【愛情】關於我一覺瞓醒發現喺初戀屋企⋯！: 27. 別哭

⋯

⋯

⋯

成11點知珩都未番嚟，佢今日冇話佢會遲番

「咔、咔咔—」我聽到鎖匙聲，自然就抬起頭望一眼大門





「我番嚟啦⋯」知珩閂上大門嘅時候細聲咁講咗一句佢平時都會講嘅嘢

佢見到我坐喺廳做緊嘢嘅時候，若有所思咁望咗我一眼

「Sorry，可能我一時之間唔記得咗同你講⋯」知珩緩緩開口微微一笑，佢呢個微笑好禮貌，令我覺得有啲唔自在

「唔緊要，下次記得講聲就得。」我望住知珩企喺門前除鞋，睇起嚟好似好攰一樣

由佢一入屋我就下意識一直望住佢，唔⋯因為佢今日好似有邊度怪怪地⋯？





眼同鼻尖都紅，睇起嚟就好似喊過一樣，但可能只係今日太大風吹親，我地住呢度喺海旁附近，沿路行番嚟都大風

「嗯⋯」知珩微微點頭，然後微微耷低頭拖住腳步行番房

睇嚟今日cafe應該好忙，所以睇起嚟先咁攰，應該都冇事嘅

我一直坐喺餐枱前面做嘢，仲有啲相要睇番影得o唔okay，影出嚟唔okay嘅話我聽日要番去再影過

唉⋯最近嘅工作量唔多，但點解咁多嘢要執咁嘅⋯我次次叫Ella做，佢就執啲唔執啲，搞到最後又要我幫佢執手尾





「唉⋯都唔知請個助手番嚟係幫我，定係我先係佢助手⋯」我邊check相邊抱怨，「唉～」

「噠、噠—」我聽到拖鞋嘅聲音，見到知珩喺廁所行出嚟行去廚房

但佢入咗廚房好一陣都冇出嚟，廚房又冇開燈，唔⋯唔知點解，我覺得佢今日有啲唔妥就係⋯

「嘎—」我將櫈推後企起身行去廚房門口

佢踎喺洗衣籃前面，但又咩都冇做，雙手搭喺膝頭上面，額頭靠喺雙手上，真係單純咁踎喺度⋯佢有冇事⋯？

「知珩⋯？」我嘅手放喺燈掣上面打算幫佢開燈，「你搵嘢嘅話開燈方便啲⋯」

「唔洗啦⋯！」知珩即刻好大反應咁企起身，「唔洗開燈，我搞掂㗎啦⋯！」

「你Okay呀嘛⋯？」我有啲猶疑，但喺我諗好要點嘅時候，我一隻腳已經踏咗入去廚房





其實我唔肯定佢做咩，只係單憑直覺⋯又或者係以我認識嘅佢嚟講⋯佢好似同平時唔一樣⋯

「嗯⋯」佢撇開臉唔望我，「Okay呀～」

「你真係Okay⋯？」我又問一次，明明佢連把聲都有少少震

佢真係覺得我會完全唔知道，真係覺得我地係第一日就識一樣⋯用嗰種我聽過無數次嘅「唔Okay」嘅語氣同我講佢Okay⋯

知珩咩都冇講，只係一直背住我，佢提起手輕輕抹咗面一下；下一秒背住我嘅佢向我伸手，我有啲困惑佢嘅意思

「做咩？」我下意識就提起手行近佢，將手放到佢嘅手心

「冇⋯」佢輕握咗我隻手一下，深呼吸一下之後好似好用力咁壓抑住自己把聲冷靜起嚟一樣





喺佢握住我度手嘅時候，我輕輕用力回握佢隻手，佢好似下意識反應一樣輕捏我一下，然後拉我一下

「今日番工唔開心？」我只係估下佢唔開心嘅原因，「受委屈啦？」

知珩冇出聲，一下轉過嚟就攬住我，佢嘅舉動太突然，搞到我都有啲手足無措

「知珩⋯？」我輕叫佢一聲，佢只係微微搖一搖頭

我唔知道佢呢個行為係唔係下意識嘅行為⋯？下意識就會對我撒個嬌、嗲一下⋯可能我仲喺佢呢個list上面，所以佢下意識都係會對我咁做⋯？

佢一粒聲都唔出，淨係好安靜咁攬住我，但我感覺到佢好努力咁壓抑住自己，連呼吸都放到好輕好輕

佢嘅頭髮有少少濕、有好香嘅洗頭水味，但我嘅頸上都有啲凍冰冰嘅感覺，但我知唔係因為佢未乾透嘅頭髮⋯

「發生咩事要喊⋯？」我喺心入面問出我嘅疑惑





我嘅雙手喺知珩嘅腰後輕扣住，喺呢個咁近嘅距離，都可以聞到久違嘅熟悉嘅味道⋯

「做咩突然間唔開心⋯？」我側側頭望佢柔聲問佢一句

以我認識嘅佢從來都唔係郁啲就喊嘅人，唔係受到天大嘅委屈佢都唔會喊，今次到底係因為咩事而委屈到喊起嚟⋯？

「冇⋯」知珩搖頭，佢一搖頭，頭髮就喺我喉嚨前撓過

佢先一步鬆手，廳燈打入嚟廚房，喺微弱嘅光下都可以睇得出佢嘅雙眼有一個淡紅嘅圈，鼻尖都有啲紅

「真係咩事都冇？」我側住頭望佢又問佢一次

「嗯⋯其實係好少嘅事⋯」佢抬眼望我，一個乖孩子受委屈嘅表情，「嗯⋯多謝你⋯」





柔柔弱弱、軟綿綿嘅聲線，有邊個唔會有剎那間嘅心動⋯？望住佢委屈落淚嘅樣，唔知點解我嘅心情好似都有少少受到影響⋯

「當初我粒聲唔出咁搬走嘅時候，佢到底係咩表情⋯？」我望住知珩嘅眼淚嘅時候，心入面第一樣諗起嘅事係我嘅不辭而別

因為一句冇解釋嘅說話而分手，到底係一件幾幼稚嘅事⋯？但嗰句由佢口中講出嚟嘅說話，真係狠狠咁刺痛到我⋯

知珩用衫袖抹眼淚，佢嘅衫袖都濕咗一細片，我伸手好輕力咁拍一拍佢嘅額頭，佢雙眼仍然泛住淚光，但就擠出微笑望我，想話我知佢冇事

「我Okay。」知珩伸出被衫袖遮咗一半嘅手拍一拍我嘅膊頭，然後側側身喺我身邊急步小跑出去

佢好似又真係冇咩事，喺佢行咗出去之後我就行出廳，坐番喺餐枱前面繼續工作

「噠、噠—」拖鞋嘅聲音喺我拎起mouse嘅同時喺走廊傳嚟

「食唔食⋯」知珩手上拎住一袋餅之類嘅嘢，「我同事阿逸整㗎⋯Macaron⋯」

我望住佢拎咗一個Macaron出嚟遞比我，我抬眼望一望佢嘅表情，佢只係掛住一個淡淡嘅微笑

「好呀。」我伸手拎走佢手上拎住嗰個白色嘅Macaron，然後拎咗張紙巾墊住擺喺枱上，「多謝，我陣間食。」

知珩連續點幾下頭，佢自己都忍唔住笑咗出嚟，佢嘅情緒回復得好快

「我瞓啦，聽日番工⋯」知珩柔聲開口同我講，「你都早啲瞓⋯」

「好，你快啲瞓啦。」我擰轉頭微笑住望一望佢，知珩轉身就行番房

我望一望放喺手邊嘅Macaron，拎起放入口咬咗一半，好好食，點算⋯




IG Link: https://www.instagram.com/nd_cotttoncandy/?hl=zh-tw