【愛情】關於我一覺瞓醒發現喺初戀屋企⋯！: 33. 塵封

過咗好一陣之後，Abby喺廚房行出嚟做嘢，佢一直耷低頭，心情好明顯因為比人鬧完所以唔好；我同樂恩都望向廚房門口，阿逸行出嚟，至少佢嘅面冇啱啱咁黑

Abby出完菜又入番廚房睇下有咩幫手，阿逸行到嚟水吧前面，樂恩即刻就痴過嚟

「點呀點呀？」樂恩完全係一個食花生嘅狀態，真係唔睇下咩時候

「冇點，我只係話佢再打爛嘢，佢可以執包袱走人。」阿逸拎起枱上面嘅毛巾抹一抹吧枱吧枱面

「你有冇同店長講過？佢成日打爛嘢⋯」樂恩細聲咁問阿逸，因為怕Abby會聽到





「咁梗係有。」阿逸無奈咁講，「總之暫時係咁，未炒佢住，但佢再打爛嘢，就唔喺咁講。」

「唔嬲唔嬲～」樂恩伸手拍一拍阿逸嘅膊頭，然後行出水吧行去廚房

宜家水吧只有我一個人睇住，阿逸望住樂恩行入廚房幫手做其他嘢，我拎出手機擺喺枱面偷睇一下

「呃⋯」阿逸用喉嚨發音，我抬頭望向佢，見到佢一臉抱歉咁望住我，「你個friend⋯冇事呀嘛？」

「冇呀，佢冇事。」我笑一笑搖搖頭，「佢都話冇整到。」





「咁就好。」阿逸點一點頭，「如果整到佢，真係唔好意思⋯」

「冇呀，佢冇事，我有問佢有冇整到。」我講道，啱啱我都耷低頭望咗一眼，褲腳都冇濺到咖啡

「你地係中學同學？」阿逸忽然間問起呢個問題

「係呀～」我笑一笑點頭，然後又補充一句：「中小學同學。」

「難怪睇起嚟係真係好熟嗰種。」阿逸咁樣講，但我覺得其實都冇咩太大差別





「Okay啦～其實都差唔多，慣咗掛～」我笑住聳肩，下意識好似衝口而出，但又好似係自然咁講咗句： 「慣咗咁樣相處，一時之間好難改番⋯」

「吓⋯？」阿逸唔明我講咩，不解咁皺一下眉頭

「哦冇事冇事。」我即刻笑一笑將啱啱嘅事輕輕帶過，「冇事～」

「佢喺呢頭番工？」阿逸好奇咁追問，我覺得會問都唔出奇，畢竟阿立成日都過嚟買咖啡，都算喺cafe嘅常客，「見佢都好常喺度買咖啡。」

「係呀，佢喺前面嗰邊番工。」我向同一方向抬一抬下巴示意

「哦⋯」阿逸若有所思咁點一點頭，「我同我啲中同都冇咩聯絡，真係得好熟嗰啲先會keep住搵，唉～人大咗就係咁㗎啦～」

「我地都係最近先搵番⋯」我趁宜家得閒就拎咗包新嘅咖啡豆落嚟打算再tune一次shot，「之前⋯都好長時間冇聯絡啦⋯」

一諗到呢度，我就捏一捏包咖啡豆，感覺笑容都有少少塌落嚟





「都係咁啱搵番，所以又有聯絡啦～」我拎起鉸剪剪走包剪嘅一個角落頭，然後倒出咖啡豆

「笑得咁開心呀？」阿逸托住下巴，直勾勾咁望住我

「邊有？」我收起笑容搖搖頭，「Tune shot，唔理你。」

係喎，差啲唔記得咗同阿立講我今晚要番媽咪度食飯添～我倒完咖啡豆就即刻send咗個message比阿立

⋯

「咔—」我推開我嘅房門，媽咪話未食得飯，所以我就番房Hea下

我房入面嘅嘢其實都清走咗好多，因為嗰陣我搬走嘅時候，執走晒我最常用同最中意嘅嘢，宜家剩番喺房入面嘅都係啲我好少用到嘅嘢，衣櫃入面都得剩番幾件唔常著嘅衫喺度





「哎～」我坐低喺床邊，屋企嘅感覺真係好，屋企嘅味道永遠都係咁香、令人咁安心

我望住眼前嘅櫃，由上面下望落去，層架上面好空，同以前擺滿嘢真係唔一樣，宜家就得番一兩個公仔喺度

「咦⋯？」我望到木櫃嘅最底，見到有一個紅色嘅盒角凸咗出嚟

我起身行到去木櫃前面踎低，伸手將放喺櫃底嘅盒撥咗出嚟

「呢個鐵盒⋯」我望住呢個盒，就知道點解佢會凸咗個角出嚟

當初我執嘢走嘅時候，check緊有冇啲咩未拎齊，check到櫃底嘅時候我搵到呢個鐵盒，我打開望咗一眼之後，直接蓋番蓋隨手就推番入櫃底⋯

「啪嗒—」我盤腳坐喺地下打開鋪咗層薄薄嘅塵嘅鐵蓋

入面擺住嘅嘢，都係我好熟悉嘅嘢：一疊相、一疊卡、一隻手鐲，一切同許翊瑜呢個人有關嘅嘢，都喺晒呢個盒入面





所有同佢有關嘅事都塵封喺呢個盒入面，中學畢業之後，我就冇再開過呢個盒，唔想去觸碰我收起嘅心事⋯

「聖誕卡⋯」我拎起嗰疊卡，係識佢以嚟咁多年佢寫比我嘅聖誕卡

我拎起放喺最頂嘅聖誕卡打算拆開嚟睇，我都唔記得當時佢寫咗啲咩，太耐以前啦⋯

「我上到中學，從來都唔寫聖誕卡⋯」

打開聖誕卡，第一句唔係「聖誕快樂」亦唔係「Merry Christmas」而係呢句「從來唔寫聖誕卡」

「噗⋯！」我再一次睇番都係同當時一樣忍唔住笑咗出嚟

「所以都係一如既往淨係寫比你♡」接住落嘅係一句表達住我係獨一無二嘅一句





我面前嘅鐵盒裝住一張又一張佢喺中學寫比我嘅聖誕卡，每一張我都有好好咁keep起放好，佢地一直喺呢個鐵盒入面

分手嘅時候，我有諗過要唔要將呢個盒掉走，但係我諗咗好耐、猶疑咗好耐⋯最後我都係因為唔捨得，所以將佢地都留番喺度

「居然完全冇生鏽⋯」我拎起放喺聖誕卡隔離嘅手鐲

呢隻手鐲我以前成日都會戴，但分咗手之後唔捨得掉，所以就擺咗喺呢個盒度冇再攞出嚟

我拎起疊相，一疊好似字典一樣厚嘅相，望住相入面笑得燦爛嘅我地，好似都直接影響到我，令我都跟住露出笑容

「我放低咗⋯大概係⋯但又好似唔係⋯」我望住相中嘅佢自言自語起嚟，「到底我做咩會猶疑不決⋯」

我以為，我係因為放低所以唔會再有一樣嘅習慣，但喺見到佢嘅一刻，所有習慣成自然嘅舉動同說話方式又再出現，所以⋯唔係因為我放低咗所以冇咗習慣，只係因為佢唔喺度所以冇呢啲習慣




IG Link: https://www.instagram.com/nd_cotttoncandy/?hl=zh-tw