【愛情】關於我一覺瞓醒發現喺初戀屋企⋯！: 41. 香味
雖然我心入面都係清醒，知道我同佢已經係前任嘅關係，但⋯再諗多兩諗，心入面好似又唔太開心⋯如果啱啱嘅反應唔係佢下意識嘅佔有慾，咁就係嫌棄緊⋯我都唔知我仲有幾了解佢呢個人⋯
「算啦，唔諗啦，沖涼先。」我搖搖頭，將手機放低喺床上面，拎住衫褲就去沖涼，「沖完涼洗咗件衫算啦⋯」
唉～奇奇怪怪，我唔敢去猜測阿立嘅心思，因為只要一開始猜測，就會愈諗愈多，可能會有啲不切實際嘅想法⋯
我行出廁所嘅時候，阿立已經唔喺廳番咗房，冇人用嘅廳開住燈，平時最後都係阿立出嚟閂燈鎖門
我喺經過阿立虛掩嘅房門嘅時候，從門縫偷望一眼，阿立都只係坐喺書枱前面睇電腦，都冇咩特別
不過阿立好似好多時都喺廳做嘢，我番嚟嘅時候，阿立都係喺廳，但我沖完涼出嚟嘅時候，阿立就已經番咗房
「睇陣電視啦～唔知呢個時間有咩睇呢⋯」我拎起電視遙控，「呵～欠⋯」
今日番完工，又同咗佢地出去食飯，忙完一輪又笑完一輪⋯好攰⋯
⋯
⋯
⋯
凌晨兩點半
「呵～欠⋯」我挺直腰伸咗個懶腰，一直坐喺書枱前面搞到頸又痛腰又痛
都兩點幾啦⋯聽日又要番工，我向後靠喺櫈背上面，只要微微抬頭就可以見到中學嘅畢業班相
所有人都著住畢業袍，當下好開心，六年嘅中學生涯結束，大學嘅生活就近在眼前，但應該冇人諗過畢咗業出嚟之後，居然個個都變咗個社畜一樣，日復日咁生活，開始咗遠不見盡頭嘅工作生活⋯
「唉⋯」我默默咁嘆一口氣
望住放喺枱上同我出雙入對嘅相機，其實興趣做職業，有時都唔係咁令人激動同振奮嘅事嚟⋯影嘅嘢都唔係自己中意嘅嘢，只係啲工作需要嘅嘢⋯
「哎⋯！」我踢起腳借力起身，行到房門前拉開房門
平時夜晚都係我負責閂燈鎖大門，除咗因為我房近廳多啲之外，都係因為知珩怕黑，所以佢一定唔會去閂完廳燈先番房
以前我一個人住嘅時候，我一個人喺屋企嘅話大概係我去到嗰度，嗰度嘅燈先會著，其他時間我都好少開晒全屋嘅燈，用廳先開廳燈，用廚房先開廚房燈，一直都係呢個模式，但係宜家就唔係啦⋯
我以為知珩已經冇咁怕黑，但上次見佢嗰個嚇親嘅反應，我就覺得都係由佢開住啲燈好啲，至少佢會有多啲安全感
「嗯？」我行到走廊嘅門框，聽到電視傳嚟好細聲嘅節目內容，但知珩都唔係睇緊，佢好舒服咁坐喺梳化上面攬住方型嘅抱枕、靠住軟綿嘅櫈背瞓著咗
我即刻輕手輕腳咁邁步走向佢，我怕行得太大聲嘅話會嘈醒佢，佢今日番嚟嘅時候，臉上面都係可見嘅疲倦，我都唔忍心嘈醒佢
「要唔要叫醒佢等佢番房瞓⋯？」我行到知珩嘅面前，離佢兩步遠，心入面有啲猶疑，「喺度瞓嘅話應該瞓得唔舒服⋯但係叫醒佢嘅話，佢番到房可能又瞓唔番⋯」
知珩一醒咗就好難瞓番著，灘落床又要左轉右轉好耐先瞓得番，以前佢咁樣同我講過⋯我伸手開咗放喺梳化隔離嘅地燈，然後走向大門
「咔—」我行到大門前準備將大門鎖上，我慢慢扭動門鎖，希望鎖門聲唔會太大聲影響到知珩
我擰轉頭望一眼喺梳化上面嘅知珩，確認一下佢有冇醒；見到佢冇醒之後就閂咗廳燈
廳燈一閂，客廳就只係得番地燈發出令人覺得和暖嘅橙黃色燈光；今日唔係真係好凍，我行入房拎咗張薄被出嚟，將佢輕蓋喺知珩嘅身上
「唉⋯」我望住瞓得好冧嘅知珩默默咁喺心入面嘆一口氣，心入面硬係覺得唔自在，有啲鬱悶
我行入廚房打算酙杯水飲完就番房瞓，我開咗喺櫥櫃底嘅光管，餘光瞄到搭咗喺知珩嘅洗衣籃邊嘅衫，係佢今日番嚟嘅時候著嗰件衫
「嘖⋯」呢種鬱悶嘅感覺令人好煩躁，嗰陣味好明顯係香水，而且係男士香水
之前呢隻小眾香水品牌有搵我地公司合作過，佢地嘅廣告宣傳相就係出自我手，香水嘅味道好淡但好易認，一聞就可以知道係佢地公司嘅產品，所以我知道認得呢隻香味
「應該係cafe同事⋯」我喺心入面猜測，但一猜測就更鬱悶，「估嚟做咩？同我都冇關係啦⋯」
明明都已經冇關係，但我都係會不由自主咁介意
知珩行到我隔離，喺好近嘅距離聞到嗰隻香水味嘅瞬間，本來全日嘅好心情就好似泡泡咁「卟」一聲爆開，隨之而嚟嘅係陣陣鬱悶
「做咩呀？」知珩當時問咗我一聲，我當下即刻就回神
「我到底有咩好介意⋯？佢已經唔係我女朋友⋯」我喺回神嘅瞬間就心入面提醒自己冇必要介意
其實我自己都知，知珩就算有男朋友都係好正常嘅事，本來佢呢個外表呢種性格，本來就係多人追嗰種
上次知珩講咗佢係冇男朋友嘅時候，我有啲意外，同時心入面有啲慶幸佢係冇男朋友
當下腦海中浮現嘅第一個想法係：「冇男朋友⋯即係就算重新開始都有機會⋯？」
但我好快就撥走咗呢種想法，一齊住仲抱有呢種想法嘅話，好似唔太應該⋯
「算啦⋯」我將水杯洗乾淨放番喺杯架上面，閂上光管行出廳，「咁樣應該醒咗都唔怕啦掛⋯？」
我望住開住嘅地燈，拎起一旁嘅遙控閂電視，擰轉頭望向知珩，佢好似都習慣咗開住燈瞓，表情都好柔和，但冇嘈醒佢就好
「晚安⋯」我細聲咁講咗一句就行番入房
⋯
第二朝早一坐起身，我就見到琴晚嗰張薄被搭咗喺我張櫈嘅櫈背上面
「早晨～」我一行出房門，知珩就笑住同我講早晨，語調都高低起伏咁，睇嚟心情好好
「心情好好？」我行去廁所，拎起梳梳頭，瞓得太冧搞到個頭好似鳥巢咁
「我？Okay啦～」知珩企喺廁所門口探頭望我對我笑道，「同平時一樣～」
「叮！」忽然間喺出面傳嚟一聲，知珩聽到之後即刻急急腳衝去廚房
過咗兩秒之後有陣好香嘅味飄過嚟，我口入面仲含住啖水，嘴邊都仲有牙膏泡，淨係聽到知珩嘅腳步聲離廁所門口愈嚟愈遠
IG Link: https://www.instagram.com/nd_cotttoncandy/?hl=zh-tw