【愛情】關於我一覺瞓醒發現喺初戀屋企⋯！: 72. 誤會
「你話Mavis？我同佢係同事。」我坦白回答，雖然我真係唔太想承認，「佢對你好有興趣。」
「我知⋯我拒絕咗好多次，佢好中意講嘢⋯口水多過茶咁⋯」知珩嘅語氣略帶點不悅嘅抱怨，下一秒又瞪大眼望我：「你冇同佢講我地係識㗎可？」
「冇，同咗佢講嘅話，佢實纏住我問你嘅嘢。」我搖搖頭，唔洗實際試一次都可以預測到佢嘅舉動，「Mavis有時真係好煩，我唔會出賣你。」
「你真係唔好呀⋯！我宜家番工最怕就係見到佢⋯」知珩露出一個嫌棄嘅表情
我望住佢呢個表情就想笑，所以話Mavis冇可能可以入到知珩眼，畢竟知珩嘅眼光好高
「行啦行啦！好肚餓！」知珩捉住我微微推咗一下示意我行快啲
「係～係～」我順住知珩嘅意思加快腳步行起嚟
番到屋企之後，就係知珩喺度處理嘢食，撕開紙袋、將雞翼盒上下倒轉之後先打開、將辣醬倒喺盒入面，一切都行如流水
「食嘢啦許翊瑜～」知珩興高采烈咁坐低，我幫佢嘅嘢飲插好飲管放到佢右邊
「哦。」我望住佢開心嘅笑容都跟住佢笑一笑
「咁快就到女班長嘅婚禮，時間過得真係快⋯」知珩忽然提起，「畢業之後都冇見過，再見嗰陣佢都結婚啦。」
時間都真係過得好快，原來都已經到咗身邊開始有人結婚嘅年紀
我好似都冇諗過我嘅未來會唔會有結婚呢回事⋯
有啲人結婚為咗有個家、有啲人係為咗愛、有啲人係被迫，而我呢啲連自己都未必顧得好仲單身嘅人，完全唔敢諗結婚
如果⋯如果我同知珩當初冇分開，會唔會都考慮到結婚呢一步⋯？
但，已經冇如果⋯
⋯
⋯
⋯
星期六
「阿立，咁樣好唔好睇？」我企喺鏡前面襯緊衫
今晚去同學嘅婚禮飲宴，隆重嘅場合都唔可以著得太隨便嘅～
「唔錯呀～」阿立起身慢慢行過嚟企喺我隔離
阿立今日難得著起裇衫，睇起嚟好有型，不過冇辦法，阿立本來就又高又瘦，都幾啱做個衣架子，好多類型嘅衫都襯得起
「影張相留個念。」我拉一拉阿立
阿立向我呢邊靠近、微微側一側頭，望住我嘅手機螢幕
「放心我唔會po出嚟，只係留個念。」我抬起頭望佢
「嗯，你po都得。」阿立彎低腰，㩒開啱啱張相睇，「不過全世界都會知我地一齊住。」
阿立離我好近，呢個距離嘅話可以感覺到呼出嚟嘅氣息⋯
我嘅嘴唇同佢嘅臉頰之間嘅距離唔多，如果我地再企埋啲，宜家佢嘅臉頰上面應該有一抹唇膏印⋯
「先唔要⋯」我默默咁耷低頭望番手機，「比人知又會比人問係唔係一齊番⋯」
屋內沉默咗好一陣，但我講嘅係事實，我唔想直接望阿立，於是悄然抬眼望向鏡
「噗⋯！你望住我做咩？」我一抬眼就見到阿立望住鏡微微側頭，透過鏡同我對望
我擰轉頭望佢，用手機嘅角輕戳佢嘅臉頰一下：「你做咩咁cool？」
「冇呀。」阿立順手就拍一拍我嘅頭頂，抓一下我嘅頭髮將佢地梳順，「要出門口啦。」
⋯
我地到酒店會場嘅時候，班上面好多同學都到咗，坐喺同學嗰一圍嗰度
阿立企喺我前面幫我拉開張櫈，我當然唔會拒絕亦唔會客氣，仲要特登一坐低就擰轉頭對阿立笑一笑
呢個笑容除咗係出於禮貌，更加係因為游巧盈坐喺我對面，啱啱我地一行到過嚟，游巧盈嘅視線一直定住喺阿立嘅身上
「坐啦。」我拍一拍我隔離嘅空位，阿立乖乖咁喺我隔離坐低
我不經意咁望咗游巧盈一眼，然後伸手捉住阿立嘅前臂湊近佢，低聲道：「你個ex喺對面望你。」
「我睇到，佢已經係ex，同我冇關係。」阿立側身靠近我低聲講道，佢嘅膊頭掂住我嘅膊頭
「我都係你嘅ex⋯」我帶住玩味嘅意思細聲講
「你同佢都唔一樣。」阿立嘅求生慾有啲強，佢一秒都冇猶疑就比呢個回答我，「高中先識嘅人比得上小學就識嘅半個青梅竹馬？」
我都係中意做佢心入面特別嗰一個，位置同其他人唔一樣，佢似乎都捉到我一向嘅心思
「哦～」我挑起眉抬起下巴，不過佢篤中我心思嘅回答的確令我嘅笑意忍唔住滲出
「你兩個又一齊嚟嘅？」坐喺阿立隔離嘅同學探頭望住我地，「話冇復合都冇人信啦～」
有呀，有人會唔信，嗰個人行緊過嚟添
「好耐冇見。」游巧盈行到我面前笑盈盈講道，但佢呢句應該係想同阿立講
「上次班聚先見完～都唔係好耐啫～」我面帶禮貌微笑回答
「上次都冇咩點同知珩你傾下計嘛～」游巧盈企喺我同阿立嘅後方
「你上次喺廁所唔係同我傾咗好一陣咩？」我故意喺「廁所」同「好一陣」加重語氣，游巧盈嘅燦爛笑容都僵咗一下
「喺廁所？傾咗咩呀？」阿立望向我柔聲問道
「佢話—」「冇咩呀～就係講下以前讀書啲嘢咋嘛～」
我都未開口，佢已經搶住答，怕我會同阿立講佢講咗啲咩一樣，不過我本來就冇諗住真係咁大整蠱講出嚟
「佢過嚟啦。」阿立隔離嗰個男仔轉身拍一拍阿立
我地同時望向佢望住嘅方向，原來係新娘拎住裙擺同新郎行緊過嚟
「嗨～歡迎你地嚟～」女班長見我地喺度都特別開心，行過嚟握個手，同女仔就攬一攬，「今晚食得開心啲！」
佢拎住裙擺小心翼翼咁行到我同游巧盈面前，伸手攬一下我地
「咦～你兩個又一齊嚟啦？」女班長望一望我同阿立
「約咗嘛～不過恭喜你結婚啦～」我同佢攬一下再握一下手，轉身同新郎又握一下手，「恭喜你。」
「你地呀，都快啲啦～」佢拍一拍阿立嘅膊頭，目光喺阿立身上短暫停留後移向我，「到時請我呀～」
IG Link: https://www.instagram.com/nd_cotttoncandy/?hl=zh-tw