【愛情】關於我一覺瞓醒發現喺初戀屋企⋯！: 32. 善後

「你爸爸媽媽都仲要番工？」阿逸問我

「哦⋯係呀⋯」我遲疑咁微微點頭，我啱啱好似好順口咁講咗「佢要番工」，「我爸要番工⋯」

「哦～」阿逸微微點頭，行到番cafe門口嘅時候，佢踎低開鎖開門

咁樣又開始一個新嘅工作日，希望今日唔會忙到十隻手到搞唔掂，希望啦⋯我每一日都係咁樣希望，今日唔係假期應該會好啲嘅⋯

⋯





「知珩姐，呢個要點樣？」Abby拎住個瓦杯行過嚟搵我，「我要沖幾多奶？」

「佢飲呢個係咩嚟？」我拎起單望一眼，「Cappuccino 1比1， 你熱咗個奶先。」

「哦，好⋯」Abby似懂非懂咁點點頭，我都唔知佢明唔明，不過佢講得「好」應該都Okay嘅，我又喺隔離睇住都唔怕

隔咗一陣佢就拎住個杯過嚟問我：「咁樣得唔得？」

「都得。」我望咗一眼之後點點頭，「擺喺出餐位Okay啦。」





我望住Abby小心咁捧住咖啡同單行過去出餐位，樂恩行入嚟行去落單位

「今日好似一切都好順利⋯」樂恩偷偷地探頭望Abby一眼之後拉住我手肘細聲咁講道，「難得今日冇打爛嘢⋯」

「都係好事嚟嘅～」我挑起眉細聲咁講道

「歡迎光臨，要啲咩呀？」樂恩見有客人，即刻露出笑容幫客人落單

我耷低頭睇緊出緊嘅單，忽然聽到一聲：「Latte，攞走。」





我先微微抬眼諗一諗，然後抬頭望過去：「果然係阿立。」

「Abby，冇咩單嘅話幫手出單。」阿逸見忙完一輪，經過水吧就叫Abby出去幫手

阿立望到我，我同佢對望一眼，嘴角微微上揚一下當係打咗個招呼

「好，知道⋯」Abby乖乖地點頭行出去

「拎去3號枱。」阿逸指一指放喺出餐位嘅咖啡

Abby小心咁拎起放喺出餐位嘅咖啡行向3號枱，阿立落完單企喺一邊等外賣拎走

「滋滋—滋滋—」出單機又一直出單，我一聽到下意識就會望過去睇下啲單

「呀！」「哐啦—」





伴隨住Abby細聲咁震驚聲音，打爛嘢嘅聲音緊隨其後，我瞬間抬起頭向左邊側一側望一眼，Abby又打爛嘢⋯

我再望向角落頭，我就見到阿立瞪大眼一臉震驚咁望住地下

「對唔住呀！唔好意思呀！」Abby慌張咁彎腰道歉

「係唔係整到你啦？」我放低手上嘅嘢即刻行出去走向阿立，「有冇整到？」

「咩事呀？」阿逸大概係聽到樓面嘅嘈吵而即刻行出嚟睇下咩事

Abby一聽到阿逸行出嚟問，佢即刻向我呢邊行咗一步，但我諗唔洗佢講，阿逸都已經知道發生咗咩事啦⋯

我望住阿逸嘅臉色瞬間變黑，但因為仲喺樓面佢唔可以當住客人嘅面發火，所以佢好明顯係用力咁沉住氣忍耐





「唔好意思，同事新嚟唔熟手⋯」阿逸向阿立微微鞠躬道歉，「整到你真係唔好意思⋯」

「你有冇整到呀？」我有啲緊張咁伸手輕輕捉住阿立嘅前臂同時，我耷低頭望一望佢嘅雙腳

「冇，冇事冇事⋯」阿立同我對望一眼，手輕輕咁拍一拍我嘅手背，「我冇事。」

「冇燙到呀嘛？」我心入面都係有啲擔心，即刻又耷低頭睇多兩眼，「有冇濺到衫褲？」

「冇呀冇呀。」阿立耷低頭望一眼後搖搖頭

「仲唔去拎拖把出嚟拖番個地？」阿逸沉住氣同Abby講，我伸手輕輕拍一拍Abby，「知珩，麻煩你陣間沖過一杯比3號枱。」

「冇問題。」我點一點頭，我鬆開阿立嘅手，擰轉身行去3號枱，「真係唔好意思。」

「唔緊要⋯」女客人雙手擺手示意唔緊要





我行過去瓦杯打爛嘅位置，連忙執起地上嘅碎片拎去掉，行番去水吧洗一洗手之後就去再重新沖一杯Cappuccino比3號枱號客人

成個cafe嘅氣氛即刻嚴肅起嚟，睇嚟今次Abby實比阿逸鬧一餐都似⋯阿逸都忍咗好一段日子，但啱啱佢個面黑到⋯

我好快咁重新沖過一杯咖啡比3號枱，然後再做埋其他單，喺做好阿立嘅單之後我望一望佢示意可以拎，阿立拎起咖啡就走

「佢應該真係冇整到，咁大個人啦⋯」我喺心入面講道，我望向Abby嘅方向，佢好勤力又好小心咁送餐，「如果佢再出錯，真係唔知阿逸會點處理⋯」

本來我以為阿逸今次都會忍耐落去，不過睇起嚟，佢忍唔到⋯因為喺cafe一靜咗落嚟冇咩人嘅時候，阿逸即刻叫住Abby

「Abby，跟我入嚟。」阿逸翹埋雙手企喺廚房門口對Abby講

本來Abby就因為今日又打爛嘢而一直都好緊張，宜家阿逸呢一句再加埋佢就嚟要殺人一樣嘅表情，我真係替Abby擔心⋯





「唉⋯」樂恩嘆咗一口氣，「睇嚟今次佢真係大鑊啦⋯阿逸真係嬲到爆⋯」

「佢今次真係大件事⋯打爛嘢仲要喺正客人面前打爛嘢，整到人點算⋯」我都搖搖頭

啱啱佢就喺阿立面前，我真係比佢嚇咗一跳，見到阿立嗰個震驚嘅樣，我仲以為啱啱沖起嘅咖啡倒咗落佢度，不過好彩唔係

「你個朋友冇事呀嘛？」樂恩都已經認得阿立，都係嘅，佢成日都嚟

「冇，佢冇事。」我搖搖頭，然後望向廚房，Abby入咗廚房好一陣都未出番嚟，「不過，今次阿逸真係好嬲就係⋯」

「我從來都冇見過阿逸個面黑到咁⋯」樂恩聳聳肩，「你估，阿逸會唔會直接炒咗Abby⋯？」

「真係唔知⋯」我擰轉身行去洗杯，「店長唔喺度，所有嘢都係阿逸決定，就算佢真係要炒Abby，店長都會比。」

「咁好正常⋯本來店長同阿逸咁friend，店長將好多決定權都比晒阿逸⋯」樂恩仍然好奇咁望住廚房嘅方向，睇嚟佢只係想八卦一下入面講緊啲咩




IG Link: https://www.instagram.com/nd_cotttoncandy/?hl=zh-tw