【愛情】關於我一覺瞓醒發現喺初戀屋企⋯！: 23. 物是人非

「滋滋—」「滋滋—」「滋滋—」

卓卓一直落單，出單機一直都冇停過，畢竟今日係星期六，忙都係好正常嘅事

我好快手咁壓好咖啡粉將佢套上機，我望住咖啡差唔多okay嘅時候，我就先放定兩個瓦杯喺下面裝流出嚟嘅咖啡

喺等緊嘅時候順便整埋個奶泡，拎定奶，咁陣間咖啡一到手就可以即刻mix然後拉個花

我將一杯又一杯沖好嘅咖啡連同單一齊放喺出餐處，慢慢咁將出單機彈出嚟嘅單都清晒





「知珩姐你喺度真係好⋯」眼見冇人落單嘅卓卓嘆住氣行嚟我隔離，「拍住Abby我真係唔得⋯」

「Abby係有啲大頭蝦啫，都唔緊要嘅～」我笑一笑

「知珩姐，你確定佢係有啲～大頭蝦⋯？係你太好人咋⋯」卓卓搖搖頭，「佢今日又打爛咗隻碟啦⋯」

卓卓係我地cafe嘅part time，仲係讀緊書嘅大學生嚟，21歲，佢番嘅時間比Abby長好多，不過佢比Abby更快上手，所有嘢都

「阿逸冇鬧佢？」我都忍唔住露出震驚嘅表情，佢又打爛嘢





阿逸就好似副店長，佢同店長本來都係朋友，店長唔喺度嘅時候，cafe嘅事務就由阿逸去做

「阿逸應該就嚟爆炸⋯今日你未番嚟之前，塊面黑到好似炭咁⋯」卓卓細聲同我講嘅同時探頭望執緊枱嘅阿逸一眼

我同卓卓望住同一個方向，阿逸嘅表情的確唔太好⋯睇嚟帶住Abby令佢真係忍唔住要發火⋯

「阿逸今日對住Abby講嘢嘅語氣都係煩躁到頂點嗰種⋯」卓卓側身湊近我講道

「算啦算啦，忍下啦，過多排可能會好啲。」我擰轉身行去洗手盆前開水，「Abby幾點番嚟？」





「點知佢，佢喺唔喺度都一樣⋯」卓卓忍唔住嘆氣，語氣都帶住嫌棄，「佢喺度都唔見得我輕鬆得去邊⋯」

「阿逸話佢會再番嚟嘛，我喺度多一陣就走㗎啦，你加油呀。」我望一望時間，宜家cafe都唔已經差唔多到繁忙時段嘅尾聲

「唉⋯我真係叫晒救命呀知珩姐⋯！你唔好走呀⋯」卓卓托住額講道

「你再幫下Abby啦，佢未熟手，係會有多啲甩漏。」我拍一拍卓卓嘅膊頭

宜家冇新單又冇人叫外賣，暫時又冇嘢食出，我同卓卓就企喺水吧傾計

「嘩⋯終於唔忙啦⋯」阿逸拎住抹枱布行嚟水吧

「辛苦晒～」我對佢微笑道

「咦～你今日咁好笑容嘅？」阿逸行過嚟水吧忽然笑住問我，「發生咗咩事令你就算要番嚟頂更都可以心情咁好呀？」





「冇呀，同平時一樣咋嘛～」我笑一笑講道，我覺得自己同平時都冇咩大差別

「係咩？」阿逸挑起眉，似乎佢唔係咁覺得，「感覺你今日開心過平時，你平時都唔係真係開心嗰種笑。」

「唔⋯可能真係？」我稍微諗一諗，但又唔肯定係唔係真係同呢樣嘢有關係，「可能因為解決咗啲好重要嘅問題，所以好似輕鬆咗掛？」

「哦～難怪今日笑口常開啦～」阿逸笑一笑

「笑口常開都比你留意到呀？」我無奈咁講嘅同時拎出放喺圍裙袋嘅手機望一望時間

「我不嬲都好留意大家～」阿逸自豪咁抬起下巴，然後指一指卓卓，「睇下卓卓，你唔好睇佢咁開心，再過多陣佢就笑唔出～」

「哎呀⋯！你好地地提嚟做咩呀⋯」卓卓擰轉頭望一望時間，佢本來嘅輕鬆表情即刻塌咗落嚟，「你陣間都笑唔出，唔好淨係講我！」





「咦～睇嚟我夠鐘收工啦～」我望向cafe嘅門外，偶然見到佢地嘅「惡夢」喺外面行過

「叮鈴鈴鈴～」cafe嘅門鈴響起

阿逸同卓卓都望去門口，我望住佢兩個嘅表情偷偷觀察一下，佢兩個見到係Abby番嚟嘅時候，佢兩個下意識面色一沉，但又想控制住自己嘅表情

「知珩收工啦⋯今日麻煩你啦⋯」阿逸忍住唔嘆氣一樣對我講道，「我會同店長講叫佢下星期搵日比你早收⋯」

「Thank you～」我將圍裙除落嚟行出水吧，「咁我走啦，你地加油。」

「拜拜⋯」佢兩個嘅語氣又頹又無奈

望住佢兩個嘅表情，我都知道佢地有幾唔想搭住Abby番工，不過冇計啦，今日係我嘅休息日，我番嚟幫手都叫有義氣啦～

我頭也不回行出cafe，我嘅休息時間少咗三個鐘⋯不過宜家再番去休息都嚟得切嘅～





我戴上耳機、拎起手機嘅時候見到阿立send咗message比我：「今晚煮飯？我隨便買咗啲嘢番嚟」

「好呀～」我迅速回覆

見阿立話今晚煮飯，唔知點解有啲期待，唔知阿立打算煮咩呢～佢幾時咁勁識煮咁多嘢？

「唉⋯」我忍唔住嘆氣，一步一步行去地鐵站，「同佢一齊住，係我以前好想將來做嘅事，宜家真係做到啦⋯但又已經唔係嗰回事⋯」




IG Link: https://www.instagram.com/nd_cotttoncandy/?hl=zh-tw