【愛情】關於我一覺瞓醒發現喺初戀屋企⋯！: 61. 邀請

我將手機放喺枱面上面，仰頭望住天花板然後合埋眼，我深深咁吸一口氣，憋住氣，兩秒後將所有氣全部呼出

坐好起嚟之後又向前伏低喺枱上面，側住頭望住同浩宜嘅對話框，啱啱好就見到彈咗一個新嘅message出嚟：「你自己知啦呢啲嘢，你對我講大話又唔緊要嘅」

我將手機鎖屏，我都唔想諗太多⋯成日諗住要重新開始嘅話，以後點算⋯？可能真係好嘅回憶有太多，所以先可以做到呢個地步

手機嘅螢幕又亮一下，我拎起手機，手機就自動解鎖，浩宜嘅message就直接彈出嚟比我睇：「如果到最後都係覺得佢最好嘅話，咪食個回頭草」

「不過我宜家講咩都冇用，由你見番佢嘅一刻，你都預咗自己會番轉頭」





「既然仲有得揀，就諗清諗楚先做決定」

「係真心仲中意定係因為新鮮感，呢樣嘢喺17歲定25歲都一樣要諗清楚」

所以話，有時浩宜先係人間清醒嗰個⋯

「你個ex好定你個同事好，你自己知，只係睇你唔想比邊個輸咁解」

我望住浩宜一個又一個send嚟嘅message，完全唔知要覆佢啲咩好，比佢講到口啞啞





我係真係唔知邊個好邊個唔好？我係唔甘心要阿立輸？阿立對我嚟講，係⋯

我又一次比浩宜問到口啞啞，我又一次係咁樣，如果一直諗住以前，就冇辦法打破一切重頭嚟過

「同阿立一齊住，好難完全當冇事⋯」我以唔輕唔重嘅力度拍咗自己嘅額頭兩下，「但浩宜真係講得啱⋯」

我比浩宜咁樣講一講，就心大心細，猶猶疑疑

⋯





今日我同阿立一齊出門口，前兩日嘅事，我同佢又好似當冇事發生過一樣

「仲係好眼瞓⋯」阿立緩緩開口，順便打多個喊露，「好攰⋯」

「你琴晚好夜瞓咩？」我望住阿立一個全晚冇瞓嘅攰樣

「瞓得唔好⋯」阿立搖搖頭，行喺我前面先一步踏入地鐵車廂，「唔知點解⋯呵～欠⋯」

我背住後面玻璃企，阿立企喺我面前伸手捉住我隔離嘅扶手

「今晚早啲瞓會唔會好啲？」我提議，「你今日要開會？著裇衫嘅。」

我將佢由頭到腳打量咗一次，今日佢著得好整齊，平時都整齊，但同著裇衫嗰種整齊唔一樣，今日睇起嚟好專業

「今日有客上嚟，晏晝。」阿立拉一拉身上嘅裇衫，「公司規定，有客上嚟開會要著裇衫。」





「你個領做咩反起咗？」我嘅餘光咁啱留意到佢嘅衫領，「出門口前照一照鏡嘛～」

我自然就伸手幫佢將前面個領反番落嚟，阿立伸手摸一摸後頸嘅領

「下次喺門口擺番塊鏡，之前一直打算買但一直都冇買⋯」阿立講道，「貼喺牆嗰隻。」

「去IKEA睇下，佢好似都有好多款。」我按住佢嘅想法再提議

「今個星期六去睇下⋯？」阿立微微點頭，「你去唔去？」

「好呀～」我爽快就答應咗佢嘅要求，再睇一睇更表，「我星期六放假。」

「晏晝出去，唔洗咁早起身。」阿立摸一摸自己嘅頭髮，純粹咁抓兩下





「方便你瞓晏啲？」我笑問道，「定係賴床可以賴到晏啲？」

「兩樣都係⋯」比我睇穿嘅阿立有啲唔好意思咁撇開臉笑，「比你發現咗⋯」

「你不嬲都中意賴床㗎啦～邊個以前成日賴床賴到番學遲到？」我沒好氣咁望佢一眼

「都係間中啫，又唔係日日，我都係日日同你一齊番學！」阿立否認呢件事，但我明明記得佢成日唔知醒，然後叫我自己番學先

「係咩～好似唔係喎許翊瑜～」我瞇起雙眼，以一個不信任嘅眼神定睛望住佢

「咩唔係呀？」阿立搖搖頭，下一秒就即刻壓低聲線，「冇日日囉，最多都係一、兩日⋯」

「哦～」我笑意滿滿咁點頭，就算過咗咁耐，都係會覺得佢有時有啲可愛

「咁星期六出去㗎啦⋯」阿立偷瞄我一眼，低聲講道





「我知啦！我又唔係老人痴呆！」我出拳輕打阿立嘅膊頭一下，「星期六出去嘛～」

星期六，兩個人，單獨出去，好耐都冇試過，希望到時唔會太尷尬啦

到站之後，我同阿立就向唔同方向行去，我回頭望咗一眼，阿立頭也不回咁向前行

今日係晴天，因為晴天會有好事降臨，我嘅心情都因為晴天嘅關係而變得好好

⋯

「今日又會咁得閒嘅⋯」阿逸企喺洗手盆前面睇手機

我將cafe嘅情況環視一周，轉動手腕睇一眼手錶，1點都咁得閒都係真係少有，一個月都唔多有呢啲情況





「都真係好少有嘅～」我擰轉頭望阿逸一眼，阿逸仲係好專心咁睇緊手機，慨嘆咁講：「不過有時靜下唔洗咁chur都係好嘅，日日都咁chur真係會早啲死⋯」

「但成日都咁靜就冇錢賺啦～」我剪咗一包新嘅咖啡豆，趁宜家仲得閒，快啲整咗一批新豆先

「唉～」阿逸忽然嘆一口氣，我企喺咖啡前一笑，「趁冇人就休息陣先啦～」

阿逸只係自言自語，佢勤力嘅時候好勤力，係個好可靠、好有責任心嘅人，但想休息想懶嘅時候，佢都真係會懶

就好似宜家咁，一直企喺洗手盆前面睇手機，睇一陣又行去甜品櫃前踎低繼續睇手機，所謂嘅「扮工」

阿逸踎咗陣又起身，企喺同我相隔一個身位嘅位置，靠住喺水吧嘅枱睇手機，睇起嚟好chill一樣

「打算收工去睇戲？」我咁啱瞄到阿逸嘅手機畫面停喺戲院嘅場次

「嗯係呀⋯」阿逸無奈咁笑一下，下意識搖搖頭，又睇下場次，「不過都唔知睇唔睇好⋯」

「想睇嘅話咪去睇。」我將洗好嘅杯整齊咁逐隻放上杯架，「放工去休息下都唔錯呀～」

「本來打算約friend睇，但佢地個個都話冇興趣，搞到我都唔知一個人睇唔睇好⋯」阿逸無奈咁嘆氣

「係好想睇嘅話，一個人去都唔緊要嘅⋯」我只係想安慰佢一下，一個人去睇又真係尷尬咗少少嘅

阿逸睇完場次就拉番去最上面，原來佢想睇最近上嗰套懸疑片：「你想睇呢套懸疑片呀？」

「你知呢套戲呀？我身邊啲人都話冇興趣睇⋯但我睇完佢預告又覺得可以睇下。」阿逸將手機螢幕側向我比我睇下




IG Link: https://www.instagram.com/nd_cotttoncandy/?hl=zh-tw