【愛情】關於我一覺瞓醒發現喺初戀屋企⋯！: 31. 早安
「做咩抄我講嘢？」我搶先一步開口問佢
「明明就係我開口先。」阿立即刻反駁我，佢將碟推到我面前，「你食啦。」
我拎起件蘋果，有啲猶疑應唔應該擺入口；阿立轉身打算行番出去，我伸手拉住佢件衫
「猜包剪揼，輸咗嗰個食。」我鬆手之後輕輕握半預備
「咁就啱，你猜包剪揼輸硬～」阿立完全住睇小我，覺得我實會輸，但我唔覺得我輸硬
「包、剪、揼！」「包、剪、揼！」
我同佢同時出手，我興奮咁跳起嚟：「嘩！我贏咗啦！你食！」
我將蘋果遞到佢嘴邊、微微掂到佢嘅唇，我見佢下意識微微張口，我毫不猶疑咁將蘋果塞咗三分一入佢口入面
「嘻嘻～等你睇小我呀～」我開水喉洗一洗手嘅時候不忘擰轉頭炫耀一下
阿立輕輕咁咁咗我個後尾枕一下，我扮嬲咁擰轉頭望佢，佢默默咁拎住蘋果食、無奈咁聳聳肩
我閂上水喉，阿立伸手將玻璃碟拎起放喺一邊，再開水洗一洗手就直接行出去
我跟喺阿立身後行出去，阿立行入房然後將門虛掩，呢個時間我都冇咩好做，既然大家都番房，咁我都番房啦
「哼哼哼～哼哼～」我細聲咁哼住歌坐低喺書枱前打開電腦，「睇下有咩好睇先～」
我拎起手機隨手影咗張相po喺story，然後將手機放喺手邊差電，打開YouTube睇下有啲咩新片好睇
「佢出咗新片呀⋯！」我見到我追開嘅channel出咗新片，又係我感興趣嘅嘢，即刻就㩒入去睇
每一日好似都係咁樣番下工、忙下、收個工、食個飯、睇個電腦、睇陣手機⋯咁樣又過咗一日，以前細個成日都以為大人嘅世界好有趣，但出咗嚟做嘢先知道，大人世界嘅有趣，都係自己搵比自己⋯
以前我唔會覺得坐喺度睇下片好有趣，因為以前有好多時間可以做呢啲事，睇片只係十萬個選擇入面嘅其中一個，但宜家嘅我，放工番到屋企，仲有時間可以睇下YouTube已經係最令人放鬆嘅事嚟
我拎起手機搵浩宜，send一個message比佢：「幾時得閒食飯？好似好耐冇見」
轉個頭手機又喺度震，浩宜居然咁快覆機？都啱嘅，佢應該都喺屋企Hea緊，所以都正常嘅
「嗯？唔係浩宜？」我拎起手機先發現係IG嘅message通知，都估到唔會係浩宜
阿逸睇到我嘅story所以reply咗我：「呢個channel我都有睇，一收工就即刻睇咗新片」
「我都係啱啱先見到佢出咗新片」「我有開佢通知，佢一出片就會知」
「日日都番工，都要啲時間開心下」「番工好開心呀唔係咩？」
「做社畜係所有成年人嘅目標？？？」我send出呢個回覆嘅時候，自己都有啲無奈
係唔係所有踏出嚟社會嘅人，都會淪為比金錢、物質所束縛嘅社畜一個？唔係社畜都好難講得出「番工好開心」呢啲說話
「諗好聽日整咩新甜品未？」我問佢
「諗好啦梗係～聽日番嚟試味呀」阿逸嘅回答令我都可以好輕易咁feel到佢係真係中意整甜品
「好，我ready好啦」我只係簡單咁回覆一句，就將手機放喺一邊繼續睇YouTube
好好咁休息一陣，然後又準備聽日番工，日子就係咁千篇一律
⋯
「我出門口啦⋯」
我每一日都係以呢句說話作為我新一個工作日嘅開始，然後將屋企嘅門閂上
「請勿靠近車門⋯」喺我嘅身後會令嚟車門即將閂上嘅提示聲，「嘟嘟嘟嘟嘟嘟嘟嘟—」
今日既然係大晴天，咁今日嘅運氣應該都唔差，晴天會令人心情好好
我行出地鐵站，行咗一個街口，忽然有人從後拍咗我一下：「喂！早晨！」
「早晨。」我擰轉頭望一眼，原來係阿逸，佢同平時一樣都係自帶陽光氣息
我將耳機除落嚟，本來聽緊嘅音樂就喺我將耳機除落嚟嘅一個瞬間變成嘈吵嘅車聲
「今日居然會見到你～」阿逸好似有啲意外，可能因為平時我同佢好少會喺番工嘅路上撞到
「好少會喺呢個時候見到你。」我側一側身避開前面嘅柱
「平時多數都係番到cafe先見到。」阿逸講道，「食咗早餐未？洗唔洗買個早餐再番cafe？」
「唔洗啦，我食咗嘢先出嚟。」我搖搖頭
「屋企煮埋早餐比你食咁好呀？」阿逸一臉羨慕，「我仲未食早餐呀⋯陪我去買個早餐？」
「可以呀。」我微微點一點頭，「你要去邊度買早餐？」
我跟住阿逸去附近嘅茶餐廳買早餐，阿逸入去落單，我只係企喺茶餐廳門口睇住手機等佢
「Okay啦。」過咗一陣之後阿逸拎住早餐行出嚟
「咁快嘅？」我本來仲以為要等好耐，點知轉個頭就已經有
「買個三文治啫，所以好快。」阿逸打開膠袋比我望一眼，入面裝咗一份三文治，「行得啦～」
我行喺阿逸嘅隔離，我同佢都冇咩講嘢，平時我同阿逸傾計嘅內容嚟嚟去去都係嗰啲好普通嘅嘢，就係好表面，我同佢就真係淨係同事
「你屋企平時都煮埋早餐比你食咁好嘅？」阿逸問我
「唔係呀，只係咁啱佢⋯屋企人買咗麵包。」我下意識窒咗一窒，「所以今日食埋先出門口。」
「你屋企人咁好嘅～」阿逸笑道，「我媽都唔會買定早餐比我⋯」
「有時佢自己番工前都要食嘢，都唔係淨係買比我食嘅。」我笑一笑，自然咁解釋一句
IG Link: https://www.instagram.com/nd_cotttoncandy/?hl=zh-tw