【愛情】關於我一覺瞓醒發現喺初戀屋企⋯！: 67. 與別不同
「你講阿立？」知珩一聽就知我意指邊個，佢一臉輕鬆笑住咁講：「佢夠瞓啦嘛，咪唔洗買咖啡囉～」
「嗯？」我有啲意外，對於佢呢個答案，但諗深一層都只係啲好普通嘅回答，我露出唔在意嘅笑容：「你又知？」
「呀⋯？我估咋～」知珩嘅雙眼稍微瞪大咗一下，然後搖搖頭
上次我送知珩番屋企嘅時候，咁啱見到嗰個男仔，當下我下意識就去留意知珩嘅表情，佢似乎⋯有啲緊張⋯
就只係一個朋友，就算係撞到，都冇緊張嘅必要？
可能係因為我中意知珩，所以我先會事事小心，會小心翼翼嘅，先係愛慕嘅感情⋯所以我先會連一個微細表情都睇喺眼內
「你以前有冇拍過拖？」我好奇咁大膽問一句
「我？有呀。」知珩專注咁望住眼前嘅咖啡機，輕笑問我：「做咩？你冇咩？」
「我點會冇？我呢啲咁好嘅男仔。」我借意讚一讚自己，都算係推銷一下自己
「都係嘅。」知珩冇講啲咩，只係笑住點頭，「你都係好男仔嚟嘅。」
知珩嘅一句，令我嘅內心即刻開咗幾朵花，佢都覺得我好，所以，我會唔會有機會⋯？
「呀呀！突然收到好人卡⋯！」我嘅手掩住胸口，擺出中槍受傷嘅難受表情
「我講事實咋，個個都係咁講唔係咩？」知珩輕哼兩聲笑言
「我咪又係單身寡佬一個。」我無奈咁搖搖頭，我呢句說話冇咩特別意思，只係單純咁陳述事實，「不過我又未去咁⋯飢餓。」
知珩又一次比我講嘅嘢引笑，佢嘅笑容唔係好甜美嗰一種，係佢一笑會牽動你嘅靈魂深處嗰一種
「叮鈴鈴鈴—」
Cafe嘅門鈴響起嚟，我嘅餘光已經見到係樂恩番嚟
「早晨⋯唉⋯」樂恩一個攰字寫喺額頭，拖住腳步行入嚟，經過我身後嘅時候仲要嘆氣
我嘅目光跟住樂恩嘅身影，望住佢行入去休息室閂埋門，佢成個人嘅氣場都塌咗落嚟，完全唔似平時嘅佢
我望向知珩，知珩同時以疑惑嘅眼神望向我，我地都搞唔明樂恩一大清早做咩咁沮喪
「搞咩？」我望一望休息室，又望一望知珩
「唔知⋯」知珩搖搖頭
休息室嘅門一打開，我同知珩幾乎係同時望過去，望住樂恩一個頹樣行出嚟，成個人完全提唔起精神
「失戀呀？」我喺樂恩行到我隔離拉開櫈坐嘅時候問佢，「一朝早就咁頹。」
「唉⋯邊有戀可以失⋯」樂恩用衰怨嘅眼神望我，「我都冇拖拍⋯」
「咁所以做咩咁唔開心？」我側住頭望佢，關心咁問佢，睇下可唔可以開解到佢，「邊個恰你？」
「冇呀⋯」樂恩連語氣都好消沉，平時佢係超活潑嗰種，「唉～發生咗啲麻煩事啫⋯」
樂恩忽然間喺我手臂上打咗兩拳，我滿頭問號：「突然間做咩打我？」
「就係突然想打你⋯」樂恩捉住我嘅手臂，然後鬆手又打兩拳，力度唔係真係好大，我都可以承受得起有餘
「好好好⋯你打完心情好就打啦⋯」我無奈咁拎起餐具收拾一下同時講道，「不過唔好咁大力打我就得啦⋯」
「唉～」樂恩提起手，我以為佢又要打落嚟
我冇避開，但樂恩嘅手停喺半空，隔咗一陣先拍落我嘅膊頭，手自然咁就搭咗喺我嘅膊頭
我冇推開佢，只係望佢一眼，佢睇起嚟今日嘅心情唔太好，雖然唔知佢發生咗啲咩事
我望向外面，外面嘅雨比啱啱我番嚟嘅時候落得更密啦⋯今日嘅生意應該冇平時咁好啦⋯
雨天，灰濛濛嘅天空配搭上雨天帶嚟嘅煩躁感，的確好容易令人心情欠佳
喺中午嘅時候，人流比平時少
「落雨嘅話，就算係要打卡應該都冇心情⋯」我望住外面自言自語一樣道
「大概係冇人中意自己個妝花掛。」知珩因為冇單所以企喺水吧睇手機，「化個妝咁嘥時間心機。」
我望住知珩，佢今日同平時一樣化咗個好普通嘅妝容，唔⋯女仔嘅嘢我唔識分，有太多唔同嘅講法，但呢啲係唔係叫韓系？
「化個妝仲要特登早啲起身，唉～做女仔真係難～」我拎起枱布抹一抹甜品櫃嘅弧面
知珩笑而不語，我都冇見過知珩嘅素顏，因為佢真係日日都化住個妝番嚟，女仔都係貪靚嘅生物
「叮鈴鈴鈴—」門鈴響起
「歡迎光臨。」我習慣成自然咁就嗌咗一句，視線一落喺門口，就見到係知珩嗰個朋友
「你今日都係照舊呀？」我嘅左邊傳嚟知珩嘅聲音，我望過去就見到知珩臉上表情，係明眼人都睇得出嘅愉悅感
「嗯，唔該。」對方行到收銀處同知珩相視一笑
知珩臉上掛住嗰種愉悅感，係完全打從心底、可以改變成個人氣場嗰種，眼神都唔一樣⋯
平時佢喺cafe，完全唔會有呢種神情，嗰種眼入面有光嗰種
「今日我地先講緊你好耐冇嚟。」知珩轉身行去咖啡機前
「我夠瞓。」佢低頭望手上嘅收據，講出同知珩今朝所講一模一樣嘅回答
「我就知你夠瞓～」知珩嘅眉眼間都流露出同平時唔一樣嘅溫柔
「你又知？」對方輕輕一笑，知珩稍微抬頭望佢，然後跟住佢露出笑容
我行入水吧，行到甜品櫃前背向知珩，整理一下放喺櫃頂嘅嘢
我唔想比佢察覺到我嘅唔妥，但我嘅胸口真係有種鬱悶嘅感覺凝聚起嚟⋯單靠聽唔望，都可以感覺到冇人可以插一隻腳入去
「係舊同學，熟啲都唔出奇⋯」我喺心入面安慰自己
「逸！」忽然聽到有人喺廚房大聲嗌我，係樂恩
「嚟啦！」
我心入面默默咁鬆一口氣，擰轉身快步行入廚房，樂恩叫我真係叫得及時，幫咗我好大嘅忙⋯
IG Link: https://www.instagram.com/nd_cotttoncandy/?hl=zh-tw