【愛情】關於我一覺瞓醒發現喺初戀屋企⋯！: 89. 兩人的日子
「真係。」阿立望住我無法掩蓋嘅笑容都無奈咁笑
「哦。」我忍住笑意收起笑容，緩緩暫一下眼，「好囉。」
「唔滿意？」阿立側住頭望我，眼神裏帶住半點笑意同柔和
「冇。」我搖搖頭，直盯住佢嘅滲出溫柔嘅雙眼，我夾雜住好奇同期待緩緩開口：「如果我地冇再見，咁點算？」
「咁⋯就照生活呀～」阿立思考咗半秒，對我笑道，「可能以後就，搵個啱過日子嘅人一齊？」
「嗯。」我專心聽佢講，點點頭
「不過 ，我地唔係再見咩？」佢見我冇表情，即刻向我解釋
「嗯，不過陣間你會唔會又對我厭啦冇feel啦，唔要我啦？」我認真咁問佢，當初佢就係同一句冇feel同我分手
「只要我對你嚟講係重要，只要你唔講到分手，我都唔分。」阿立伸手捏咗我嘅臉頰一下，有少少痛，但我卻忍唔住嘴角上揚
兩個人之間嘅關係原來可以好簡單，可以只係用一句「你若不離，我定不棄」表達心中所有嘅愛
唔知係唔係人大咗就冇咁大膽？以前十幾歲嘅時候，「中意」同「愛」可以好輕易咁就掛喺嘴角講出嚟，但係宜家廿幾歲，就算明白都唔會特登講出口
係學生時代嘅愛情太熱烈，定係成年人嘅愛情太隱晦？可能因為成熟咗，思考嘅嘢多咗，自然唔中意成日將呢啲口講無憑嘅說話掛喺嘴邊
「就算你想暫時保持住呢個狀態，我都可以，我尊重你一切嘅決定。」阿立認真咁同我講
「嗯，好！」我笑道
⋯
食完嘢沖完涼，我同阿立一齊坐喺廳睇電視
以前因為住得近，有時放咗學都會去對方屋企坐一陣，一齊坐喺梳化睇電視
我地放學嗰個時間番到去，通常都係播緊卡通片，我地其實都麻麻地睇卡通片，但只係因為係同對方一齊睇所以先睇
我地一直坐喺廳，連手機都冇特別拎起睇過，一直睇到電視都要播晚間新聞嘅時候，阿立起身閂電視
客廳只係剩番一盞落地燈，用柔和嘅橙黃燈光照亮大半個廳
「瞓啦，聽日仲要番工。」阿立擰轉身望我，我本來以為佢會朝我伸手示意我起身
「嗯，好啦。」我企起身，坐得太耐，有啲腳痺
行到阿立嘅房門口，我同佢都停低咗落嚟，佢嘅手搭喺門柄上，但都係轉身望我，好似等緊我講啲咩一樣
「我番房瞓啦，晚安。」我微笑道，唔知點解，將呢句說話講出口嘅時候，感覺有啲唔自在嘅感覺，好似有啲咩暗示咁
「晚安。」佢微微點頭，手指喺門上敲咗兩下，「我都番房瞓啦。」
兩個已經講咗晚安嘅人仍然企喺原地唔番房，企喺度唔知等緊啲咩⋯
「好啦，番房瞓啦，盞燈我陣間去閂。」阿立伸手喺我額頭上溫柔咁拍咗一下，但我心入面反而有種莫名嘅失落
「嗯，晚安。」我朝我嘅睡房行去，行到房門口嘅時候，我擰轉頭望一眼
阿立仍然企喺同一位置等緊我番房，我推門入房，開咗床頭燈，然後閂門
「我希望我今晚瞓得著⋯」我掀開張被灘低喺床上面，合埋眼打算清空腦袋準備瞓覺
⋯
翌日，我起身嘅時候出面烏雲密佈，天氣報告好似話嚟緊呢幾日都會落雨
陰天真係特別影響人嘅心情，明明今日係星期六，我咁啱今日day off休息，偏偏今日係大陰天
「唉⋯」我望住烏雲嘆氣
梳洗一番之後，我行去廚房收番啲衫，攬住一大堆乾淨又香噴噴嘅衫褲行出廳，坐喺梳化摺衫
「今日有事番一轉公司」我拎起手機先見到阿立今朝早send比我嘅message
其實佢冇同我交帶嘅必要，但呢種交帶反而令人好安心，感覺佢係怕我起身見唔到佢、唔知佢去咗邊
以前仲一齊嘅時候，佢都會自動報備，話我知佢嘅行蹤，唔洗我擔心佢啲咩，我會覺得好窩心
大學嗰陣嘅男朋友都有咁樣報備行蹤，但我反而冇窩心嘅感覺，什至覺得其實佢冇必要同我講得咁清楚⋯
我將啲衫一件一件咁放喺大髀上摺好，耳仔聽住電視播緊嘅劇集，偶爾抬頭望一眼播到邊
「哼哼～哼～哼⋯」我細聲咁哼住劇情播嘅背景音樂，手一直拎住衫摺摺摺
一屋兩人，三餐四季，感覺好似唔錯，雖然我暫時未諗得咁長遠，但係呢種歲月靜好嘅日子，好似又幾溫馨
啲衫我摺到一半，手機忽然間喺度響，呢個時間，靖佑又會打比我嘅⋯？
「喂？」我接咗靖佑嘅電話，「做咩呢個時間點打比我嘅？」
「知珩你，喺唔喺屋企呀⋯？」靖佑帶住哭腔問我
「我喺呀⋯做咩事呀？」我輕皺起眉頭，有啲擔心佢
「我，可唔可以，過嚟搵你呀⋯？」靖佑喊到講嘢都斷斷續續
「但阿立唔喺屋企，我問一問佢先，我轉頭call你啦。」「嗯⋯！」
感覺靖佑好似又同男朋友嗌交，仲係大嘈嗰種嗌交⋯靖佑好少喊到咁，平時佢都幾開朗，所以我估都八九不離十係咁⋯
我即刻打電話比阿立，響咗兩聲就接通咗：「喂？」
「阿立，唔⋯靖佑話想上嚟搵我，得唔得？」我都唔敢慢吞吞，怕阻到佢做嘢，「佢喊得好勁⋯可唔可以比佢上嚟？」
「哦好呀。」阿立爽快就答應咗
「嗯！咁我唔阻你做嘢啦～」我見佢答應，心入面鬆一口氣，我都怕佢會唔比
「好～今晚你想食咩？」我聽到佢輕笑嘅聲音
「我晏啲答你。」我笑一笑，然後遲疑咁開口：「但⋯你幾點番嚟呀⋯？」
「盡快，執埋少少嘢，今日有啲緊急嘢，但應該唔會太夜番。」阿立耐心咁解釋
「阿瑜！呢個點算？」「得，嚟。」
我聽到電話入面傳嚟女仔嘅聲，似乎係佢嘅同事，我都唔想再阻佢太耐：「你快啲番去做嘢啦～同事都叫你啦～」
「嗯，我收工同你講。」啱啱答同事嘅時候佢嘅語氣都好似冇咩感情，但一轉番嚟我度嘅時候，語氣又變得好溫柔
IG Link: https://www.instagram.com/nd_cotttoncandy/?hl=zh-tw