【愛情】關於我一覺瞓醒發現喺初戀屋企⋯！: 59. 憂慮
「我食豆腐花！」坐喺我隔離嘅樂恩喺阿逸面前嘅紙上指一指，「知珩食紅豆沙！」
「好。」阿逸點一點頭，好快咁剔咗幾個剔就將張交比阿姨
等咗一陣之後，阿姨小心翼翼咁拎住糖水過嚟放喺枱上面
喺我伸手想將碗糖水拎近到我前面嘅時候，阿逸就早一步伸手：「我幫你拎，熱呀。」
「唔該。」我禮貌咁講一聲
阿逸拎咗三隻匙羹，遞咗一隻比我，然後又遞一隻比樂恩
「影比卓思齊睇先，等佢羨慕下～」樂恩拎起手機，喺食第一啖之前先炫耀比卓卓睇
「你真係好衰⋯」阿逸無奈咁望住樂恩一笑，「仲要特登影比佢。」
「等佢睇下都好呀！」樂恩理直氣壯咁表示
「你兩個不如一齊坐，你地個channel近啲。」我講笑咁講
「我唔要囉⋯」阿逸先一步開口拒絕，「唔好拉低我嘅智商水平。」
「我都未嫌棄你！你做咩搶先一步嫌棄我呀！」樂恩即刻不忿咁撅起嘴，「知珩你睇下佢呀！」
「乖啦乖啦，我地食糖水啦～」我摸一摸樂恩嘅頭安慰佢一下，「唔理佢啦。」
「哼！」樂恩對阿逸瞇起眼再唔忿氣咁哼佢一聲，然後低聲講一句：「難怪你冇女朋友⋯」
「我冇女朋友得罪你啦？」阿逸反駁樂恩，佢兩個成日都要鬥嚟鬥去真係好好笑
「冇～」樂恩冇抬頭，只係瞄咗阿逸一眼，然後就搖搖頭
喺差唔多食完嘅時候，阿逸遞咗一張紙巾比我
「你唔遞埋比我嘅⋯？」樂恩好快咁就嚟咗一句
喺我耳中聽起嚟，有少少疑似呷醋嘅味道？我望一眼阿逸，睇下佢嘅反應
「我慢一步啫⋯」阿逸有啲無奈，抽咗張紙巾遞比樂恩
我地埋完單之後，行出糖水舖要起行番屋企嘅時候，樂恩忽然間停低落嚟，我同阿逸見佢停都緩緩停落嚟
「做咩？」阿逸先開口問，樂恩耷低頭望住手機，又抬起頭望一望周圍
我望一望周圍，冇咩特別呀，唔通係有識嘅人？
「我個friend喺附近，叫我去join佢⋯」樂恩嘅表情有啲凝重，又抬起頭周圍望一望，「我都係過一過去先啦，聽日見啦我地。」
「你自己小心啦。」阿逸見佢嘅反應就露出認真嘅表情提佢一句，「有咩就同我地講啦。」
「嗯，咁我行先啦。」樂恩點一下頭，然後轉身急步向我地嘅反方向行
我望一望阿逸，佢好似都係有啲擔心樂恩嘅安全：「可能係急事啫。」
「我都知，佢難得有咁凝重嘅表情。」阿逸繼續向前行，「你知佢平時㗎啦，咩都笑笑口，唔係真係大件事嘅話，佢點會係呢個反應。」
隔咗一兩秒之後，阿逸又開口：「送你番去，今日真係晏，就唔好覺得麻煩我啦～」
「既然你都咁樣講啦，我都冇得拒絕啦。」我微微一笑，佢咁樣講，我再拒絕就顯得我好小氣
阿逸送到我行出地鐵站，我本來想叫佢唔洗出閘，但佢話都係送到番去安全啲
「你就咁介意人地送你番去咩？」阿逸笑問
「咁就唔係，只係⋯唔慣⋯？」我有啲遲疑咁回答，心入面有另一個答案，但係冇講出嚟嘅必要，「我唔慣人地送我番嚟啫。」
「今日太晏啦，都怕唔安全。」阿逸解釋道，「以為你係驚屋企人見到之類，有時有啲人都會怕屋企人誤會。」
唔知係我錯覺定我嘅直覺太準，感覺佢嘅呢個問題有佢想聽到嘅答案一樣⋯
「都唔會話怕嘅，誤會嘅話咪解釋清楚。」我笑一笑講道，「解釋清楚咪得。」
「都係嘅。」阿逸露出好淡嘅微笑
不過似乎我答嘅嘢同佢心入面想聽嘅嘢唔同，所以笑容都有啲勉強，但我講嘅，係事實
「下次等卓卓番工再去食餐好啦～」阿逸提議道
「好呀，可惜卓卓唔係成日番。」我點一點頭附和道，「下次再叫埋佢一齊食飯啦～」
「諗下下次放工之後食咩好先～食韓燒好唔好？」今日都未過，阿逸已經諗緊下次食咩好
「咁快就諗定下一次啦？」我忍唔住笑咗一笑講道
「差唔多啦～」阿逸望住我，然後佢微微點一下頭
我同阿逸行到紅綠燈前面等過馬路，過埋馬路就差唔多到屋企啦
我企喺斑馬線前面等緊轉單，偶然一個抬頭望向馬路嘅對面，我掛喺面上嘅笑容即刻僵硬咗一下
企喺馬路對面嘅人同我面對面企、四目交投，佢面無表情咁直望住我，搞到我心入面有啲唔自在嘅感覺
佢擰轉頭望一望紅綠燈，然後耷低頭睇手機，點解我就會有種心虛嘅感覺⋯？
「嗰個係唔係你個中學同學？成日嚟cafe幫襯嗰個。」阿逸靠近我低聲問我
「嗯。」我點一點頭，目光自然咁向下望，望住前方嘅地面
「你地住同一區？」阿逸望一望周圍
「係呀⋯」我望向佢點一點頭
紅燈跳變成綠燈，我同阿立迎面而行，阿立抬頭，目光先落喺我身上，然後又落到阿逸身上，最後佢微微點一點頭，微微側身喺我隔離行過
綠燈開始閃，我同阿逸行到對面，我就好似自然舉動咁擰轉頭望一眼
「做咩呀？」阿逸有啲疑惑咁問我
「冇嘢⋯」我好快咁擰番轉頭望向阿逸，搖搖頭，「我就住前面啦。」
「送埋啦，都唔差在嗰兩步。」阿逸講到一半就擰轉頭望咗一眼
阿逸將我送到去大堂門口，我同佢揮一揮手就轉身行入大堂，一行入大堂我就快步行去搭𨋢嘅位置
「阿立會唔會誤會，以為我冇重新開始嘅想法⋯？」我心入面有一絲嘅憂慮閃過，「但就算佢係誤會，解釋就得啦⋯宜家我地又唔係有啲咩關係⋯」
唉⋯雖然可以咁樣說服下自己唔洗諗咁多嘢，但係又會忍唔住嘆氣，由我怕佢會誤會嗰一刻起就會更肯定咁察覺，佢對我嘅意義係唔一樣
我番到屋企，卸個妝，換件衫，沖個涼，咁樣又一日，我拎住手機行出廁所嘅時候，阿立已經番咗嚟坐喺度食緊老麥
我拎起手機望一眼嘅時候，先見到阿逸原來喺大半個鐘前send咗message比我：「平安番到去未？」
IG Link: https://www.instagram.com/nd_cotttoncandy/?hl=zh-tw