【愛情】關於我一覺瞓醒發現喺初戀屋企⋯！: 68. 家人
⋯
⋯
⋯
「Mocha。」我將外賣杯遞比阿立
「唔該，我走啦。」阿立伸手，喺我手上接過咖啡杯，喺轉身走前低聲講咗句：「今晚見。」
我目送阿立行出cafe，自從嗰日同阿立出去完買嘢之後，我同阿立之間嘅關係好似又有少少變化，好似一直將某啲嘢溶化緊
今晚見，聽起嚟有啲曖昧，好似我同佢喺收工後有約咁
「佢走咗啦？」比樂恩召喚完嘅阿逸喺廚房行出嚟
「係呀，攞完咖啡就走咗。」我望一望門口嘅方向，然後先望阿逸
阿逸望住我沉默不語，突然定睛望住我，搞到我有啲不明所以，於是我耷低頭繼續做嘢就算
「今朝一講佢好耐冇嚟，佢晏晝就嚟咗。」阿逸悠閒咁行入嚟水吧，打開甜品櫃整理下啲甜品
「點知佢？今日可能唔夠瞓啦～」我下意識笑一聲
唔知嘅人，大概會覺得我係估；知道嘅人，就會知道我係因為喺凌晨四點起身去廁所嘅時候，見到佢仲煮緊杯麵未瞓
而且比杯麵香味吸引嘅我行到廚房八卦一眼之後，就獲得杯麵嘅第一啖
「今晚想食咩？」手機彈咗一個新通知出嚟，係阿立嘅message
我感覺到自己嘅嘴角麵微微上揚：「你知我講緊你？一講你，你就send message比我」
「知你講我壞話」「我邊有？我似會講你壞話嘅人咩？」
「今晚想食咩？」「你煮？食咩都得啦咁樣，你決定」
「咁就真係我決定啦，你收工同我講啦」「收到！」
⋯
夜晚收工嘅時候，我地都已經執好嘢準備收舖走
「一齊食飯嗎？」樂恩打開休息室嘅門，企喺門前將圍裙除落嚟
「我唔啦，我番屋企食。」我第一時間就表明我唔去，「屋企煮咗飯比我～」
「哦⋯咁呀，下次啦～」樂恩抿一抿唇，然後望向阿逸，「逸，你食唔食？」
「得我同你咋喎⋯」阿逸有啲猶疑，但又好似唔太想拒絕樂恩，「都可以嘅，但你想食咩？」
「打邊爐呀！」樂恩即刻興致勃勃咁問，「我想打邊爐！」
「好好好⋯」阿逸無奈咁點頭，佢都真係好就得人，「等我一陣⋯」
「我行先啦咁樣，搞掂晒啦啲嘢～」我以輕快嘅語調講道，今日嘅心情唔錯
「拜拜～」「拜拜⋯」
我將我嘅圍裙掛番好，孭起袋推門興沖沖咁行出cafe，心入面淨係諗阿立今晚煮咩餸就已經覺得好開心
「我收工啦，番緊嚟」我send個message比阿立同佢講聲
「咔、咔—」我用鎖匙扭動門鎖，推門入屋嘅時候，飯餸嘅香味撲鼻而嚟
「我番嚟啦！」我有少少興奮，好快咁將鞋除落嚟就行入廚房，「香到我好肚餓⋯」
我個肚喺我聞到香味嘅一刻咕嚕咕嚕咁叫起嚟，本來都冇特別覺得肚餓，但我宜家超肚餓⋯！
「換衫先，等多陣有得食～」阿立倒個汁，拎起鑊蓋蓋喺鑊上面，入面嘅肉粒滋滋香
我急步行番房換衫，順便去廁所落個妝，將長髮梳好，用個鯊魚夾將頭髮都夾好喺後尾枕
「知珩！食得啦！」
喺我行出廁所嘅時候，啱啱好阿立就叫我食飯，我即刻抱住期待萬分嘅緊張心情行出去打算幫手
「你要食幾多飯呀？」我企到去飯煲前面，拎住個飯殼正打算要裝飯
「一碗啦。」阿立行入嚟企喺我身後探頭望住我將白飯裝住佢嘅碗入面
我擰轉身將碗遞比佢，但佢冇行出去，反而仍然企喺我後面
喺我裝完自己嗰碗之後，阿立伸出冇拎嘢嘅左手：「比我。」
佢拎住兩個碗出去，我兩手空空咁跟喺佢身後
「啲嘢佢都拎晒，搞到我好似白食白住咁⋯」我望住佢嘅背，喺心入面低聲講一句
「食飯～」阿立將碗擺低喺我坐嘅位前面，然後行到我對面坐低
「食飯～」我同阿立對望，同時對對方講一句
一句「食飯」，真係好有家人嘅感覺，唔係單純出於禮貌嘅一句，而係真係好親切好親近嗰種小溫馨感覺
「做咩一直喺度偷笑？」阿立夾餸嘅時候望咗我一眼，見到我笑嘅時候，佢嘅嘴角上揚起嚟笑問我，「仲掛住笑，專心食飯啦！」
「好食呀好食呀～」我答非所問咁講，然後伸手夾件煎三文魚，「有住家飯食開心嘛～」
「開心咪好～」阿立夾多件牛肉放入我個碗
有時估唔到，以前想做嘅嘢，會喺分手之後有機會做，但就算宜家嘅阿立同當年嘅阿立唔係完全一樣，但我都好開心
「好一家人嘅感覺⋯」阿立耷低頭細聲咁講咗句冇心嘅說話
佢臉上嘅笑容都唔見咗，係因為啲咩事而惋惜？
「嗯？」我當聽唔清佢講咗啲咩，微微側一側頭望住佢
「冇。」阿立望向我嘅瞬間即刻擠出微笑
「都係同你一齊食飯自在啲～」我有意無意咁講道，「同同事一齊食飯，都係會有啲唔自在。」
「咁我地，同你同佢地唔一樣嘛～」阿立嘅雙眼因為笑而變彎
⋯
我沖完涼打開門，外面廳閂晒燈，但阿立坐喺梳化托住頭悠悠閒咁望住電視
我好奇咁行出去，原來佢睇緊電視播嘅電影⋯我仲以為佢睇咩睇到咁專心
「閂晒燈咁好氣氛呀～」我坐低喺阿立隔離，同佢一齊睇電視，「咩電影嚟？」
「打鬥片。」阿立嘅雙眼都冇離開過電視，一直專心咁睇
我偷望阿立一眼，我冇起身番房，反而坐喺佢隔離同佢一齊睇電影，享受同佢獨處嘅時間
不過我都唔知睇咗幾耐，眼皮愈嚟愈重，一直開合開合，睡意好似愈嚟愈明顯⋯
「咁暗嘅環境真係令人好想瞓⋯」我喺心入面用帶住倦意嘅語氣講道
IG Link: https://www.instagram.com/nd_cotttoncandy/?hl=zh-tw