【愛情】關於我一覺瞓醒發現喺初戀屋企⋯！: 24. 頻密度過高
「唔⋯」我行到廚房門口探頭望入去，望到阿立拎住刀切緊嘢
我行入廚房想幫手，明明係一齊住，但係我好似白食咁唔係幾好⋯
「阿立，我幫你手切呀～」我邁步行入廚房企喺阿立隔離望住切緊紅蘿蔔嘅佢
「既然你想有貢獻咁好啦～」阿立猶疑咗一下之後將刀放低喺砧板上面，「切⋯厚片？」
「哦好呀～」我一手拎起刀，一手㩒住砧板上面嘅紅蘿蔔
「小心手。」阿立喺我落刀前特登提我一句
「嗯⋯」我拎起刀小心咁切紅蘿蔔，眼尾嘅餘光見到行去整其他嘢嘅時候擰轉頭望咗我一眼
我將切好嘅紅蘿蔔放喺碗入面，拎起碗轉身搵阿立嘅身影
「阿立，紅蘿蔔切好啦～」我行向阿立
「嗯⋯咩呀⋯你諗多咗啦⋯」阿立無奈一笑，佢望向我嘅時候我先見到將手機拎離耳邊，將手機嘅螢幕擰向另一邊
同緊邊個講電話⋯？唔可以比人知？會唔會係⋯女朋友⋯？
「係唔係切完？」阿立嘅視線落喺我手上嘅碗，「放喺嗰邊枱先啦。」
「哦好呀⋯」我微微點頭，轉身將碗放喺枱上面
我企喺枱前面擰轉頭望一望阿立，阿立好細聲咁講電話，但又未至於細聲到我聽唔到嘅地步
我行去阿立嘅身邊，怕電話裏面嘅人聽到我講嘢，所以我淨係拉一拉佢嘅衫角
「做咩？」阿立望向我問，佢又一次將手機螢幕擰向另一邊
「仲有冇其他嘢要幫手？」我自然咁降低聲量問佢，「我可以幫你手洗菜。」
「唔洗啦，我陣間洗埋就得，你喺出面坐下啦～」阿立對我微微一笑
「哦⋯」我點一點頭，然後洗一洗手就行出廚房
不過我忍唔住好奇佢同緊邊個講電話要咁細聲⋯如果係女朋友嘅話，佢女朋友可以比佢同其他女仔合租？佢女朋友都⋯好大方⋯不過以我認識嘅阿立，又唔係啲明明有女朋友但都同女仔合租嘅人
「關我咩事⋯」我坐低喺梳化低聲講咗一句，拎起遙控就開電視
本來就同我冇咩關係，大家有各自嘅生活就係好正常，只係我覺得佢有女朋友嘅話，唔會揀同女仔一齊合租，佢嘅性格唔係啲咁嘅人
「冇feel，就係已經冇感覺。」
我腦海入面忽然閃呢一句，點解會突然間諗起呢啲令人心情變差嘅嘢⋯而且，感覺有啲唔識形容嘅委屈感⋯
「睇緊咩？」阿立嘅聲音忽然傳嚟，我望向廚房嗰邊，見到佢行緊過嚟我呢邊
「電視。」我好快就答佢，我講完先覺得自己講緊廢話一樣，「呃⋯綜藝⋯」
阿立行到靠牆窗嘅一邊坐低，但佢唔係睇電視，只係睇緊手機；我自然就望住佢，忽然諗到佢有冇女朋友呢個問題⋯啱啱同佢講電話嘅人，會唔會係女朋友⋯？
「你女朋友知唔知你同女仔合租？」我有啲想知佢有冇女朋友，但又唔太想直接問出口
「冇拍拖。」阿立望住手機螢幕搖頭
我聽到佢咁樣講之後即刻唔知要再講咩好，好似冇咩再問落去嘅可能，我亦只可以點一點頭、繼續睇電視
「你有拍緊拖？」阿立喺呢個時候反問我
「冇呀。」我即刻回答，我都感覺到自己回答嘅速度有啲太快，即刻笑一笑解釋：「有男朋友嘅話點可能仲同男仔一齊住？」
「嗯，我都係，有女朋友嘅話點可能仲同女仔一齊住。」阿立點一點頭，望向我微微一笑
我同佢對望，眼神睇起嚟，好似有啲咩想講一樣，但係又唔知道對方想講咩⋯已經同以前唔同啦，我已經冇可能靠佢一個眼神就知道佢想講啲咩⋯
「聽講，你大學成日換女朋友。」我笑一笑搵個話題講
「嗯⋯間中啦～」佢好似有啲尷尬咁點一點頭，笑容又凝固咗一下，然後望向我，「你大學冇拍拖咩？」
唔知點解我見到佢定睛望住我嘅時候嗰個眼神，我會莫名地有啲心虛，佢嘅眼神入面夾雜住一絲認真，搞到我同佢對望嘅時候，心入面覺得唔係好自在
「有呀⋯」我若無其事咁點頭，完全唔會透露出我心入面有一絲心虛閃過，「有。」
阿立側身坐，手放喺梳化嘅櫈背上面托住額，側住頭又問我一句：「拍咗幾多個？」
「兩個，嗯，兩個。」我肯定咁點頭、豎起食指同中指明確表示係兩個
「嗯⋯」阿立嘅雙眼望向右下方，然後微微點一點頭，下一秒嘅佢忽然坦白咁同我講：「我大學嗰陣拍咗⋯四個，你講咗所以我都講比你知。」
四個！？唔係每年一個嘅意思咩？轉女朋友都轉得太密啦掛⋯！？難怪靖佑話佢成日換女朋友，又真係成日⋯一年一個⋯
「好呀～又真係成日換女朋友～」我露出禮貌而不失尷尬嘅微笑，「靖佑都係咁樣同我講。」
聽到佢咁講，心入面有少少莫名嘅不爽⋯明明以前同我一齊嘅時候話過，如果唔係我就冇人可以，睇嚟唔係呀，明明就可以，好多人都可以
不過我都明白，兩個人分咗手嘅話，以前嘅甜言蜜語就同過眼雲煙一樣隨風飄走，同隨口講嘅說話冇分別，只係佢當初同我嘅時候信誓旦旦，但最後就係邊個都可以⋯
「好失望？」阿立笑一笑問我
「吓？冇呀～」 我搖搖頭，「見你咁受歡迎我都替你開心。」
其實我唔知道我點解唔高興、點解會覺得不爽⋯可能因為佢曾經對我嚟講係咁重要，但佢可以狠心到block咗我、直接搬屋、一直換女朋友⋯明明我地識咗咁多年，但佢可以咁狠心⋯
「睇下有咩睇先～」我為咗唔好再喺呢個話題討論落去，即刻拎起電視遙控
IG Link: https://www.instagram.com/nd_cotttoncandy/?hl=zh-tw