【愛情】關於我一覺瞓醒發現喺初戀屋企⋯！: 49. 一直都在

「我番嚟啦～」我推門入屋，阿立同平時一樣，又係喺廳睇緊電腦，「我買咗雪糕～呢個你仲係中意食呀可？」

我喺膠袋中拎咗條朱古力脆皮雪條出嚟問佢，我記得佢以前係中意食呢隻，但宜家口味有冇變我就唔肯定啦

「係呀，我晏啲食，雪一陣先。」阿立望住我手上拎住嘅雪條笑一笑，「今晚咁晏番嘅？」

「嗯⋯靖佑臨時約我食飯嘛⋯」我行入廚房將啲雪條擺入冰箱

我行出廚房，視線就落喺阿立身上：「我冇同靖佑講我同你本來係識，如果你見到佢，佢講啲⋯奇怪嘢嘅話，當冇聽到就得⋯」





「哦好呀。」阿立抬頭望一望我，微微點一下頭

我喺阿立身旁經過，從佢背後經過番房

「知珩。」阿立忽然轉身叫住我

「嗯，做咩呀？」佢一叫我，我即刻停低喺原地

「星期六嘅班聚你想一齊去定分開去？」阿立提起班聚，我本來都諗緊要唔要開口問阿立一唔一齊去呢個問題





「一齊都得⋯啦⋯？」我遲疑咁開口，本來係要肯定咁講，但我講到最後就有啲猶疑，「你想呢？」

「我就係問緊你一唔一齊去。」阿立失笑，「如果你想分開去都唔緊要。」

「咁一齊去啦～」我比咗個okay手勢，「唔好同人講我地一齊住⋯」

「邊個會特登問起？」阿立有啲無奈，「邊有人會特登問起我同你係咪一齊住？」

我挑起眉、側住頭望住阿立，阿立即刻點頭比個okay手勢：「好，知啦。」





阿立蓋上MacBook拎住電腦起身打算番房，佢經我隔離行番入房

「如果有人問起，咁你點答？」我有啲好奇咁問阿立

「就話⋯係約埋一齊或者咁啱撞到之類？」阿立聽到我問佢嘢，佢就慢慢咁停低腳步回頭望我，「總唔可能話比佢地知我地一齊住掛？」

阿立嘅笑容，令我諗起以前嘅佢，高大嘅身影、乾淨嘅白裇衫、陽光感滿滿嘅一個男仔⋯

佢永遠都會喺我附近，我開心笑嘅時候，佢陪我一齊笑；我唔開心嘅時候，佢就安靜咁坐喺我隔離陪我；我擔心嘅時候，佢會拍一拍我嘅背，然後好肯定咁同我講唔洗擔心，佢喺度；我行夜路驚嗰陣，佢會緊緊咁拖實我隻手，話我知佢一定會保護我

無論係小學定中學，無論係朋友定男朋友嘅身份都好，佢都會喺我身邊同我一齊

「知珩？」阿立柔聲叫我一聲，我回神望佢，見到佢定睛望住我，「諗咩諗到入晒神？」

「諗緊⋯諗起以前嘅你，你好似又高大咗⋯」我有種雙手無處安放嘅感覺，只可以放喺身後輕扣住





「冇，同中學嗰陣都一樣高。」阿立搖搖頭，「點可能仲高咗？發育時期都過晒啦⋯」

「可能係我地太耐冇見，所以先有呢種錯覺⋯」我微微一笑同時，偷偷地打量咗阿立一次，「不過，你都冇咩點變。」

我定睛望住阿立，但我冇辦法一直望住佢，下意識就會將視線移開

「好期待星期六～」我心入面忽然間有呢個想法

⋯

星期六

已經6點3，我已經喺度換好衫化緊妝，不過阿立睇起嚟完全唔慌張，佢仲著住屋企衫喺廳睇電視





「你唔洗換衫呀？」我望向行緊番房嘅阿立，佢仲好悠悠閒咁樣，睇起嚟好似得我一個去班聚一樣

「換啦～」阿立企喺房門前，手捉住門柄回頭望我，「你唔怕凍呀？」

我今日著咗件白色嘅高領針織衫，外面太一件藍黑色嘅連身背心裙，裙長到我大腿一半左右，至於外套⋯著件大褸就得啦～

「Okay呀～我會再著件外套～」我邊答佢邊拎起耳環戴上

「Okay，因為我見今晚會降溫。」阿立行咗入房

我企喺鏡前戴埋頸鏈，雙手拎住頸鏈嘅兩端放喺頸後面扣緊個扣，我用指甲將圓形嘅開口扣打開，但另一邊嘅圈套嚟套去都套唔中

我將頸鏈轉一個圈，將兩端放喺前面對住鏡扣，但今次更過份，拉開咗個開口之後，佢「噠」一聲反彈番去，再開一次又再彈一次

「嘖⋯」一直都扣唔到頸鏈上嘅扣令我有啲煩躁





阿立換好衫喺房行出嚟，佢一行出嚟就見到我因為戴頸鏈而煩躁

「做咩咁嬲呀？」阿立淺淺一笑，嘴角上揚嘅幅度都好細

「扣極⋯都扣唔到⋯哎！差少少咋！」我特登湊近到鏡前面想望得清楚啲，但原來扣呢種圓形嘅扣係講運氣而唔係睇得清唔清楚

「你發個扣嘅脾氣都冇用。」阿立笑咗一下，行到我隔離拎起放喺膠籃入面嘅梳

「扣咗好耐都扣唔到嘛⋯！」我將條鏈從我頸上面拎番落嚟，睇下係我隻手問題定個扣嘅問題，「個扣又冇問題但偏偏扣唔到⋯嘖⋯煩死啦⋯！」

「要唔要幫你？」阿立靠後，稍微瞄咗我嘅後頸一眼

「都好⋯」我將頸鏈嘅兩端拎住等阿立接手





「你拎起頭髮先，擋住晒睇唔到。」阿立嘅指尖掂到我嘅手指，觸感移到去我嘅指尖，然後接過頸鏈

我雙手將頭髮一捉起，右手拎住好似梳咗做高馬尾嘅頭髮，頭髮都有啲亂

「Okay，扣好啦。」阿立探頭望向鏡中嘅我

「唔該～」我將頭髮放番落嚟

等到時間差唔多之後，我同阿立就一齊出門口出發去班聚，隔咗咁耐再見大家，都係會有啲緊張




IG Link: https://www.instagram.com/nd_cotttoncandy/?hl=zh-tw