【愛情】關於我一覺瞓醒發現喺初戀屋企⋯！: 62. 續集

「我知呀！我最近都睇緊佢嘅預告片！」我心情即刻有啲激動起嚟，「我身邊嘅朋友又係話冇興趣⋯但我睇佢預告好刺激咁！」

「你都中意睇呢類？」阿逸似乎有啲意外我會有興趣，「女仔多數唔係都會中意睇啲愛情片？懸疑片比較⋯少見？」

「都唔係中意嘅，見到預告啱就想睇下。」我收起我嘅激動，不過都係有少少興奮

「如果你身邊冇人有興趣同你睇嘅話，我呢個同樣係冇人陪我睇嘅人，可以同你一齊睇⋯」阿逸遲疑咁開口提出邀請，「你唔介意嘅話⋯」

喺阿逸提出邀請嘅時候，我安靜咁望住佢，我只係有啲猶疑，應唔應該同佢一齊睇⋯？





「不過如果你介意嘅話，都唔緊要。」阿逸見我冇出聲答應，即刻就退一步表示唔緊要

「唔係呀，我唔介意呀～」我連忙搖頭，「可以一齊睇，只係唔知今晚有冇場⋯」

「我地cafe都收得早，所以佢都有8點場，呢度過去都好快。」阿逸好快手咁拉落去場次同上映戲院嘅資料比我睇，「可以睇8點！」

「好呀，咁睇8點啦～」我微笑點一下頭

「你想坐邊？都多空位。」阿逸望住手機講道





「唔⋯」我行到阿逸隔離同佢一齊望住顯示嘅座位表，「坐中間啲會唔會好啲？睇正個銀幕好似好啲⋯你想？」

「中間啦，反正咁多位，你想坐上面遠啲定中間嗰幾行？」阿逸又問我

「我冇所謂，都可以。」我望向阿逸，然後點一下頭

「咁坐⋯上面呢幾排？」阿逸嘅指尖落喺最上嗰幾排，劃咗個括號示意

「好呀。」我點頭，「我陣間過番數比你啦～」





「唔急呀～你慢慢嚟啦～」阿逸露出笑容，佢睇起嚟好開心可以睇到呢套戲

距離收工⋯已經唔想計有幾多個鐘，總之係有好多個鐘⋯

⋯

「戲飛。」阿逸走近我，將其中一張戲飛遞比我，「仲有好一陣先開場，你洗唔洗去買嘢飲？」

「唔⋯」我提手望一眼手錶，「都好，你洗唔洗飲嘢？」

「睇下先。」阿逸等我行佢先再邁步行，同我並肩而行，「你洗唔洗食嘢？爆谷之類。」

「唔洗，睇戲食嘢嘅話會分心。」我搖頭示意唔洗，「你想食嘅話就買啦～」

「唔洗，我都唔慣食嘢～」阿逸嘅笑容比起平時好似更溫和，唔知係唔係只係我嘅錯覺





我拉開雪櫃嘅門，拎咗樽柑桔檸檬，等阿逸揀嘢飲嘅時候，拎喺手中嘅手機一震

我嘅心喺拎起手機睇嘅一刻用力縮咗一下，莫名其妙咁有啲緊張⋯

見到係WhatsApp嘅message嘅時候，我直覺覺得會係阿立嘅同時，真係有少少希望會係佢

「Okay，咁你番嚟再同我講」

阿立覆咗我一句，見到真係佢覆我嘅時候，我心入面有一絲嘅開心飄過，但呢句直白又簡單嘅回覆，又令我有啲唔知點好

「知珩？」阿逸輕推咗我嘅膊頭一下，我回神望向佢，佢指住我手中嘅嘢飲微笑：「我拎去比埋錢。」

「好呀唔該⋯！」我連忙將嘢飲遞到佢手上，唔知啱啱喺我分神嘅時候，佢叫咗我幾多次⋯我真係怕咗自己因為一個人而恍惚嘅感覺





「嗱！你嘅。」阿逸拎住嘢飲走近我，「做咩突然一個愁樣？」

「吓？冇呀，咁啱諗緊嘢啫⋯」我擠出笑容，將啱啱嘅事先擺埋一邊，「都差唔多入得去，我地行啦！」

⋯

我同阿逸行出2號院，咁就睇完一套戲，我覺得我冇睇錯，水準真係唔錯！

「哎～」阿逸撐起雙手伸個懶腰，「聽日又要努力番工啦～」

「講到你平時番工唔努力咁。」我只係抿唇一笑

「你搭咩車番去？」阿逸先係望一眼手錶然後再問我

「地鐵，都係地鐵。」其實我同阿逸都已經係行緊去地鐵站嘅方向，「地鐵最方便嘛～」





「都係嘅，地鐵去邊都方便啲。」阿逸行喺我隔離

第一次同佢單獨出去，其實我有好少好少嘅唔自在，可能係唔慣又或者係之前未真係熟到可以單獨咁樣出嚟

我同佢一齊行嘅時候睇手機又唔係，唔睇手機嘅話雙手就唔知點算咁，可能係我有手機依賴症？

去到月台嘅時候啱啱好有車，我地兩個即刻小跑起嚟上車，都唔敢慢慢行

「啱啱好有車～」阿逸伸手捉住扶手

「就嚟10點半⋯」我擔心咁望住錶面上嘅時間，一諗到陣間番到屋企就覺得好驚：「陣間番到去，阿立又要嬲啦⋯」

我send咗個message比阿立：「我宜家番嚟啦」





「你仲咁乖會同屋企報告番去未？」忽然聽到阿逸咁樣一講，我頓時抬頭，見到阿逸面帶笑容望住我

「嗯，講聲啫，唔洗佢擔心。」我下意識將手機嘅螢幕靠近自己嘅方向收，㩒咗lock screen閂上螢幕

「唔知佢會唔會出續集？」阿逸側頭思考，佢似乎係問緊我

阿逸企喺我面前，以前冇試過真係喺呢個距離認真望佢

睇起嚟佢冇阿立咁高，似乎比阿立矮啲，但都係高過我⋯女仔嘛，又唔洗生太高嘅，我覺得我呢個身高啱啱好，唔高又唔矮

不過，佢地兩個人比我嘅感覺完全唔一樣，我嘅意思係單純咁指感覺，散發出嚟嘅感覺

阿逸散發出嚟嘅氣息更有一種成熟嘅感覺，佢穩唔穩重我唔知道，但以同事嚟講，佢係好可靠，大家都會好自然咁信任佢

阿立平時都係會有少少稚氣，可能係因為我地本來係同年紀嘅關係，又一早就識，好自然會帶咗個濾鏡

不過真係工作嘅時候，或者拎住相機影相嘅時候，佢就會變到好認真，同平時輕鬆嘅佢完全唔一樣，佢都係對工作好上心嗰種人

「佢應該會出續集啦⋯」阿逸猶疑咁講咗句

「應該會？佢個ending都似會出續集。」我諗起最後一幕嘅男主角，佢最後喺暗角位改頭換面咁行出嚟，點睇都似有下一集，「唔知佢下集係唔係要去解決埋嗰個律師。」

「估唔到個律師原來先係個大Boss！」阿逸諗起電影嘅內容好似都係有啲意猶未盡，滿臉都係讚嘆：「中間嗰度勁緊張！眼都唔敢眨一下！勁驚miss咗佢啲精彩位！」

「睇到中間嗰陣我都好緊張，好想知佢會搵到線索定搵唔到！」我諗番啱啱喺戲院，連廁所都唔敢去，怕一去咗廁所就甩咗劇情

「下次佢出續集嘅話，一唔一齊睇？」阿逸問我，佢嘅表情睇起嚟都好小心翼翼




IG Link: https://www.instagram.com/nd_cotttoncandy/?hl=zh-tw