【愛情】關於我一覺瞓醒發現喺初戀屋企⋯！: 58. 溫馨
我將摺好嘅衫整齊咁疊起，望住每一件都整齊摺好嘅衫，心入面有啲舒壓嘅感覺，不過大概只係因為今日唔洗番工，所以先可以咁舒壓
我將摺好嘅衫擺番入房，阿立嘅衫就擺番喺佢嘅床上面
我坐喺梳化上面攬住攬枕睇手機，屋企得我一個，靜得嚟又有啲悶
「唉～Day off都唔知做咩好⋯又冇人比我約、又冇人同我出去、我爸媽又要番工⋯」我向左邊側身瞓低喺梳化上面，百無聊賴咁睇住電視播緊嘅新聞，「好悶⋯」
我起身行去廚房，打開掛喺門柄上嘅白色膠袋，入面放住零食同薯片，阿立之前買番嚟嗰袋
「食個⋯燒烤味啦～」我拎起黃色包裝袋嘅薯片
阿立買番嚟嗰日，我打開個袋一望，第一反應係發現入面9成都係我中意食嘅，口味同牌子都係
阿立唔太食薯片，中意食薯片嗰個係我，佢中意食嘅口味都寥寥可數
「諗太多，可能真係順手拎⋯」我轉身行番去廳，不過見到當下都係會有啲開心，「至少佢仲記得⋯」
我頹廢咁坐喺梳化上，有時番咁多日工可以休息下都唔錯，不過有時個個都番晒工得我放假都悶㗎
「今日我放假⋯今晚要唔要煮飯⋯？」我忽然靈機一動，閃出呢個想法，「上次阿立都煮過飯啦，今日我放假要唔要我煮一次⋯？」
⋯
「咔咔—」
「你今日咁快嘅？」我愕然咁擰轉頭望向門口，望住阿立行入嚟
「你話你煮飯嘛～」阿立笑道，然後行入嚟廚房，「難得我地知珩話煮飯，收工梗係要趕番嚟。」
「你咁快番到嚟，但我都未煮完～」我唔太熟練咁拎住鑊鏟將牛肉粒兜兩兜
「呢個好香！」阿立企喺我隔離好似監工一樣睇住我煮，「淨係牛肉粒呀？」
「係呀，你唔係中意食牛肉咩？」我擰轉頭望阿立一眼笑問
「係呀～冇錯。」阿立肯定咁點頭，一臉期待咁等我煮完
「仲差少少啦，你去換咗衫先啦～」我伸手輕輕拍一拍佢，「轉頭出嚟應該有得食㗎啦～」
「好啦～」阿立伸手輕力咁拍一拍我嘅後尾枕，然後就轉身行出廚房
好唔好食我唔知，我煮嘅已經係我比較識煮嘅餸，而且得我同阿立兩個人食，餸嘅量又唔洗「我幫你拎嘢出去。」
唔知有冇一分鐘，阿立就換好衫行番嚟廚房，將煮好嘅都拎出去放喺枱上面
「你咁快嘅？」我望佢一眼，然後熄火，將最主要嘅牛肉都上碟
「肚餓嘛～」阿立笑道，然後打開飯煲裝飯，「你食幾多？」
「半碗夠啦。」我將碟牛肉拎出去放喺阿立面前，喺佢出嚟之前偷食一粒試一試味
「李知珩你做咩偷食呀！」阿立拎住兩碗飯出嚟，即刻就睇到我偷食嘅舉動
「試味嘛～睇下好唔好食⋯」我仲咬緊個牛肉粒，味道唔錯，而且仲係啱啱煮起熱辣辣，「好食。」
「食飯食飯！」阿立逼不及待咁拉櫈坐低，拎起筷子嘅第一件事係先試我炒嘅牛肉粒
我拎住筷子但都未敢食嘢，見佢第一個就食個牛肉搞到我好緊張，好擔心我煮得唔好食，怕佢唔中意食
「點呀？好唔好食呀？」我緊張咁捏住筷子，上身前傾，緊張咁望住阿立嘅表情變化，「會唔會太濃味呀？」
「我覺得好食呀～」阿立滿意咁點頭，我即刻鬆一口氣
「好食就好～」我笑一笑就夾餸食，「就驚你覺得唔好食～」
「好食呀～我中意食。」阿立點頭，我諗佢都唔係氹我先咁講，我都試過個味唔差㗎
「咁⋯你中意食就得啦～唔好食都要食㗎啦！」我擺出愛理不理嘅表情，偷偷地瞄阿立一眼，見到佢喺度偷笑，「影張相send比媽咪睇先～」
我影張相就繼續食飯，見到佢食得開心，我都覺得好開心，自己煮嘅嘢對方中意食，的確係一件令人鼓舞嘅事
「你冇煮過飯咩？」阿立望一望我，然後又耷低頭食啖飯
「有煮過比我爸媽食囉⋯」我稍微回想一下，「你叻啦～除咗我爸媽之外，係第一個食我煮嘅飯～」
「幾啦～」阿立滿臉寫住自豪
我不經意咁望咗佢一眼，我享受同佢之間嘅平靜，周圍嘅環境令我心境好平和
如果你問我，阿立喺我心入面係唔係同其他人唔一樣，咁我諗，我會答你⋯嗯，係唔一樣
「如果一直咁樣生活落去，好似⋯都唔錯⋯」我嘅心入面忽然有少少踏實嘅感覺，「同阿立一齊過嘅話⋯其實真係唔係咁差⋯」
「望住我做咩？食飯啦。」阿立啱啱好抬眼望我，嘴角小幅度咁微微上揚起嚟
「冇咩，陣間你洗碗。」我搖搖頭，輕描淡寫咁講咗一句，「今晚我煮飯。」
「好呀。」阿立好爽快咁就答應咗我，將牛肉粒夾到我嘅碗入面，「食飯先。」
「你都食。」我夾咗棵菜去阿立嘅碗入面
我地喺下一秒對望，然後同時露出笑容，呢種有默契嘅感覺，的確會令人有一絲動容
食完飯之後，阿立就自動自覺咁執枱捧起碗碟行入廚房
「嗱，筷子～」我將筷子放喺洗手盆入面，「咁，我出去睇電視啦？」
「得啦，我洗嘢得啦。」阿立打開水喉，微微抬一下下巴示意，「你出去睇電視啦。」
「洗嘢就推起衫袖嘛⋯」我細聲咁講嘅同時順手咁幫阿立將衫袖推到手肘上面，「咁我出去啦～」
我一下子坐低喺梳化上面，覺得今晚心情好好，一切都好好～
⋯
今晚收工之後，我、阿逸同樂恩一齊去咗食飯，食完飯之後又落下一站
「3位呢度。」著住紅色格仔圍裙嘅阿姨帶我地去到一張空嘅四人枱坐低
「睇下食咩？」阿逸喺隔離拎咗張點餐紙，「睇下食咩糖水先～」
係，我地嘅下一站就係糖水舖，呢間糖水舖都係我地嚟開嗰間，食慣呢間嘅足料糖水就食唔慣其他
IG Link: https://www.instagram.com/nd_cotttoncandy/?hl=zh-tw