【愛情】關於我一覺瞓醒發現喺初戀屋企⋯！: 50. 難以置信
我地去到餐廳，跟喺帶位員嘅身後行，行到去一個門前面，我都未準備好，阿立就已經伸手捉住門柄
阿立行喺我前面推門入面，我跟喺佢身後行入去，房入面坐嘅都係好熟悉嘅面孔，但同時又已經有啲陌生
「嗨～」「哈囉～」
「知珩！」坐喺最近門口位置嘅女仔起身興奮咁走向我，我都未嚟得切睇佢係邊個，佢就已經一手攬住我，「好耐冇見你啦！你上次做咩唔嚟呀？」
佢鬆開我嘅時候我先望到佢個樣，原來係恩舒，我同恩舒以前中學嘅時候係坐隔離，所以我地都幾熟，不過畢咗業就冇咩聯絡啦⋯
「上次唔得閒，所以今次嚟番囉～」我都攬一下恩舒，佢仍然係一個清爽開朗嘅模樣，「好耐冇見你啦！」
「咦～你兩個一齊嚟嘅？」坐喺對面嘅一個男同學講道，「舊情復燃啦？又一齊番嚟？」
佢咁樣講一句，所有人嘅注意力都落喺我同阿立身上，個個都係想食花生
「我地—」「只係咁啱撞到一齊嚟。」
喺阿立要開口解釋嘅時候，我嘅心因為緊張而收縮咗一下，即刻搶先佢一步開口，阿立隨即望咗我一眼，然後對大家點點頭
「仲以為你兩個一齊番添～」大家食唔到花生，睇起嚟都好似好失望
阿立輕輕推咗我一下，我行到恩舒隔離坐低，阿立坐喺我對面，坐喺啱啱八卦我地嘅男同學隔離
「你地一齊嚟，搞到我仲以為你地又一齊番添！」恩舒指一指阿立
「冇啦，只係咁啱撞到一齊嚟。」我笑一笑，唔可以有破綻比佢睇到
「仲有邊個未到？」負責搞班聚嘅男同學問道，然後耷低頭睇一眼手機，又抬起頭望一望我地
「應該都齊啦係咪呀？」一個男同學望咗我地所有人一眼之後講道
「阿盈未到。」「盈盈未到。」
兩個睇緊手機點名嘅女仔同時開口講道，佢地講嘅阿盈，係游巧盈，佢今日原來會嚟呀
呢頭講完，嗰頭就有個女仔推開門，喘住氣行入嚟：「Sorry呀～我遲咗少少⋯！」
「嗨～」「唔緊要呀～都未嗌嘢食，你坐低先啦～」
「好呀，唔該⋯」游巧盈仲回緊氣，佢拉開櫈坐低，佢見到同佢隔幾個位嘅阿立之後，微笑住點一下頭，「嗨，好耐冇見⋯」
「好耐冇見。」阿立兩邊嘴角微微撐起，點一下頭
兩個人嘅反應咁尷尬嘅⋯？唔熟就唔好打招呼嘛⋯睇到都覺得尷尬⋯但我望住佢兩個呢份尷尬，我心入面嘅不安感慢慢滲出嚟，神經線都開始突突跳動
游巧盈同我咁啱對望咗一眼，然後，我同佢，同時咁，將視線移開⋯我同佢嘅關係，唔太好，初中開始已經係
「哎呀⋯好尷尬⋯」恩舒喺我隔離低聲講咗一句，我望向恩舒嘅時候淨係見到恩舒一臉嫌棄
當初中學嘅時候，恩舒同我一樣都，屬於討厭游巧盈嗰種，除咗唔啱傾之外，仲有其他問題⋯當係私人恩怨啦⋯
「嗯？咩好尷尬？」我細聲咁問恩舒
「我話游巧盈同許翊瑜，分咗手係尷尬啲㗎啦～點會做得番朋友？」恩舒細聲咁講
「吓⋯？分咗手⋯？」我聽完即刻一頓一愣
恩舒啱啱話邊個同邊個分咗手⋯？佢係話「游巧盈同許翊瑜」係唔係⋯？阿立同游巧盈拍過拖？幾時嘅事⋯？
我抬眼望向阿立，阿立淨係望住男仔嗰邊，同班男仔有講有笑
「你唔知道咩？佢兩個讀U嗰陣一齊咗一段時間⋯」恩舒愕然咁望住我，好似冇估到我會唔呢件事一樣，「我以為你知⋯許翊瑜有喺IG po過，你冇睇咩？」
恩舒拎起手機，開咗阿立嘅IG比我睇，但呢個account係我冇見過嘅account，應該係private account之類
嗰陣分手之後我有一直follow阿立嘅account，所以我肯定呢個account係佢另一個account嚟
「唔知，冇留意⋯」我淡然咁回答咗一句，「我冇follow佢呢個account⋯」
「哦～佢呢個account係畢業之後先開。」恩舒耷低頭一直喺度睇阿立嘅po，「不過佢應該都刪咗嗰個po，得一個po係同游巧盈有關⋯」
「係咩⋯是旦啦～冇咩所謂。」我笑笑口咁講，但只有我自己知道呢個笑容係我夾硬擠出嚟嘅笑容
「佢真係咩都要同你爭⋯仔都要同你爭⋯」恩舒不屑咁對我講，「啲人仲話佢同你好似，似個屁⋯有眼耳口鼻就話似⋯」
中學嘅時候，好多人都話我同游巧盈生得似樣，但我心入面超唔中意人地咁樣講，佢咩都要同我爭，我有咩佢都有，真係好煩⋯不過，佢叻啦，大學都同到阿立一齊啦
中學嗰陣我買咩佢買咩都算，講嘢都學埋我都算，成績都要同我鬥個高低，連Ex都要同我同款，佢係想點樣？
我抬頭望向阿立嘅時候，我嘅心都沉咗落去，諗到阿立讀大學嘅時候同過游巧盈一齊⋯呢一刻，我連笑都唔想笑，笑唔出真係⋯
「許翊瑜成日都換女朋友，但好似同佢一齊嘅時間最長⋯」恩舒又細聲咁補充資料比我聽
「係咩。」我微微聳肩，恩舒輕拍咗我嘅手臂一下
喺恩舒拍我手臂嘅同時，阿立咁啱望過嚟，同我對上視線，佢對我側一側頭、微微一笑；我側一側頭，露出一個皮笑肉不笑嘅表情，然後就將視線移開，同恩舒傾計
「不過許翊瑜都真係狠，搵個同你咁似嘅人一齊⋯」恩舒拉住我隻手低聲同我講，「游巧盈係慘就真⋯聽講係佢追許翊瑜⋯」
「嗯，係咩⋯」我感覺到我塊面已經夠黑，連假笑都笑唔出
IG Link: https://www.instagram.com/nd_cotttoncandy/?hl=zh-tw