【愛情】關於我一覺瞓醒發現喺初戀屋企⋯！: 43. 家人
「滴滴—咔嚓！咔嚓！」「滴滴—咔嚓！咔嚓！」
我將相機從眼前放低望一眼，擰轉頭望一望Ella，佢仲坐喺度睇手機⋯！算啦，我直接自己行後兩步望電腦嘅螢幕，睇下影出嚟嘅效果點樣
「Okay呀！我覺得幾好睇！」Ella見我自己行過嚟睇即刻心虛咁收起手機回應我
「叫你睇住，唔係叫你喺度睇手機睇IG睇Facebook。」我無奈咁望咗佢一眼，然後就拎住相機行番去啱啱影相嗰個位
「影多幾張睇下效果，頭要側多少少⋯係⋯」我對今日嘅客戶楊小姐講道
「滴滴—咔嚓！咔嚓！」「滴滴—咔嚓！咔嚓！」
我又行番去電腦前面再望一望，著住白色連身裙嘅楊小姐披住經理人遞比佢嘅外套，兩個人一齊行到我隔離睇一次啲相
「呢張影得唔錯。」佢嘅經理人先開口，指住我啱啱㩒到嘅呢張相
「都要攝影師影得好先有用嘅～」楊小姐笑道，我都可以感覺到佢落喺我身上嘅視線
楊小姐唔係啲咩一線嘅大明星，不過佢做過嘅角色都好受歡迎，係啲大家都講得出角色名但叫唔出本名嗰類，今次咁啱佢同我地有廣告上嘅合作，算係一個令更多人識佢嘅機會嚟
可能因為佢都係大家認得嘅人，都叫有一定知名度，所以佢嘅好態度係我意料之外嘅事嚟，大家都知道，有好多有名啲嘅姐仔，就算係三、四線都好串，下下窒到盡當你工人⋯
「咦？呢個你影咗落嚟呀？」佢見到我㩒出嚟嘅下一張相嗰陣有啲愕然，佢當時咁啱同經理人講咗兩句，好自然咁笑起嚟，我就㩒咗制影低咗
「你唔中意呢張嘅話可以唔用，宜家只係揀一揀相，睇下你地會比較想要邊幾張。」我解釋比佢聽，都係免得佢擔心嘅一種方法嚟，有時可能淨係想比大家睇到最好睇嘅一面
「睇完之後可以再望望用邊張做封面，可以再揀。」我禮貌咁微笑再解釋，「我地之後都會再揀啲啱做封面嘅相出嚟比你地睇下過目下。」
「珊姐，你覺得呢？」楊小姐望向身旁嘅經理人，我都望向珊姐等佢示意，畢竟我都明白經理人都係會在意緊張嘅
「我覺得呢張自然嘅笑容好好睇，可以比人睇到你自然真性情嘅一面，我覺得如果呢張揀做封面都係可以。」珊姐認真咁睇咗一陣，然後點點頭，仲特登湊近個mon望清楚
「咁啱笑一下都比你捕捉到，仲影得我咁好睇～」楊小姐睇起嚟都好滿意，佢嘅笑容都特別燦爛
「都要楊小姐本身生得靚先可以咁容易影到咁靚嘅效果。」我微笑住回應楊小姐嘅客氣說話，畢竟只要影到佢地靚一靚，佢地就唔會抱怨你太多
「今日都差唔多啦係唔係？」珊姐禮貌咁問咗一句
「嗯，之後啲相同埋稿會再比你地過目。」我微微點頭，拎起相機同電腦，「到時佢地會再聯絡你地。」
「我同珊姐都book咗餐廳食lunch，要唔要一齊食個飯？當係多謝你今日幫我影咗輯咁靚嘅相。」楊小姐微微一笑，雙手放喺前面輕輕搭住
「唔洗啦，都仲有啲手尾要做埋，而且都唔太方便嘅。」我婉拒咗佢呢個提議，當然有手尾要跟埋都係事實嚟
「只係好平常咁食餐飯啫，唔係啲咩事嚟。」楊小姐微笑道，「不過你介意嘅話唔緊要啦，今次真係麻煩你啦～」
「唔麻煩，影輯靚相比佢地用同比你地，都係我嘅職責之一。」我點一點頭
「呢邊呀～」Ella行上前幫佢地開門，珊姐帶住楊小姐同我地阿Head邊講邊行出我地部門
「呼⋯搞掂⋯」我望住佢地行出去嘅時候即刻鬆一口氣，影咗成朝相影到個人都攰晒
「人地講到請你食飯你做咩唔去呀？」Ella小跑跟上我，喺我隔離細聲咁問道
「我做咩要去，同佢地唔熟。」我理所當然咁回答
「唔通你怕你女朋友會嬲會呷醋？」Ella突然間問咗我一句，我唔知佢到底係點樣得出呢個結論
「嗯嗯嗯，怕呀梗係怕⋯」我有啲敷衍咁答佢
「你真係有女朋友㗎？幾時嘅事呀⋯？」Ella震驚咁望住我，我望住佢嘅表情，佢瞪大眼咁望住我
佢呢個大反應，唔講仲以為佢係中意我所以先咁大反應，不過我諗就唔係，佢只係單純係八卦⋯
「你真係有女朋友㗎⋯？」佢又問多我一次，我都未答佢已經一臉擔憂：「點算呀？我今日仲打比你問你食唔食早餐，佢會唔會誤會㗎⋯！？」
宜家啲小妹妹真係人地講兩句佢就信到十足十⋯
「冇呀⋯我講咋，邊有女朋友⋯」我無奈一笑，親自拆解呢個大話，「隨口講㗎咋⋯」
「哦、哦～」Ella先恍然大悟咁點頭笑一笑，伸手拍咗我一下，「嚇死人咩～陣間比你女朋友怪我點算？」
「冇點算，講清楚係同事囉。」我淡然咁解釋
我真係好怕人地嗲聲嗲氣咁講嘢，係真係會起雞皮⋯但Ella我冇得避，佢喺我助手，個位又喺我隔離，想避都冇得避
「你今日做咩突然有早餐食咁好嘅？」Ella一個好奇樣問我，雙眼都bling bling咁，「平時你都係買早餐番嚟食㗎⋯」
「今日屋企有人整埋比我食⋯」我腦海入面，知珩嘅身影好快咁閃過，「喺屋企食埋早餐先出嚟都幾好。」
起身就可以見到對方、一齊食早餐、一齊番工、夜晚收工之後又番到同一個屋企，過兩個人互相扶持嘅生活⋯
諗起今朝早知珩臉上溫柔嘅笑容，有一刻覺得⋯如果一切都係真嘅就好，如果我地唔係AA制嘅合租關係，而係戀愛關係下嘅同居就好啦⋯
「你笑咩呀？」Ella嘅手伸到我面前，喺我面前晃兩下
「吓⋯？我冇笑呀⋯」我回神之後搖搖頭，我又諗埋啲唔可能嘅事
「你明明就有⋯」Ella扁起嘴，露出一個唔信任我嘅表情，「明明就笑咗一笑⋯」
我有笑咩⋯？可能只係咁啱下意識嘅舉動嚟，我淨係知道自從同咗知珩一齊住之後，我嘅個人感覺同思想就開始怪怪地
「你有冇諗過，要重新開始⋯？同我。」
我今朝又失常咗一次，突然問埋啲莫名其妙嘅問題⋯明明知道唔可能，但偏偏喺宜家呢個狀況下，我又會忍唔住問自己係唔係真係冇可能⋯？
「阿立？唔重要呀～再唔係嘅咪識過個囉～」
我當時親耳聽到知珩咁樣講，呢句說話好似一把利刀一樣直接刺中我，刺痛嘅感覺由心臟迅速蔓延到全身
由嗰日開始，我同佢嘅關係就慢慢走向結束⋯宜家諗番起會覺得好可惜，但係我諗冇人可以接受到自己最中意嘅人講出呢句說話
「唉，算啦⋯」我低聲講一句同時坐低喺位，我都係認真工作好啦
IG Link: https://www.instagram.com/nd_cotttoncandy/?hl=zh-tw