【愛情】關於我一覺瞓醒發現喺初戀屋企⋯！: 85. 成熟處理

阿逸捧住啲杯杯碟碟行咗入廚房一轉，然後行咗出嚟水吧，拎起水杯飲啖水

「唉～最近都幾得閒～」我望一望cafe周圍，都係小貓三四隻

「最近落雨嘛。」阿逸望住窗外，飲多啖水就將水杯放低

「係⋯？」我擰轉頭嘅時候，見到阿逸嘅目光停留喺我身上

我下意識就開口，感覺阿逸好似有啲咩要同我講一樣⋯我開口之後先開始擔心佢會講啲咩，雖然我口講冇咩，但我都會下意識咁逃避佢⋯





「冇⋯」阿逸只係露出淡然嘅微笑，搖搖頭

一直去到夜晚收工嘅時候，我同阿逸一齊行喺行人路上，我同佢之間保持咗少少距離

「今日你朋友冇嚟接你嘅？」喺安靜到得車聲嘅路上，阿逸先開口問我

「佢嗰日就係順路先嚟。」我好順口咁講個大話解釋咗

「係咩⋯」阿逸低聲講嘅一句，我清楚咁聽到，然後佢又開口：「你地以前好似係中同？」





「嗯，係呀。」我點一點頭，然後我地又一次沉默起嚟

久違咁覺得行去地鐵站呢段路比平時長咁多，沉默帶嚟嘅尷尬氣氛係唔係會令路途變長變遠⋯？

「知珩，其實如果你有中意嘅人，可以直接同我講，我唔會死纏爛打⋯」阿逸忽然又開口同我講，佢好努力咁壓抑住聲線內嘅失落，用同平時無異嘅語氣同我講

「嗯，好呀⋯」我微微點一下頭，我冇抬頭望佢，我唔知道佢呢一刻係咩表情

「中意一個人嘅時候，所有嘢都瞞唔到人⋯中意一個人嗰陣，望到佢嘅時候雙眼都會自動咁有亮光，語氣都會唔同⋯」阿逸輕嘆一口氣，呢個嘆氣加上佢講嘅嘢，我知道佢知道我嘅心意，「因為我都有同樣嘅感覺，所以你一個表情一個眼神，我都會feel到佢對你嚟講，唔係中學同學咁簡單⋯」





「嗯⋯佢係我嘅，初戀⋯」我淺笑，微微點頭，「我地以前拍過拖，就係，放唔低⋯」

「冇諗過要同新嘅人開始試下？」阿逸呢個提問，喺普通閒聊同時都夾雜住少少嘅私心暗示

「試過，但唔得⋯」我苦笑道

喺過去同李毅遠一齊嘅時候，好似佢對我再好都冇辦法抹走阿立嘅身影，其實我又何嘗唔係搵一個水泡？成日話要將心完全騰空，對後來嘅人先公平，但係唔係真係講得咁簡單？

同過去過唔去，同自己都過唔去，新嘅人對自己幾好都好，諗到嘅都係上一個人，的確唔公平⋯有啲嘢口講容易做就難

「一直原地踏步，唔攰咩？」阿逸嘅意思喺我耳中聽起嚟都係要我放棄阿立，唔好再執著喺佢身上，「比人地牽動住你嘅情緒⋯」

我先係沉默落嚟冇答佢啲咩，阿逸見我冇開口，即刻有啲緊張咁解釋：「我冇咩特別意思，就算係其他人，我都會咁講。」

「其實我知道唔可以一直原地踏步，只係⋯佢同其他人唔同。」我微微點頭，後半句已經完全解釋咗阿立對我嚟講嘅意義同其他人嘅差距，「我都以為我會放低佢，因為當初嘅佢令我消沉咗好一段日子，但原來只要佢一擰轉頭走向我，我都係會自動咁走向佢，走回頭路⋯」





「嗯，我都唔蠢，你嘅意思，我聽得明。」阿逸對我微微一笑，我咁樣講，都算係降低咗殺傷力，「雖然我覺得，食回頭草唔係好事。」

「我有個朋友同你講過一模一樣嘅嘢⋯」我諗起浩宜認認真真咁同我講，叫我唔好番轉頭嘅時候，「我都有試過想去望下其他人，但原來好難⋯」

到呢一刻我都察覺到，只要係你真正刻喺心上嘅人，就算所有朋友都阻止你阻攔你，你都係會義無反顧咁朝嗰個人嘅方向跑，就算知道可能又會受傷，都願意飛蛾撲火

「見到你呢一面，覺得好新鮮。」阿逸笑道，佢睇起嚟就同平時一樣，「冇諗到你都會有呢一面。」

「咁每個人都會有嘅～我係人呀～有都唔出奇。」我聳肩道，然後望咗阿逸一眼，「你好好，真係⋯」

「你拒絕我還拒絕我，唔好派好人卡。」阿逸撇開臉，用輕鬆嘅語氣對我講，我諗佢只係唔想大家嘅關係變尷尬

阿逸係個貼心嘅人，不過我就無福消受啦⋯我嘅心入面都係向住一個人，一直以嚟都係嗰個人⋯





雖然大學嘅時候，我都係有拍拖，邊有人會真係為咗初戀而唔同其他人拍拖⋯？小說先有嘅事，現實又點會有？

但我同過其他人一齊先發現，原來當我將一個人放喺心入面重要嘅位置嘅時候，新嘅人無論做咩都好，我都會諗起嗰個人

當阿立再一次企喺我面前嘅時候我先發現，原來，我個心都係向住佢，就算我想試下放低佢同其他人一齊都好

「以後仲要番工見面，派好人卡嘅話會好尷尬啦～」阿逸帶住笑容伸手拍一拍我膊頭

「我都係講事實，你係真係好嘅，只係⋯係囉～」我笑一笑，「應該有其他人更加啱你。」

「唔知啦～我唔知，隨緣啦～」阿逸微微聳肩，輕嘆一口氣，「我比唔上嗰個令你有好多美好回憶嘅人，由佢第一次嚟cafe，你望到佢嘅時候嘅反應，我就估到，唔係同學咁簡單，你同佢講嘅嘢神情、語氣都唔一樣。」

我冇出聲，只係默默咁聽住阿逸講出從佢眼中見到嘅我，佢見到嘅我，到底係點樣？

「平時你都係有一種氣場，令人好難輕易去接近，就算係我地呢啲同你比較熟嘅同事都可以feel到。」阿逸微微抬起頭，回想起同我有關嘅記憶，「但嗰日佢一嚟到，我就feel到完全唔一樣嘅你⋯」





「平時你同我地講嘢嗰陣，都好有距離感；但你同佢講嘢嗰陣就有種好明顯嘅親密感。」

「可能你冇察覺到，但其他人包括我都feel到啦。」

「樂恩都有提過呢件事，話你對佢好似有啲嘢，今日你都解答咗呢件事啦⋯」

「不過，我都覺得，既然過咗咁耐都仲中意嘅話就去追啦。」阿逸望向我，佢嘅微笑係支持我嘅意思，「錯過咗一次，就唔好再錯過第二次。」

我覺得阿逸嘅想法好成熟：表明心意，但唔會逼對方回答；知道對方有中意嘅人，會瀟灑放手，支持對方嘅選擇

「我地仲係好同事。」阿逸輕輕咁拍咗我膊頭兩下，「唔洗怕我會點樣，我唔係十八廿二嘅小朋友。」

阿逸有時係真係幾成熟，年紀大啲，處理事嘅方式又會唔一樣





「知啦。」我點一點頭，我嘅選擇都一樣




IG Link: https://www.instagram.com/nd_cotttoncandy/?hl=zh-tw