺心入面抱住呢種希望，希望媽咪最後都唔會知道我同阿立一齊合租緊
阿立冇出聲，只係抬眼默默咁望住我，佢嘅表情睇起嚟，好似有啲⋯「沉着氣忍耐」一樣嘅感覺
「不過，之後嘅事之後再算嘛。」我耷低頭講道
阿立點會係忍耐緊啲咩事一樣？應該係我諗多咗啫，一定係咁樣
「但係⋯」阿立喺靜咗一陣之後開口，「如果比比阿姨發現咗嘅話咁點算？」
「咁⋯呃⋯」我又冇諗得咁長遠，比媽咪發現咗要點解釋，「到時再算⋯？」
「你早啲同佢講，佢唔會係冇咁嬲咩？」阿立望一望我又問
「唔⋯你覺得我都係應該早啲同佢講事實⋯？」我下意識就反問阿立，我想聽佢嘅想法
「唔⋯」同我對望嘅佢默默咁將視線落番喺佢嘅電腦上，「又唔係話我覺得應唔應該嘅⋯只係你暪住阿姨，遲啲阿姨知道嗰陣，佢咪仲嬲。」
「但我怕佢鬧我嘛⋯」我扁起嘴，其實我自己都知唔應該講大話，我都想搵個啱嘅時候先同佢講，但好似冇啱嘅時候可以坦白，「突然同個男仔合租⋯我媽實鬧⋯」
「我同你又唔係陌生人⋯」阿立低聲講咗一句，「阿姨又識我⋯」
我呆咗一下，係呀⋯我同佢都唔係陌生人⋯但係唔覺好奇怪咩？明明唔係男女朋友但一齊住
「到時唔好彩比我媽咪發現咗嘅話，你記得咁樣同我媽咪解釋⋯」我有啲無奈咁講
阿立默不作聲，只係望一望我，好似要講啲咩，但又冇再講任何嘢
「呃⋯我食完去洗嘢先⋯」我突然覺得有啲唔知點咁，即刻拎起碗筷入廚房洗碗，離開嗰個位置
我一直開住水喉、拎住百潔布洗碗，但個腦就諗緊阿立啱啱講嘅嘢，啱啱嗰種氣氛係咩事⋯？
「啱呀⋯我地又唔係陌生人，有咩好介意唔介意⋯」我低聲咁自言自語
但係⋯正因為我地唔係單純嘅陌生人，所以先有問題⋯
分手嘅時候，我消沉咗一段時間，冇佢喺我身邊，我好似做咩都唔開心一樣⋯
明明本來只係一個平平無奇嘅普通同學，但原來佢佔嘅分量一直不知不覺咁變多，到最後變得難以抽離
「過咗去啦過咗去啦⋯」我細聲咁提醒自己
呢段感情已經係一段過去嘅回憶，同宜家已經冇掛勾，冇人會為一個人一直停留喺原地，我冇，阿立都冇
我喺大學有拍拖，阿立喺大學都有拍拖，所以我地一直都各自向前行緊
「陌生人⋯」我不自覺咁講咗呢三個字，「其實，我地算唔算係真正嘅陌生人⋯？」
IG Link: https://www.instagram.com/nd_cotttoncandy/?hl=zh-tw