【愛情】關於我一覺瞓醒發現喺初戀屋企⋯！: 109. 內在意思
翌日朝早
「早晨呀～」趙梓穎推開課室嘅門，行到我隔離就坐低，「得你嘅？」
「佢地去咗7仔買嘢飲。」我望佢一眼之後又耷低頭睇手機
「睇咩睇到你咁專心？」趙梓穎邊將iPad拎出嚟邊望我問道
「冇呀，咩都睇下咋。」我搖搖頭，繼續睇我嘅IG
「琴日嗰個女仔係唔係上次我地打邊爐撞到嗰個？」趙梓穎問我嘅時候，我下意識微微抬一下頭
「哦，係呀。」我點點頭
「你地本來就識㗎啦？」趙梓穎追問道
「唔係呀，有common friend，我同事同佢係朋友，然後就識咗。」我回答，下一秒就望向門口：「阿銘佢地買咩買咁耐？」
「哦～見你地好似好熟～」趙梓穎同我一齊望向門口，喺收回視線嘅時候我地對望咗一眼，「佢應該係出咗嚟做嘢啦？睇起嚟好大姐姐feel～」
「我同佢有時會約出去食飯，佢好似都係喺⋯附近番工？好似係。」我稍微咁思考一下，「都係大我地少少。」
「你暗戀人呀？」趙梓穎喺靜咗兩秒之後拋出一個嚟得好突然嘅問題
「吓⋯？」我望向佢，一時間唔知要答咩好，「你估下？」
「你中意姐姐類㗎？」趙梓穎一臉愕然咁望住我，下一秒收起愕然嘅表情，笑住用手肘撞我兩下，「估唔到喎～」
「咩呀⋯」我無奈咁望佢一眼，「你理得我啫。」
趙梓穎安靜咁望住我，好似一時之間唔知道要講啲咩去接我呢句，我坐喺度繼續睇手機，冇特登去留意趙梓穎嘅反應
「好奇下朋友嘅嘢嘛～都好正常啫⋯」趙梓穎扁起嘴，好似有啲委屈
「咁中唔中意唔係由單一樣嘢決定。」我講道，「你想食花生就想食花生啦。」
「我鬼係！」趙梓穎諗都冇諗就否認，然後強調：「關心！係關心！」
「好好好，係關心⋯」我都唔想同佢拗，佢話係關心就係關心
「所以呢⋯？」趙梓穎有啲緊張咁握緊拳頭，「所以你係唔係中意佢呀？」
「咪叫你估。」我唔想講，講嚟冇咩意思，至少我覺得係咁
「你細細聲講我聽呀～我唔同佢地講！」佢捉住我嘅手腕，又朝我嘅位置坐近咗啲又湊近咗啲
「唔想講你聽。」我托住下巴，成個人向左傾過去，拉開同趙梓穎之間嘅距離
我同佢係朋友，但係呢個距離，太近啦，過咗朋友之間嘅適當距離
⋯
「你今日搭呢條線嘅？」我望住企喺我隔離嘅趙梓穎，「去邊？」
「今日約咗人～所以行呢邊～」趙梓穎嘅心情好靚，講嘢嘅時候語氣都係抑揚頓挫
我微微點頭，喺車開嘅時候，趙梓穎因為掂唔到又冇位捉扶手所以拉住我個袋，我反而企得好穩，因為扶手就喺我隔離
「卓思齊你睇下呢個，好好笑！」趙梓穎拉一拉我嘅衫角，我微微耷低頭睇
列車一停嘅時候，趙梓穎好明顯好用力咁捉住我件衫，我都可以感覺到佢扯咗我一下
「企唔穩企唔穩⋯！」佢好快咁鬆開手，然後一手捉住我手肘，「唔好意思⋯」
我由得佢捉住我，咁佢捉唔到扶手又好難企穩嘅；我望佢一眼想睇下佢企穩未嘅時候，佢嘅目光落喺行入車廂嘅人身上
本來佢臉上掛住嘅微笑慢慢收起，我好自然咁就沿住佢嘅視線望過去，見到浩宜
不過睇緊手機嘅浩宜好似冇見到我，但因為佢後面仲有人上車，佢就向我面前嘅空位行入嚟，企到喺我面前
「周浩宜。」我低聲叫咗佢一聲
佢隨即愣咗一下，然後抬起頭，目光同我對上，我感覺我嘅嘴角已經要忍唔住上揚起嚟，我抿住唇將笑意壓番落去
「又會咁啱又見到你嘅？」浩宜將佢嘅耳機除咗一邊落嚟，對我一笑
「你今日咁準時收工嘅？」我望一望時間，又真係幾準時
「快做完啲嘢就梗係走啦～」浩宜笑道，佢嘅目光落喺我身旁嘅趙梓穎身上，然後禮貌咁打招呼：「嗨～」
「嗨，又見你啦～」趙梓穎微笑點頭，我感覺到佢捉住我手肘嘅力量好似增強咗啲
忽然我都覺得自己心情好好，又可以見到浩宜；我已經好耐冇試過呢種感覺，好刺激又好緊張，會有種期待嘅感覺喺心入面
列車駛出嘅時候，浩宜因為身後冇扶手而且又著住高踭鞋，即刻就向右邊跌兩步
「小心小心⋯！」我見佢成個人都唔太穩，即刻就伸手扶住佢嘅前臂
「唔該。」浩宜笑道，然後伸手捉住喺我同佢之間嘅三角扶手，「我著咗高踭鞋就同你冇差好多，都就嚟同你平視。」
我耷低頭望一望佢腳上著住嘅黑色高踭鞋，再抬頭望一望佢，一抬起頭就可以同佢對望，忽然覺得我都冇好高⋯
「突然間就覺得自己唔高啦⋯」我挺一挺直腰企好，試圖令自己睇起嚟好啲，「明明我都成180⋯」
「咁我本來都唔係同你差好遠。」浩宜笑道，「幾好呀，你唔洗耷低頭望我。」
「我呢個身高慣咗耷低頭望人。」我開玩笑道
「我覺得你串我⋯」趙梓穎突然講道
「我冇呀，係事實嚟。」我耷低頭望趙梓穎
其實趙梓穎唔係真係好矮，我諗佢同浩宜可能差唔多高？但佢著平底鞋，所以睇起唔先冇浩宜高
「我都冇好矮！」「但你都冇我咁高。」
「咁你係男仔嘛！」趙梓穎反駁道
「你到站啦。」我望一眼站牌對趙梓穎道
「我知呀，你唔洗特登提我。」趙梓穎鬆開捉住我嘅手，然後喺人群中穿插行到車門前
喺車門打開嘅時候，趙梓穎喺落車前回頭望一望我，我對佢揮揮手講拜拜，佢用口型講咗句「拜拜」就落車
浩宜回頭望住趙梓穎嘅身影，然後默默咁收回視線，望住我輕輕一笑，我唔理解佢呢個笑容嘅意思⋯
IG Link: https://www.instagram.com/nd_cotttoncandy/?hl=zh-tw