【愛情】關於我一覺瞓醒發現喺初戀屋企⋯！: 71. 眼色
「唔洗⋯」我將佢隻手由我膊頭上推開，「做咩今日Ella問完你又問？」
「吓？」Mavis望一眼Ella，低聲對我講：「咁啱咋，大家都關心你嘅身體健康。」
佢到底諗緊啲咩？從佢把口講出嚟，都知係唔正經嘅嘢，加上佢嗰個帶住「不懷好意」嘅笑容
「我好健康。」我回答
「你有中意嘅人啦咩？」Mavis追問，我覺得我答咩都死
「你當係啦。」我敷衍咁答佢，我真係冇咩特別想講
所以單憑住Mavis呢種「拍拖就身體健康」佢指嗰方面嘅身體健康，呢種膚淺嘅想法，我更加唔可能幫佢追知珩
「哦～」Mavis一個恍然大悟嘅表情
下一個瞬間比我留意到佢望住Ella打咗個眼色，我悄然咁瞄Ella一眼，佢望住Mavis皺一下眉頭
「都唔知佢兩個搞咩⋯」我喺心入面講道，對於佢兩個又做咩我都冇咩太大興趣想知，「唔理佢地啦⋯」
我番到去先酙杯水然後先番埋位，打開電腦登入，然後又係工作時間啦
最近都主要做近排嘅project，冇咩其他嘢，我都係執埋啲手尾，執下相揀下相
我望一眼Ella，佢一坐低伸個懶腰就靠住座墊坐好做嘢，睇起嚟真係幾勤力
⋯
嚟到差唔多6點半，又差唔多放工
「一唔一齊食飯？」Mavis行過嚟問，「仲可以順便去個Happy hour！」
「去邊間呀？我都想去！」Ella將佢嘅嘢都執入手袋，「阿瑜你去唔去呀？」
「我唔啦。」我將電腦嘅嘢backup咗先，免得陣間有咩事嘅時候我啲嘢冇晒
「你唔去呀？去啦，休息下嘛～番屋企對住四面牆有咩用？」Mavis捉住我膊頭，開始游說我去
「去啦去啦！一齊去玩下嘛！」Ella雙手捉住我嘅前臂，「唔好咁悶啦～」
「我真係唔去啦⋯」我將我隻手抽番出嚟，Ella嘅手喺半空懸掛咗兩秒後先放低手，「我屋企煮咗飯啦⋯」
「你同佢講唔番去食囉～一晚半晚唔緊要啦～」Mavis繼續游說我
喺佢繼續說服我唔好番屋企食嘅時候， 就咁啱睇到知珩嘅電話來電，簡直係我嘅及時雨
「你想食咩呀？我陣間收工買埋番嚟呀～」知珩細聲咁講道
「未諗到，陣間你收工再同我講啦。」我望一眼掛喺牆上嘅時鐘，「我轉頭再話你聽。」
「好呀，我見你一直冇睇我message所以先打比你，怕你冇睇到。」知珩細聲咁講
「得啦宜家知啦～」我無奈一笑，「你陣間收再同我講，我唔阻你做嘢啦。」
「哦～」一收線就有把聲喺我身後傳嚟，就係一直企喺度游說我唔好番屋企食飯嗰個，「仲話冇女朋友？呢個明明係女仔名喎～」
「識字喎，知係女仔⋯」我有啲意外又有啲無奈，以前成日有人覺得係男仔名，但明明聽起嚟好女仔
「個名超有氣質～應該係靚女？」Ella好奇咁瞪大雙眼問
「嗯，幾啦～」我下意識深呼吸一口
「你居然會讚人靚？」Mavis有啲訝異，「有冇cafe個咖啡師咁靚先？」
佢兩個就係同一個人，但我當然唔會同你講
「差唔多啦。」我將自豪掛到臉上
「哎呀～仲話冇女朋友～」Mavis拍我膊頭，「仲扮嘢～」
「真係唔係女朋友。」我擰轉頭無奈咁同佢講，「你信就信，唔信就唔信啦。」
我抬頭又望一眼時鐘：「夠鐘收工。」
我孭起個袋起身，然後直接行去打卡收工，我嘅回答顯然地有啲無棱兩可，但冇辦法呀，一切都未有定論
⋯
「差唔多啦。」我喺梳化起身，行到去門口著鞋就出去
我企喺地鐵站嘅出口，㩒著手機睇一睇時間，知珩應該差唔多番到嚟
企咗一陣就見到知珩行出嚟，佢一見到我即刻忍唔住瞪大眼
「你喺度嘅！？」知珩滿臉驚訝
「見你差唔多番到嚟，同你一齊去買飯。」我行到佢面前
「哦，好呀～」知珩側住頭望住我，似乎對我嘅出現有啲開心，笑容有啲明顯，「咁你想食咩呀？」
「你想食日本嘢、韓國嘢、食pizza、老麥都得～」我同知珩邊行邊講，「你揀。」
「唔⋯」知珩望我一眼，但係又有啲猶疑
「你想食⋯」我望住佢，望住佢猶疑嘅表情估佢想食咩，「老麥？」
「少少⋯」知珩唔好意思咁笑道，「食唔食呀？」
「好，你想食就食啦～」我同知珩180度轉身往喺另一邊嘅老麥行去
「星期六晚就係女班長嘅婚禮，嗰日一齊去？」知珩提起星期六嘅婚宴，當初班聚嘅時候我地都答應咗會去
「上次話咗一齊去嘛，你要番工嘅話等你收工一齊去。」我微微點頭
買完嘢食，我兩隻手都拎住嘢，知珩兩手空空咁行出去
「好大風⋯！」知珩一手幫我推住門，另一隻手撥緊比風吹亂嘅頭髮
我行出嚟之後行喺知珩嘅前面，知珩小跑追上嚟，我可以感覺到佢隻手捉住我嘅外套，正確嚟講係捉住我嘅手臂近手肘嘅位置
一個下意識嘅舉動，就又有種以前細個拍拖嘅感覺，一大風嘅時候佢就中意伸手翹住我或者捉住我嘅手臂，成個人貼附喺我身邊
「原來你識佢㗎？」知珩忽然間望住我講咗一句冇咩指向性嘅說話，但我估佢係講緊Mavis
IG Link: https://www.instagram.com/nd_cotttoncandy/?hl=zh-tw