【愛情】關於我一覺瞓醒發現喺初戀屋企⋯！: 42. 困難

「沙沙！」知珩行到番嚟廁所門口嘅時候，手上拎住塊焗到金黃色嘅多士

「你快啲刷完牙出嚟食～」知珩露出可愛嘅笑容，然後就邊咬多士邊行出廳

佢都知麵包碎會掉落地，識得搵個碟盛住喺下面食，不過佢今日做咩咁好心情仲要早起身整早餐？

以我認識嘅嗰個李知珩，瞓覺都要瞓到最後一刻先捨得起身，但今日居然早起？

「你琴晚一直冇番房瞓？」我拉開櫈坐低喺佢對面





「唔係呀，臨天光嗰陣醒咗番去瞓。」知珩將烘好嘅多士擺喺我面前，「你冇見到我搭喺你櫈上面嗰張被咩？」

「見到呀，我都唔知你入過我房⋯」我笑一笑，可能係我瞓太冧，都冇察覺到知珩入過嚟

「琴晚你冇閂實個門，我輕輕力推開就入咗嚟擺低。」知珩指一指我閂咗嘅房門，托住頭講道，「你仲咁醒目特登留盞地燈比我呀？」

「知道有人怕黑，怕有人半夜醒咗會好似上次咁囉⋯」我有啲無奈咁嘆氣，佢明明都知道原因但偏偏要問，「我又唔怕黑嘅～」

放喺手邊嘅手機喺度震，我望一眼手機畫面，見到係Ella call我





「一大清早就打比我，唔係又有咩問題搞唔掂呀嘛⋯？」我第一下就諗起工作上嘅嘢，平時太多瑣碎野佢都搞唔掂咁

「喂？」我拎起電話，知珩見我聽電話，即刻就靜咗落嚟唔講嘢，自己睇手機

「我同Mavis佢地幾個食早餐，佢地問洗唔洗買埋早餐比你～」電話裏傳嚟Ella嘅聲音，一大清早就咁活躍

「唔洗。」我回答嘅時候望一望坐喺我對面拎起盒奶飲嘅知珩，「食緊早餐。」

「哦，咁好啦～」Ella講道，「唔預你啦～」





我收咗線之後，見到知珩一個好奇樣望住我：「邊個一早打嚟搵你呀？」

「同事⋯問我食唔食早餐⋯」我如實回答，因為冇咩好隱瞞

「同事？我明明聽到係女仔⋯」佢移開視線低聲講咗一句，佢可能覺得我聽唔到，然後佢又望住我笑道：「睇嚟我地阿立嘅桃花唔錯喎～」

「唉⋯爛桃花就真⋯」我無奈咁咬一啖新鮮出爐嘅多士

「聽聲都知佢係可愛嘅小妹妹？」知珩都唔知係想笑我定挖苦我：「一朝早就有咁可愛嘅小妹妹嚟問你食唔食早餐，係唔係好開心？」

「Sorry冇，令你失望啦。」我搖搖頭，我拎住手上嘅多士遞一遞手示意：「我已經食緊早餐。」

Ella講嘅嘢語氣的確係幾可愛嗰種，講嘢嘅方式都係妹妹類嘅嗲，唔係刻意造作嗰一種

雖然我係咁樣講，但我對佢就係普通上司下屬嗰種，佢亦唔係我中意嗰種類型，我對佢冇咩太大嘅想法就係





「咁～我又冇失望～」知珩認真咁望住我微笑道，我忽然間覺得佢嘅微笑好似有另一層意思

「我都唔中意呢啲咁可愛嘅小妹妹類型⋯」我望住知珩嘅微笑聳一下肩

「我知呀～」知珩喺我一講完好快咁接話，而且仲係好自信嗰種

「咁了解我呀？」我側住頭望知珩

知珩思考咗一下之後，好似終於知自己啱啱好快咁答咗啲咩，佢側住頭望我，但視線冇一直停留，而係喺兩秒後思考完之後移到右邊

「唔⋯都幾啦⋯」知珩有啲冇信心咁樣答，視線向下望住手上拎住嘅多士，「我地小學就識，又熟咗咁耐，了解你都好正常呀⋯」

喺佢呢句冇信心講出嚟嘅事實之後，我同知珩都好有默契咁靜咗落嚟，有啲嘢，我地都唔會提，但唔代表唔存在，我以為我解釋咗我唔係討厭佢、厭倦佢之後，呢件事就唔會一直係一個心結一樣存在





「重新開始⋯好難。」睇相嗰晚，知珩咁樣講咗一句

佢當時嘅表情，我都有睇喺眼入面⋯佢嘅雙眸好似失去一點亮光一樣，睇起嚟就好似我地真係冇辦法重新開始，我都唔肯定

重新開始，到底有幾多嘢要重新開始？由邊度開始重新開始？要放低以前嘅一切去重新開始？定係拎住舊嘅事去重新開始？

「都係，我地識咗咁耐，了解係好正常嘅事。」我認真咁回應佢啱啱講嘅嘢，「正常嘅⋯」

我同知珩安靜咁對望，好似知對方諗緊咩，但又好似唔知對方諗緊咩；同ex同一屋簷下，聽起嚟就好搞笑又好荒謬，但我反而覺得，同佢一齊住都唔係一件壞事

「呃⋯唔⋯你仲食唔食多塊呀？仲有時間，我可以烘多份⋯」知珩好快咁將手上嘅多士食埋，拎起碟就企起身

知珩伸手想拎麵包，但最後只係捉咗個袋一下，然後又望向左邊想拎張紙巾抹一抹枱，之後又拎番起放喺右邊嘅麵包好匆忙咁行入廚房，可能係因為覺得尷尬，所以突然間就手忙腳亂起嚟

「呃，你話要唔要？」知珩轉個頭又攬住袋麵包好匆忙咁行出嚟，企喺廚房門口望住我





知珩好似想極力迴避啱啱嘅事一樣，明明都唔係講緊啲咩非事實嘅事，點解要逃避？

「知珩。」「係？」

我喺知珩想要轉身行番入廚房嘅時候即刻先一步開口叫住佢，佢轉身嘅動作都窒咗一下，擰轉頭望我

「你有冇諗過，要重新開始⋯？」我講完之後，又補充一句：「同我。」

知珩大概係估唔到我會咁問所以瞪大眼，下意識咁深呼吸，大概係呢個問題嚟得太突然，所以有啲措手不及

「我只係突然咁樣諗所以問下～冇咩意思。」我即刻解釋

我抬頭望一望時間，都差唔多要出門口，時間就係嚟得咁啱時候咁精準





「我出門口先啦，今日要番去傾嘢。」我行番去枱前孭起我番工嘅背囊

「嗯，好呀。」知珩好似啱啱回神一樣，但都即刻微微點頭膽時露出微笑，「今晚見。」

「嗯，今晚見。」我點一下頭就開門出去

「呯！」

厚重嘅大門閂埋嘅聲音令我都有啲清醒過嚟，大腦即刻可以思考，佢當初都話過我對佢嚟講完全唔重要，佢又點可能會諗住重新開始⋯？

「唉⋯問咗奇怪嘅嘢⋯一大清早個腦都怪怪地⋯」我喺心入面對自己抱怨，「只係因為見番佢，嗰陣又有啲不歡而散，所以先有呢種奇怪嘅感覺啫⋯」

我同知珩，由朋友變成男女朋友，再由男女朋友變成陌生人⋯又由陌生人變做合租者⋯同曾經做每一樣嘅都可以觸動心弦嘅人一齊住，係一種咩感覺⋯？係一種我都冇辦法解釋嘅感覺




IG Link: https://www.instagram.com/nd_cotttoncandy/?hl=zh-tw