【愛情】關於我一覺瞓醒發現喺初戀屋企⋯！: 20. 心有餘悸

詭異嘅音樂、令人毛管戙嘅腳步聲、喺空盪盪嘅走廊中變得陰森嘅滴水聲、轉角嘅黑影⋯

我左手掩住耳，右手攬住抱枕，聽住呢啲用嚟營造氣氛嘅配樂，我個心跳都跟住佢一強一弱嘅音樂而變得好快

「咚⋯咚⋯咚咚⋯咚⋯咚⋯咚咚咚咚！」「哇！」

黑影突然迎面跑嚟，用力咁踏步跑嚟鏡頭前面，嗰種真實感嚇到本來已經沉浸咗喺電影氣氛中嘅我即刻拎起抱枕擋喺眼前，左手自然咁一手捉住離我最近嘅阿立嘅手

「有咩好驚？就係一堆特效⋯」阿立輕輕一笑，佢語氣嫌棄又無奈，而且完全唔驚





「好恐怖！」我有啲欲哭無淚嘅感覺，我隻手想將個抱枕放低，但放低咗之後又忍唔住要拎番起，「嚇咗我一跳！」

我同阿立百無聊賴咁睇緊明珠台播緊恐怖片⋯我對恐怖片係典型嘅「又要驚又要睇」，本來係我睇先，阿立沖完涼出嚟見到我睇緊，佢又好奇坐低睇

我偷望咗阿立一眼，阿立就好似睇普通電視劇一樣，面無表情咁望住電視，唔知仲以為呢套電影好悶⋯但我都就嚟比套電影嚇死

「今日明明係星期五，點解要播恐怖片⋯！？」我細聲咁講嘅同時，將抱枕擺喺我曲起嘅雙腳同身嘅中間，雙手掩住雙眼嘅同時，又要留一條手指罅位睇接住落嚟嘅劇情

「你驚做咩要睇⋯」阿立望一望我，又抬頭望一望冇開燈嘅廳，「仲要閂燈睇⋯」





「冇嘢睇又想睇下⋯」我嘅解釋講咗同冇講一樣，「係你沖完涼出嚟去完廚房出嚟嘅時候閂㗎⋯！」

「咁我去開番—」「佢又準備啦⋯！」

阿立想起身，但電影又已經去到下一個驚嚇位，因為我聽到音樂又變咗做詭異嘅旋律，我感覺到梳化嘅坐墊一郁，我即刻拉住阿立

阿立咩都冇講，只係默默咁坐番低，我緊張咁拉住阿立嘅手，阿立睇起嚟仍然好輕鬆

「知珩⋯你都太用力啦掛⋯」阿立忽然間講道





我望一望佢，佢一臉無奈咁望住我笑；我耷低頭望一望，靠電視微弱嘅光先發覺原來我好用力咁捏住佢隻手

「Sorry！」我即刻鬆手，佢嘅手上面都有五個變白咗嘅手指印喺度

「你要捉都得，但唔好咁用力好唔好⋯？」阿立無奈咁笑一笑，「細膽仲要睇恐怖片。」

喺電影做完嘅時候都已經成12點幾，喺佢做完播片尾嘅時候，我簡直係鬆咗一口氣

「哈⋯」我聽到阿立偷笑，我望佢嘅時候，佢就望住我，「細膽仲睇，你睇你都坐到嚟我隔離。」

咦⋯？我做咩坐下坐下坐到去咁近阿立嘅位置？梳化三個位，我明明坐喺中間嗰一格嘅中間，做咩我宜家會坐緊喺中間同最右邊嘅嗰個接駁位度⋯？

「太驚⋯下意識就⋯」我即刻坐開啲，唔同阿立坐咁近，果然同本來就識就熟嘅人一齊住，就會成日下意識不自覺咁就做咗呢啲舉動⋯

「你瞓未呀？我番房啦。」阿立起身拎起電視遙控，將電視較番去新聞台





「我都番房瞓啦！」我即刻起身，掉低抱枕急步行番房

我喺閂房燈前先開咗床頭燈，我平時都慣咗要到瞓前一刻先閂燈

「哎～」我灘低喺床上，用被包住自己，等自己覺得安全啲

灘咗一陣之後，我就覺得有啲攰，伸隻手出嚟就閂咗床頭燈；房入面漆黑一片，我合埋眼都可以感覺到嗰種黑

「咚⋯咚⋯咚咚⋯咚⋯」

我個腦忽然間出現咗啱啱恐怖片嘅聲效，算啦算啦，我諗多咗啦，電影嚟啫～學阿立講嘅一樣，特效嚟～知珩先唔驚呢啲嘢～

「沙沙⋯」我轉咗個身側身瞓，唔知點解我凝住有啲咩喺我房咁，我不安咁又轉咗個身





我間房嘅牆角，會唔會都有個詭異黑影望住我⋯？又或者佢會唔會喺天花板之類⋯？

我睜開眼，瞓唔到，明明我好攰，但係我個腦好似好精神⋯諗埋啲完全令我又驚又唔敢瞓嘅嘢⋯

「沙沙⋯」我坐起身，明明呢度係我間房，但我嘅內心好不安，明明知道係假，但都會忍唔住咁驚⋯

我開咗床頭燈，但感覺似乎冇變好⋯我掀開被落地，著上拖鞋打開房門

「佢未瞓⋯？」我望到阿立嘅房門口有光，我行出房，阿立嘅房門好似冇閂實

平時夜晚阿立嘅房門都係閂實，但今日居然係虛掩住，房燈所帶嚟嘅光都沿住門縫滲出嚟

「叩叩—」我企喺阿立虛掩嘅房門前輕敲兩下門，我都唔知點解我會喺大腦空白一片嘅時候自動提手敲門

「係？」坐喺書枱前嘅阿立擰轉頭望過嚟，我輕力咁推開佢虛掩嘅房門，「做咩仲未瞓？聽日唔洗番工咩？」





「唔洗⋯聽日Day off⋯」我企喺佢嘅房門口，手仍然搭喺手柄上，但我仍然企喺原地

阿立望住我，我又望住佢，但感覺⋯唔知要點樣開口同阿立講我嚟搵佢嘅原因

「所以做咩？你有事要搵我？」阿立喺我開口前先一步開口問我

「冇咩呀～就係聽到mouse聲所以睇下你係唔係未瞓咋嘛～」我臨時隨口講咗個連我自己都覺得唔可能嘅藉口

「哦～未瞓呀～」阿立輕輕一笑，轉身拎起mouse繼續做嘢，然後佢又開口講：「你想過嚟搵人傾計？」

「吓⋯？呃⋯」我窒咗一下唔知點答佢

我唔想咁醜，比佢知道我咁大個人仲因為睇完恐怖片唔敢瞓





「呃⋯」我企喺佢嘅房門口捉住門柄，「唔⋯就係嘛，你知啦，咁難得見到面，咁有時都想傾下計嘛⋯」

「嗯，你想傾嘅話都可以傾一陣嘅。」我從後望住阿立抬頭，佢望一望放喺架上嘅電子鐘

我輕手輕腳咁行入佢嘅睡房，踏入佢房嘅範圍，喺佢房嘅裝飾櫃前擺咗一個巨型豆袋，我小心翼翼咁坐低喺豆袋上面

「你坐呢個呀？」阿立望過嚟，望住我笑咗一笑

「嗯，坐呢個就得。」我點一點頭




IG Link: https://www.instagram.com/nd_cotttoncandy/?hl=zh-tw