【愛情】關於我一覺瞓醒發現喺初戀屋企⋯！: 110. 是婉拒吧

「喂？Ivan？」浩宜聽咗個電話，佢嘅語氣聽起嚟應該係同緊同事講嘢，「我收工就走咗啦，唔啦，今日就落吧啦，好攰⋯嗯，好啦，下次啦。」

「同事？」我喺佢收線之後好奇咁問

「係呀，之前成日一齊去吧飲嘢，不過最近太忙太攰啦⋯放工都想即刻番屋企⋯」浩宜將手機收起，「所以最近都冇去飲嘢⋯」

「又要飲到醉晒番嚟？」我不禁一笑，諗起第二次見佢嘅時候，大概就係咁樣嘅情況，「唔係次次都咁好彩遇到我呢啲好人㗎～」

「兜個圈讚自己？」浩宜輕笑一聲，「我只係咁啱嗰次飲醉咗啫～撞到嘅係你又真係我好彩嘅～」





浩宜提起嗰次，我就忍唔住面紅耳熱咁避開佢嘅視線；浩宜好快就察覺到我避緊佢嘅視線，佢行過少少去到我一定可以望到佢嘅位置側一側頭望我

「諗咩呀？」浩宜問我，但佢望我嘅表情連同嘴角上揚嘅弧度睇起嚟，佢係因為覺得有趣所以明知故問

「冇、冇呀！」我連忙搖頭，想收起我嘅想法，唔想比佢睇穿我嘅心思，「咩都冇諗！」

「哦～」浩宜抿住唇忍住笑意點頭

我望住浩宜，諗起啱啱浩宜聽嘅電話，如果佢會同其他男嘅一齊去酒吧飲酒，佢會唔會曾經都因為醉意錫過其他人？





咁有魅力嘅一個人，應該冇人可以抵擋得住⋯就算佢錫過其他人，都唔喺我可以管轄嘅範圍內⋯

喺落車之後，我同佢一齊行，打算先行到佢屋企樓下將佢送番去

「聽知珩講你平時都係住宿舍，但好似成日都喺呢邊見到你。」浩宜喺路上提起，我突然覺得原來佢都有留意我嘅事

「宜家多咗想番嚟呢邊，番屋企瞓⋯」我好隱晦咁表達我真正想講嘅意思，我又偷望佢一眼想睇下佢咩反應

「番屋企⋯番屋企都好呀～又有住家飯食～」浩宜抬頭望向我笑道，「趁仲可以食住家飯仲唔多啲番去食？仲成日約我食飯！」





「約你食飯唔好咩？熟啲唔好咩？」我用我清澈明亮嘅雙眼望住佢，「你唔想同我熟呀？你唔中意我？」

「中意呀，靚仔我都中意。」浩宜定睛望住我嘅時候，我忽然間好緊張，佢果然都係估到我嘅小心思，「我好花心㗎～見一個中意一個～」

「咁一定有人會令你專一嘅⋯」我聽得出佢嘅句子背後嘅婉拒

「我慣咗自由啦～唔中意比人束縛住，拍拖太麻煩啦，要顧慮太多嘢；我呢個年紀講拍拖，個個都要問係唔係朝結婚去，但可惜我貪玩，唔想諗咁長遠嘅事。」浩宜輕嘆一口氣，講緊嘅係佢嘅戀愛觀、價值觀，仲係拒絕嘅原因，「自由慣就唔想拍拖⋯」

佢嘅語氣冇咗平時嘅從容，好輕易咁就比我感覺到佢係認真咁婉拒⋯我嘅心情就一下落到底，中意一個人真係好麻煩，心情會自動咁跟住佢走⋯

「我一般，都會叫人唔好等我，因為等唔到。」浩宜認真咁望住我，果然係要拒絕，「唔好浪費太多嘅時間喺我身上。」

但咁樣都太奸矛，唔講到明嘅拒絕先最殘忍，留少少空間比你一直猜測，令你以為自己仲有少許嘅機會，佢自己就進可攻退可守

佢望住我嘅眼神無比認真，但係我冇一絲動搖，我嘅決心似乎好明顯，原來都只係一場攻防戰⋯





「嗯，好。」我冇逆佢意，點一點頭道：「咁你早啲番去休息啦～」

「嗯，好呀⋯」佢似乎對我嘅爽快有啲意外，可能以前追佢嘅人都係咁樣死纏爛打，所以佢以為我都會咁樣

自從呢一日我答應咗佢嘅婉拒之後，我同佢大概兩個幾星期冇再聯絡，直到今日放工⋯

「咁我走先啦～」知珩執好晒所有嘢之後就走

我望住知珩推開cafe門，佢男朋友就喺門外等佢，知珩每次見到佢男朋友嘅時候，所有幸福感都寫晒喺面上，可能又因為佢男朋友好錫佢啦

聽講佢地係以前嘅同學，知珩提起佢嘅時候都係笑容滿面，旁人都可以感覺到佢同呢個人一齊好幸福

我有時都會覺得，知珩嘅愛情係好多人都想要嘅愛情，有足夠嘅愛、足夠嘅安全感、足夠嘅快樂同幸福，有時都會有啲羨慕⋯





我做好晒所有手尾就行出cafe行去車站，今日打算番去宿舍，最近我都係喺宿舍瞓，回歸到以前一樣嘅習慣

我聽住歌行到月台等車，習慣性咁望下周圍嘅人嘅時候，偶然見到浩宜嘅身影

「要唔要行過去打招呼⋯？」我忽然間有啲猶疑不決，雙腳痴喺原地唔郁

喺我正想踏出一步行過去嘅時候，我忽然見到佢擰轉頭望向企喺佢身後嘅男人，對方先然就向前走近佢，企喺佢嘅身邊

佢地講緊咩呢？有講有笑咁樣⋯係唔係上次約浩宜去飲嘢嗰個同事？定呢個係另一個男同事？定佢係滿足浩宜嘅新鮮感嘅對象⋯？

一堆雜亂嘅情緒湧上心頭，妒忌？羨慕？不安？喺見到佢地有講有笑嘅時候，我嘅心情忽然變得好沉重

我好想將視線移開，唔想再望多兩秒令自己難受多兩秒⋯但係目光移唔開，強制我去再望多兩秒

唔知係唔係佢感覺到有人望住佢，浩宜望向我呢邊嘅時候正好望到我，喺視線對上嘅時候，我嘅內心係熾熱，但我選擇咗忍耐





佢對我側側頭，微微一笑，就好似平時一樣，但我只係將嘴角拉起一個弧度，然後微微點一下頭，默默咁將視線收回

我唔知點解我要一直忍耐，將所有嘅感情同熱情都要收起，好似表明咗我對佢嘅心意所以喺佢婉拒後，自動拉遠距離一樣

明明中意一個人係冇錯，但點解我要按捺所有嘅情緒，連同心動一齊壓抑落去⋯？

「叮咚～叮咚～」喺兩聲提示聲後，車門打開，我當咩事都冇發生一樣行上車

到站之後嘅我直接行出去地鐵站，抑壓住想擰轉頭望嘅衝動行樓梯離開，我一直行一直行，直到行到去斑馬線前面等轉燈

「卓思齊。」我嘅餘光見到有人企喺我身旁探頭望我，我默默咁深呼吸一口氣

「嗨。」我平靜咁對浩宜打招呼，淡然咁望一望佢，表現到好似我冇動過心一樣





「好耐冇見。」浩宜嘅微笑顯得佢完全當冇事發生，呢兩星期好似只有我在意一樣

「嗯，好耐冇見。」我微微點頭，我同佢之間只有一條細細嘅縫作為我地之間嘅距離




IG Link: https://www.instagram.com/nd_cotttoncandy/?hl=zh-tw