【愛情】關於我一覺瞓醒發現喺初戀屋企⋯！: 90. 殘忍

我喺等靖佑嚟嘅時候，繼續好好咁摺衫；我將阿立嘅衫放喺阿立嘅床上面，等佢自己擺番入櫃

過咗大半個鐘之後，靖佑到我樓下，我落咗去接佢，因為佢冇卡入嚟

「靖佑⋯！」我推開玻璃門，就見到靖佑雙眼紅腫咁企喺一旁有瓦遮頭嘅位置

「你嚟啦⋯咁突然搵你唔好意思⋯」靖佑抱歉咁一笑，「搞到你冇咗自己planning⋯」

「冇問題呀～我今日都係喺屋企咋嘛～」我搖搖頭，拉住靖佑入嚟





喺番到入屋之後，我叫靖佑坐一坐，然後我酙咗杯水比佢

「嗌交啦？」我坐低喺佢隔離問

「嗯⋯」佢苦笑住點頭，「要分手⋯」

「咩事要分手呀？最近唔係一直好地地？」我望住佢又一次紅起嘅眼眶，有啲擔心

「佢話佢冇以前咁中意我，然後就話可能對其他人有好感，之類⋯」靖佑笑一笑，但下一秒又皺起眉頭，眼淚一粒一粒咁滴出嚟





我即刻伸手去拎紙巾比佢，我忽然間都唔知要點樣安慰佢，我以為係小事一樁，但似乎係冇辦法勸和嘅地步

「咁⋯你打算⋯？」我小心翼翼咁問，唔敢講太多令佢更傷心，只可以問佢嘅打算

「搬走囉，搬番去同我爸媽住⋯」靖佑索一下鼻水，然後聳聳肩，「唔通仲要對住佢一哭二鬧三上吊咁樣咩⋯」

「我以為你係嗰啲戀愛腦⋯」我半開玩笑咁講，因為靖佑成日都掛住男朋友喺嘴邊，我以為佢到呢啲時候，佢一定會唔比佢男朋友分手

「佢話冇feel，我綁住佢都冇用，佢都講到明，唔通我仲要纏住佢⋯？」靖佑雖然喊到眼紅眼腫，但係佢個人都係好清醒





我忽然諗起我自己，我當時係用咩心態去接受阿立嘅分手⋯？如果當初佢講出冇feel要分手嘅說話嘅時候，我去挽留嘅話⋯

係唔係⋯可以順勢咁解開我同佢之間嘅誤會⋯？唔知道，都過咗去啦，冇定論啦⋯

「阿立知唔知？」我好奇咁問咗一句，因為佢男朋友同阿立好似係熟嘅朋友

「應該未知⋯佢應該未同阿瑜講⋯」靖佑緩緩搖頭

「我以為你會嚟攬住我大喊一場。」我微笑道

「唔會啦⋯只係難過想搵人講，心入面係好難受，但眼好痛啦⋯」靖佑擠出微笑，我知道佢只係眼乾眼痛到喊唔出眼淚，「佢嘅離開早就有徵兆，只係我都會為呢段感情感到遺憾⋯」

我安靜咁望住靖佑，佢嘅反應平淡到完全唔係啱啱分手嘅人，佢嘅眼淚都只係一種宣洩感情嘅方式

可能真係好似佢講嘅咁樣，佢嘅離開早有徵兆，但只係當下佢選擇逃避，唔去睇唔去諗，當冇事發生一樣過日子，只係，該嚟嘅都係會嚟⋯





「6年啦⋯咁就6年，我冇諗過我地會分開，冇諗過我地會以「冇feel」嚟結束⋯」靖佑一直捏住手中嘅紙巾，用呢樣嘢嚟分散自己嘅注意力一樣

以冇feel嚟結束，我做咩又會諗起自己⋯？可能因為我當初都冇諗到，我同一直喺我身邊嘅佢會以「冇feel」呢個超爛嘅藉口結束⋯

點解我當時冇及時意識到呢個係藉口⋯？

「冇咩點解，就係冇feel，唔通⋯可以一直一齊咩？」當初阿立講嘅嘢，喺我耳邊迴響

因為我話佢唔重要，佢就心冷落嚟，但我冇發現到佢嘅唔妥，同平時一樣生活⋯

一樣咁偶爾同男同學講兩句；一樣咁偶爾唔記得覆佢機；一樣咁偶爾因為心情唔好而唔出聲，唔同佢分享心事⋯

喺我眼中同平時睇起嚟一樣嘅嘢，喺佢眼中係我唔在乎佢嘅舉動





所以我話，佢係一個狠心嘅人，狠心起嚟，真係咩都講得出，就好似直接拎住利刀，捅喺你嘅心臟

「嗯，有時就係咁殘忍⋯」我將嘴角撐起一個小小嘅幅度，我唔知要點樣安慰佢，我知道佢心入面嘅傷口係滴緊血，「既然佢放棄你，你咪⋯當佢走寶囉～你值得更好唔係咩？」

「我唔捨得，但係我冇得唔放低⋯」靖佑搖搖頭，「分開下囉，都好嘅⋯有時分開先會發現自己嘅諗法⋯」

見到靖佑咁諗，我擔心又安心，但又唔知可以講啲咩⋯我怕佢諗多，又唔想佢諗太多

「你唔好勸我，我好清醒，而且你都係過來人。」靖佑對我笑道，「所以呀～你地一齊番嘅話要請我食飯～」

「好⋯好⋯」我無奈一笑，佢轉移話題嘅方法都好直接

「我今日純粹嚟吐苦水，同埋順便𢱑餐飯。」靖佑苦笑道，「你叫阿瑜記得請我食飯，我幫佢搵到你番嚟。」

我輕皺起眉頭，伸手攬住靖佑：「靖佑呀⋯有咩唔好收喺心，你要搵我講呀⋯唔好自己承受⋯」





「知啦⋯」我感覺到靖佑點頭，但聲線哽咽，明明想喊但又要壓抑住想喊嘅念頭，「我會⋯」

靖佑喺傍晚嘅時候就走咗，佢話要番去執嘢搬番執同爸爸媽媽住

我一個人喺屋企，直至阿立話我知佢收工番嚟啦，我默默咁起身番房換衫

平時都係阿立嚟接我，今日我去接佢一次都唔過分呀～我預咗時間，所以宜家出門口慢慢行去地鐵站就差唔多啦

「阿立～」我見到阿立喺地鐵站行出嚟

「你落咗嚟嘅？」阿立見到我，似乎有啲驚喜我會嚟等佢

「嗯！」我滿臉自豪咁點頭，然後我望到企喺佢隔離嘅一個女仔，應該係女同事





「我同事Ella。」阿立望一望佢隔離嘅女同事，然後向我介紹

我望住佢呢個女同事，冇我咁高，應該矮我少少，而且一睇就係畢業冇幾耐嗰種，另外⋯好似邊度見過⋯？

「你咪係cafe嗰個咖啡師⋯！？」嗰個女同事一眼就認得我，難怪我啱啱覺得佢有啲熟口面，「你地識㗎？」

佢應該係今日喺阿立隔離嘅嗰個女同事⋯？把聲有啲似，我望住佢一個震驚嘅樣

「係呀。」阿立冇半分嘅猶疑就承認咗

「咁你咪一直都知道⋯Mavis想識嗰個咖啡師⋯」佢似乎未震驚完，瞪大眼望住我又轉頭望住阿立

「我知呀～」阿立帶住一副悠然自得嘅表情聳肩，佢擰轉頭就見到未理解狀況嘅我，「Mavis就係一直想識你、攞你IG嗰個，佢係我同事，你應該知？」




IG Link: https://www.instagram.com/nd_cotttoncandy/?hl=zh-tw