【愛情】關於我一覺瞓醒發現喺初戀屋企⋯！: 28. 是他？
「2點⋯」出去做完嘢準備番公司嘅我睇一睇時間，「嘩好眼瞓⋯」
我沿路行番公司，陣間番到去睇一睇啲相，然後睇下Ella要執嘅相執晒未⋯我希望佢係執晒而唔係淨啲要我執手尾⋯
我經過cafe嘅時候望咗一眼，要唔要買完咖啡再番公司好呢⋯？
我又睇多次時間，宜家cafe唔多人，就算要買應該都好快啫
「都好⋯」我細聲咁答咁自己，推門行入cafe
「叮鈴鈴鈴～」
每次推門行入嚟，掛喺門上面個鐘就會響，所有店員都會望晒過嚟，成個感覺又尷尬又大壓力⋯
我都未行到落單位，知珩已經先一步開口問我：「都係要Latte拎走？」
「嗯，唔該。」我點一點頭
「就知你要Latte。」望住落單機嘅知珩笑一笑，然後抬眼望咗我一眼
「厲害啦勁啦⋯」我無奈咁笑一笑，望住佢將彈出嚟嘅單撕落嚟拎住行去咖啡機前
我好順手就拉開吧枱前嘅櫈坐低等咖啡，知珩專注咁沖，我坐喺度睇手機
「知珩⋯！」「你又整咗新甜品呀？」
嗰個男仔拎住隻碟行入水吧遞比知珩，知珩望咗一眼，目光又番到咖啡機上面
「係呀～你陣間試呀～」佢將碟放低喺咖啡機隔離
「好呀。」知珩微微點頭
「今日係士多啤梨撻～」佢笑道，朝碟上嘅撻一眼望咗一眼，「你好似係中意食士多啤梨？」
「Okay啦，又冇唔中意食嘅。」知珩稍微望佢一眼，微微一笑
「我咁啱見到士多啤梨好新鮮所以整咗士多啤梨撻！」個男仔笑道，淨係睇佢燦爛嘅笑容都可以feel到佢好陽光
「你寫咗出面個board未？今日嘅限定tea time甜品。」知珩笑問道
「未呀，我轉頭去寫～」佢望一望放喺門口嘅立板
人果然都係有兩面，佢地眼中嘅知珩應該就同普通人嘅印象一樣：靚、有氣質、笑容溫柔、有少少cool、好有禮貌、對人好呢類⋯
我托住頭等緊咖啡到我手，不過可能都要再等一陣，因為佢面前好似都仲有單
「阿逸！」佢兩個講嘢講到一半，喺遠處有把聲嗌過嚟，我同嗰個男仔同時望過去，「廚房個出單機出唔到單！」
琴日知珩好似話個Macaron係阿逸整，就係佢？又會咁好人整完甜品拎番嚟分比大家
「得得得，嚟啦嚟啦⋯」我望住佢無奈咁行出水吧位行去廚房
佢行出水吧位嘅時候，知珩望一望佢，然後又笑咗一笑，跟住佢又望一望我
「琴晚個Macaron係佢整嘅？」我帶住想確定嘅心好奇咁細細聲問一句
「係呀～」知珩微微點頭，細聲咁答我，「阿逸整甜品好叻㗎～佢成日都整好多好嘢比我地食～」
知珩將咖啡沖入外賣杯，一手拎住杯身一手扶住杯底將咖啡遞比我：「Latte拎走～」
「唔該。」我伸手去接咖啡，然後離開座位、順手拍番好張櫈，「我走啦。」
「拜拜～」知珩對我笑住揮揮手
見到佢呢個樣，我就諗起以前放學番到屋企樓下嘅時候，佢永遠都係帶住呢個甜甜嘅笑容同我揮手講拜拜
「我只係希望咁樣會令我顯得冇好唔捨得你～」
比以前嘅事突然攻擊咗一下，我自然咁笑一笑，以前嘅快樂原來真係會一直喺度唔會消失
「拜拜～」我喺行到門前提手準備要推門嘅時候擰轉頭望一望佢
唉～買完咖啡休息完就要番去做嘢啦⋯Ella呀⋯拜托你做嘢唔好又係做一半唔做一半⋯
⋯
「呢張你睇下咁樣得唔得⋯？」Ella伸手拉一拉我
「可以再調番暗啲，宜家反晒光⋯」我望一眼Ella執緊嘅相，調到反晒光係發生咗咩事
「嗯⋯咁樣？」Ella好快咁調咗個大概嘅光度
「咁樣差唔多。」我點一點頭
「好⋯我再細執⋯」Ella見我okay，佢就微微點一下頭
「係唔係仲有咩問題？」我望一望Ella，因為佢仲捉住我個衫袖
「呀？冇啦冇啦⋯！」Ella即刻縮手，尷尬咁笑咗一笑
我拉一拉件外套整番好件衫，Ella又望一望我，然後喺度笑
「仲笑，快啲做嘢呀。」我無奈咁講，「你唔好又執啲唔執啲要我幫你執手尾⋯」
「執緊啦！」Ella委屈咁扁嘴
「扁嘴都冇用，做嘢。」我望佢一眼，然後搖搖頭，佢呢招對我冇咩用
「唉⋯」Ella失望咁嘆氣，下一秒就指住我枱上嘅咖啡笑道：「你又喺呢間cafe買咖啡呀？佢地啲甜品好好食，仲要係限量發售！」
「嗯。」我望住電腦點頭，心入面已經唔太想理佢：「做嘢啦好唔好⋯」
「你有冇食過呀？」Ella細聲咁追問我
「嗯，有呀。」我點一點頭，然後開咗本來係佢要執嗰幾張相出嚟：「Ella，呢幾張相你冇執到，你執番好之後再send番比我。」
「吓⋯？」Ella呆咗一呆
「你唔好執幾張又唔執幾張，就當執晒掉番比我。」我張嗰幾張相掉番上drive，「收工前執番好比我。」
「我覺得，唔洗tune都可以啦～都唔洗再執啦，你影得咁靚，都冇必要又執⋯」Ella望住嗰幾張相仲好意思搵藉口解釋
「到時老細問起，你記得咁答佢。」我只係聳肩示意同我冇關係
IG Link: https://www.instagram.com/nd_cotttoncandy/?hl=zh-tw