【愛情】關於我一覺瞓醒發現喺初戀屋企⋯！: 55. 介意
夜晚
我一個人坐喺廳睇手機，知珩未收工，所以屋企得我一個人
手機一直彈新嘅message通知出嚟，但我完全都冇㩒入起睇，好習慣淨係喺通知欄睇佢地講咩
「@瑜 聽日同唔同我地食早餐？」
「晏啲答你」我㩒入group答咗一句，「未肯定」
「你唔同我地食早餐呀？」Ella好快咁回覆，不過佢平時打字都好快就係
「你屋企咁好最近都有早餐食嘅？」Mavis回覆，仲要喺後面加個笑喊
「你地約住先，我陣間問完先答你地」我望一望時間，知珩應該差唔多番嚟
知珩最近唔知係唔係心情好，最近都有整早餐，我本來都冇預佢整埋我嗰份，但佢整咗嘅話我都會照食嘅～
「咔—」一提起佢，佢就番嚟啦
「我番嚟啦⋯」知珩一個攰樣咁開門入嚟，把聲都有氣無力
「歡迎番嚟。」我喺梳化坐起身望住門口，「今日好忙？」
「唉，最忙嗰陣Abby又打爛嘢⋯！」知珩用力嘆氣一聲，因為呢個原因搞到佢心情唔好，「個個都要幫佢執手尾，激到阿逸死咁濟⋯」
知珩踩住踭將波鞋除落嚟，拎住老麥行到餐枱前擺低
「你叫我買但冇講咩餐，我就隨便叫咗個比你。」知珩疲倦咁拉開木櫈
我行到餐枱前面，將淺啡色嘅紙袋撕開，將嘢飲喺膠袋拎出嚟，知珩將飲管遞比我，我將飲管插入嘢飲
「好攰呀⋯最忙嗰下要執手尾⋯」知珩將薯條擺入口，「佢即炸㗎，薯條。」
「一次兩次啫，都唔緊要嘅。」我拎住個包坐低，知珩將薯條倒晒出嚟
同以前我地中學食老麥嘅步驟，一模一樣，一下就將薯條倒晒出嚟先
「咩一次兩次！」知珩即刻瞪大眼，「佢係一星期番三日，有兩日都會打爛嘢！」
「咁⋯佢仲可以喺度做⋯？老細咁忍得？」我都有啲難以置信，如果日日都做嘢打爛嘢，我老細應該會炒咗佢
我地講兩句又食下嘢，有種好似一齊過日子嘅人一樣嘅感覺，番嚟抱怨下工作，食飯嘅時候講下番工攰唔攰
過日子嘅人，唔係都係咁樣？以前覺得同知珩嘅最後係分開好可惜，宜家見番之後⋯就唔想比時間流逝⋯
「唉⋯唔知⋯肚餓食嘢先⋯」知珩拎起汽水飲咗一啖
「你去唔去？女班長嘅婚禮。」我突然諗起今朝早睇到以前中學女班長po喺IG嘅婚紗相
「嗯？去呀～佢都特登嚟派帖啦⋯」知珩一手托住臉，另一隻手拎件麥樂雞，用尾指碌手機，「你唔去咩？」
「去呀，其他男仔都話會去，所以就去。」我講道
「好似游巧盈都會去。」知珩抬頭望住我，淡然嘅語氣配上想諷刺我一樣嘅眼神
「所以呢？我打算同你一齊去。」我冷靜咁應對，冷靜咁笑一笑
「哦⋯」知珩睇起嚟好似冇在意一樣，但我都係察覺到佢隱約滲出嘅笑意，「我做咩要同你一齊去？」
「唔想一齊去嘅話，分開去都得～」我退一步，唔打算逼佢
「又唔係唔想嘅⋯」知珩見我讓步就有啲猶疑不決，拎起點咗茄汁嘅薯條指住我：「考慮下先啦～」
「你決定啦。」我食埋手上嘅包就企起身打算拎張紙巾
「你去邊呀？」知珩喺我起身嘅瞬間就瞪大雙眼望住我，坐姿都端正起嚟
我轉身喺紙巾盒入面抽咗張紙巾：「拎tissue。」
「哦。」知珩見到我手上嘅紙巾，又放鬆咁靠住櫈背坐
有知珩喺度，屋企氣氛真係好唔同；之前我仲係自己一個人住嘅時候，屋企長時間都好冷清，我喺邊度先開邊度嘅燈，屋企啲燈都好似感應燈咁
但自從知珩搬咗嚟之後，屋企嘅燈開多咗，亦比之前溫暖，有時有人同我一齊打鬧，一齊傾下計，感覺真係好似屋企
「哈哈哈哈～」知珩望住手機笑，唔知佢睇到啲咩咁好笑
佢喺我面前，都係嗰個冇咩形象可言嘅李知珩
「唔準偷笑呀！」知珩見到我偷笑，即刻就不滿咁踢咗我一腳，「許翊瑜，我未嬲完你㗎⋯！」
「咁我地知珩要嬲到幾時先肯原諒我？」我起身行到佢隔離坐低問佢，伸手輕輕咁拍咗佢兩下
「冇啦，唔原諒啦⋯！」知珩撥開我隻手，撇開臉唔望我
「哦⋯」我扮佢擺出委屈嘅表情，轉身坐好拎起手機安靜咁睇
知珩見我冇出聲就慢慢小幅度咁擰轉頭偷瞄我一眼，我一直坐喺佢隔離唔講嘢
「喂⋯許翊瑜⋯」知珩試探性咁叫我一聲，然後又伸出食指用力戳我一下
「嗯？」我望咗佢一眼之後又繼續睇手機
「有酒粒。」知珩戳住我嘅臉頰，講出做呢個舉動一定會講嘅嘢
「冇酒粒。」我輕撥開佢隻手，「小氣鬼⋯」
「冇小氣，只係我就係討厭佢，而且⋯」知珩聳肩，佢嘅「而且」有啲引起我嘅興趣，正喺我有啲想知佢講咩嘅時候，佢開口講咗句：「冇嘢⋯」
「李知珩。」我趁佢仲係面朝我嘅時候伸手捏住佢嘅臉頰，「都過咗幾年啦，有必要仲嬲咩？」
知珩吸一口氣，好似想講啲咩，但佢又冇真係開口講出嚟，一個欲言又止嘅樣
以前嘅事都係過去，我地都冇必要一直回頭望以前，嬲番幾年前嘅嘢冇意思，人要向前望
游巧盈嘅事，我係咁樣嘅想法，但掉個頭諗一諗，其實⋯我同知珩嘅事都係好幾年前嘅事，我咪又係冇放低⋯
IG Link: https://www.instagram.com/nd_cotttoncandy/?hl=zh-tw