【愛情】關於我一覺瞓醒發現喺初戀屋企⋯！: 54. 勤奮
「嗯。」我接過佢手上嘅咖啡
「你飲Mocha？」知珩望一眼張單，又疑惑咁望我一眼
「幫人拎。」我指一指企喺門外嘅人，知珩沿住我指嘅方向望出去
「哦～」知珩收回視線對我微微一笑
知珩好快就轉身繼續做下一張單，我拎起咖啡就直行去門口推門行出cafe
「嗱。」我將咖啡遞比Ella
「唔該～」Ella開心咁接過咖啡，「啱啱好聽完電話就咖啡到～」
「差唔多番去啦。」我拎出手機睇一眼時間，lunch都差唔多完，「你啲嘢執晒未？聽日要掉比阿姐睇。」
「未呀～想比你睇一睇個大概先，我唔太肯定個style同今次佢地個設計夾唔夾。」Ella有啲唔肯定
「你做晒啦？」我有啲意外
平時我同佢講得，佢實話今日做，一定係未做完，今次居然做咗仲話比我睇一睇先？
「做咗一半啦～我揀咗幾張比較啱feel嘅相，tune咗執咗啦～不過都係比你過目下先～」Ella嘻嘻笑道，從佢嘅表情睇起嚟，佢都似真係做咗嘢要交齊嘢比我
「生性啦？知唔可以做Deadline fighter啦？」我輕笑一聲
「咁⋯我做得唔好會影響你嘅評價㗎嘛～我梗係要做好啲！」Ella望向我認真咁講，隨即又有啲唔好意思咁移開視線講道：「Mavis又提醒咗我少少嘢，所以我都係決定要乖乖地做嘢啦！」
「係乖嘅就連Mavis提你都唔洗，自己識做啦。」我無奈咁講，雖然口係咁講，但見佢真係有生性嘅覺悟我都輕鬆啲
「知啦知啦⋯！」Ella不悅咁扁起嘴，然後將手放到右額前比個敬禮動作：「師傅我以後會乖乖地學嘢做嘢㗎啦！」
「好好好～番去比我睇下你做完嗰啲啦。」我點一點頭
「知道！」Ella比咗個Okay手勢
我望住Ella，有時望到佢呢個輕易帶住滿足感嘅笑容，都會覺得佢果然都係細都係啱啱出嚟做嘢，搞到我有時都唔知要鬧佢定話佢好⋯
但既然佢宜家係真係努力做嘢，咁都係好事，都算係責任感嘅提升⋯？
⋯
「你終於都乖乖地做嘢啦？」Mavis經過嘅時候突然開口打斷咗我同Ella講嘢
「咩呀？我一直都有做嘢囉！」Ella嘅注意力即刻分散咗，擰轉頭不忿咁望住Mavis
「識驚啦咩？」Mavis拍咗Ella嘅膊頭一下，「陣間阿瑜話比阿姐知你成日偷懶唔做嘢，你就真係可以執包袱走啦～」
「咩呀～我有做嘢㗎！我最近都交齊嘢比阿瑜㗎！」Ella慌張咁望向我，想我點一點頭承認佢有交齊嘢，「你唔信問下佢呀！」
Ella一望我，Mavis即刻就跟住一齊望過嚟我度，雖然佢係真係最近都交齊嘢，但我諗到佢超容易滿足⋯
「希望你keep住交齊嘢啦。」我唔太想讚佢，陣間讚一讚佢，佢就真係自滿點算？
「我會㗎！」Ella即刻擰過嚟面向我，認真咁點頭，「真係！你唔好聽Mavis亂講。」
Mavis輕哼一聲笑一笑，拎住水杯就行去茶水間，一日都唔知飲幾多杯水⋯
可能上次比人阻止過，所以最近都唔敢去cafe搵知珩，但我都估唔到佢居然會叫Ella幫佢做呢啲嘢
「繼續啦，講埋落去。」我朝Ella嘅電腦螢幕微微抬一下下巴，「啱啱未講完。」
「哦好呀。」Ella點頭，然後又繼續講佢嘅想法同構思
今次Ella真係做足功課，搵齊資料又有進度交到出嚟，講解構思嘅時候都好有條理，唔同以前一問三不知，再問就閃人先
我瞄咗Ella一眼，佢嘅認真係少有嘅，希望佢以後都會維持到落去
以前我一直叫佢做嘅嘢佢次次都冇做到，成日都係Hea咗佢又或者搵個借口推遲，最後要我執手尾
其實嗰啲要求唔係佢做唔到，只係佢懶去做，冇擺心機同時間落去，只要肯花少少心力，其實唔會唔得
「阿瑜你覺得點呀⋯？」Ella講解完之後有啲緊張咁擰過嚟望我，「洗唔洗再改啲咩？」
「大致上都okay，不過你用呢個色調嘅話，到時要講清楚啲你嘅構思同呢個色調有咩關係。」我點一點頭，今次佢嘅準備都做得足，所以我都冇咩嘢要挑剔佢，「暫時都唔錯。」
「好！我再執呀！」Ella聽到我咁講，緊張嘅神情即刻緩和，好似又充滿信心咁
「好。」我將櫈移番去我個位前面
我手頭上仲有其他負責緊嘅project，我都要搞掂我自己啲嘢先得啦～
不過喺我開始做嘢之前，酙杯水先再開始，坐到屁股有啲痛⋯
「有排都未夠鐘收工⋯」我望一望掛牆嘅鐘，啱啱食完飯番嚟一個鐘有多，但離收工都係好遠好遠
雖然話攝影師會外出工作，但最後都係要番嚟office坐喺度做嘢，一坐就坐幾個鐘，屁股唔痛就假⋯
以前成日覺得番office工係夢寐以求嘅事，番中環商業區、坐office唔洗日曬雨淋、朝9晚5
但宜家真係番咗之後，就覺得其實真係好悶，日日喺度對住電腦，日日都係過住幾乎一樣嘅生活⋯
我拎住手機喺茶水間順便偷一偷懶，有時都會喺IG見到以前中學同學嘅近況，大家好似都過得好好
拍拖嘅拍拖，結婚嘅結婚，上次去班聚嘅時候，我地班又有同學派帖要結婚
我刷新一下IG，一眼就見到知珩po咗story，我下意識就㩒開佢嘅story嚟睇，cafe好似冇咩人，只係佢同佢嘅女同事嘅自拍嚟
「唉⋯今晚食咩好⋯」我不禁輕嘆一口氣，但其實我只係好順口咁講一句今晚食咩
見番知珩之後，好似有嘢唔同咗，但又冇咩大改變，不過生活的確有意思咗
「唉，番去做嘢⋯！」我搖搖頭，收拾心情番去做嘢
IG Link: https://www.instagram.com/nd_cotttoncandy/?hl=zh-tw