【愛情】關於我一覺瞓醒發現喺初戀屋企⋯！: 84. 肯定
「咳咳！」坐喺枱上面嘅女仔咳兩聲，端正咁坐好之後拍一拍我，投入到氣氛入面認真咁問：「李知珩！咁你宜家係點㗎？都有男朋友啦，你個男朋友對你嚟講仲重唔重要㗎！？」
佢嘅語氣同表情，同嗰種要鬧醒渣女嘅閨密一模一樣，真係似足九成，可能佢本來都會咁，只係因為平時冇機會比佢發揮
「噗⋯！」其他人掩住嘴喺度笑，但又唔敢笑得太大聲破壞氣氛，個個都好期待咁望住我
我深呼吸，然後擺出一個恃住自己多人追嘅高傲表情
「吓！？佢點解要重要？我又唔係冇得揀，佢對我嚟講一啲都唔重要。」我冷笑一聲回答，「唔重要呀～再唔係咪搵過個囉，就係咁。」
「哦～真係扮到似模似樣喎～」佢地靜咗兩秒，個個都忍唔到笑，直接笑出聲
「陪你地玩一次咋！下次唔好叫我講。」我搖搖頭，「比佢聽到嘅話，佢會嬲㗎真係⋯」
我冇諗到，阿立嗰日會早咗放，佢會聽到我地玩嘅玩笑；冇諗到佢冇停留多兩秒；冇諗到佢冇聽到最後⋯
「阿立，唔係⋯」我伸手就拉住佢嘅衫角，但又覺得有種無力感，係遲嚟嘅解釋嘅無力感，「唔係咁樣㗎⋯」
佢擰轉頭望我，只係對我微笑着，一句說話都冇講，眼神好似話比我知佢等緊我將真相娓娓道來
「嗰日係我地喺度玩情景題，所以先會咁講⋯」我微微耷低頭，握緊拳頭，指甲都陷入手心，手心傳嚟刺痛感，「唔係我真心話嚟⋯」
「嗯⋯」阿立嘅語氣明顯咁冷淡落嚟
「真係，我冇講大話⋯」我嘅心狠狠咁揪住痛咗一下，不禁伸手拉住佢嘅衫角，「真係一個玩笑嚟⋯我唔知道你會早走、會聽到、會誤會我嘅意思⋯」
「嗯，我知道啦。」阿立回答，我猛然抬起頭望佢，想知道會呢一刻會係咩表情
佢推門入屋，我跟喺佢身行入去然後順手閂門，阿立喺呢個時候擰轉頭望我
佢淺笑，我反而有啲心酸⋯鼻一酸，眼眶一紅，感覺我都忍唔住要喊出嚟，我用力咁捏住佢嘅衫角撇開臉
「喂喂喂⋯」阿立側住頭望我，溫柔嘅語氣令我更想喊，「做咩喊？我都未喊。」
「冇喊。」我抑壓住眼淚要流出嚟嘅感覺，但聲線無法掩蓋我嘅哽咽，一直微微顫動
「李知珩，我嬲完啦，過咗咁耐，再嬲都冇意思。」佢好似知道我心入面諗咩一樣，輕嘆一口氣之後平靜咁講道，「只係⋯介意啫。」
「你都唔嬲啦，仲介意啲咩？」我輕皺一下眉頭
「介意你覺得我唔重要，仲要親口講出嚟。」阿立嘅手放喺我下巴，掐住我兩邊嘅臉頰，「我地識咗咁多年，由朋友變成男女朋友，就算係講笑，都會好hurt⋯」
我望住佢真係有啲受傷嘅表情，心入面嘅歉疚一湧而上；如果話過咗咁耐冇再嬲，但表情眼神都會滲出受傷嘅感覺嘅話，當初佢親耳聽到嘅時候，係唔係好似我拎住把刀狠狠咁插喺佢心臟一樣？
「由朋友變成男女朋友好難，但由男女朋友變番朋友，反而好簡單⋯」佢嘅指尖輕掃過我嘅額，將我嘅髮絲繞到耳背，「但要再變番男女朋友嘅話，難度又更高啦⋯」
我定睛望住佢，感覺鼻更酸，眼更濕潤啦⋯我想伸手攬一攬佢，忽然間好想喺佢懷中，有啲掛住佢嘅氣味⋯
「李知珩，你知唔知你一個玩笑，我介懷咗幾耐？」阿立捉住我嘅手腕，將我輕輕一拉就拉到佢嘅懷中，佢嘅語氣特別認真，「我真係，好介意你話我唔重要。」
熟悉且令人安心嘅味道撲鼻而嚟，我嘅內心頓時湧出委屈感，眼淚完全止唔住
「你冇口問我㗎咩！我對你好唔好你唔知咩！我係真心定假意你唔知咩！你係重要定唔重要，你感覺唔到咩！」我帶住哭腔，一下一下咁用拳頭揼喺佢心口
阿立冇反抗，只係默默咁將我輕柔咁攬喺自己嘅懷中；我隻手攰啦，企喺屋企緊閉嘅大門前攬住佢
「你點可以，就咁掉一句冇feel比我分手，然後、然後就直接消失㗎⋯！」我用力捏住佢嘅衫，我都感覺到陣間衫都會皺晒，「不辭而別嘅人好討厭！」
「我以後會記得生番個口嚟問你肯定答案啦⋯」阿立拍一拍我嘅背，但我反而比佢一句「生番個口」引到我笑咗出嚟，「又喊又笑想點呀？」
「仲好講，最衰係你⋯！」我又喺佢心口上輕打一拳，「唔問我就誤會咗我啦⋯！」
「如果當初有問清楚你，可能今日⋯」阿立講到一半又冇講落去
可能今日嘅我地仍然好好咁一齊緊、可能已經計劃緊結婚、可能好似女班長咁都已經結婚啦⋯不過，現實又點可能同理想中一樣咁美滿？
「嗯⋯」我好似同佢有心靈感應一樣低聲同意佢講嘅嘢
「我覺得，只要你最後係揀我，你要諗幾耐我都可以等。」阿立嘅指尖喺我嘅髮絲上輕掃過，柔和嘅語氣喺我耳邊傳嚟
「聽你咁講，你好似已經肯定我最後會揀你咁樣。」我抬頭望佢嘅時候，眼淚都收番晒入去
「唔⋯Okay啦。」阿立無棱兩可嘅回答令我嘴角上揚，「又唔係覺得志在必得嘅～」
我對佢嚟講係唔係算係幾好拿捏？佢每次都可以好輕易咁睇穿我一樣，我嘅每一個微表情好似都比佢完全捕捉住咁
一個人太了解另一個人，有時都未必係好事嚟，太容易會比佢狠狠咁拿捏住⋯
我嘅雙手環抱住佢嘅腰，仍然有啲貪戀佢嘅氣味，佢身上嘅氣味令我太安心，所有不安感都會隨之而消失⋯
「你明明就好有信心⋯」我冇將呢句講出口，我自己知道就算啦
⋯
最近呢幾日都係天陰陰，太陽都好少出嚟，多數時間都係冇有雲同落雨
唔知係唔係因為咁樣，最近cafe都幾清閑，我諗平時要著得靚靚咁嚟打卡嘅女仔，最近都因為落雨冇咩心情嚟
不過lunch hour嘅人流會多番少少，但一過咗附近啲公司嘅lunch hour嘅話，人又會少啲，少到大概好似宜家咁，樓面員工多過客人
「樂恩同卓卓去食飯啦。」阿逸喺廚房行出嚟望一時水吧嘅時鐘
「Okay～」樂恩同卓卓離開佢地嘅工作崗位，將圍裙除落嚟然後去食飯
佢兩個出咗去食飯，樓面就得番我同阿逸兩個睇住，不過其實都好夠，對呢個人數量嚟講，而且佢地都好似準備走
「唔該埋單～」其中一枱嘅女仔就行過嚟埋單
我收緊錢嘅時候，阿逸已經行咗過去執乾淨張枱
IG Link: https://www.instagram.com/nd_cotttoncandy/?hl=zh-tw