【愛情】關於我一覺瞓醒發現喺初戀屋企⋯！: 119. 機會到了
「因為冇辦法。」我冇用太多時間去思考問題嘅答案，而係直接開口講答案
呢啲事我可以明白、可以理解，感情可以係一個人、單向嘅事，亦可以變成兩個人之間雙向嘅事，同時唔係我可以控制嘅事
「你唔中意我呢件事，我已經明白，既然我冇辦法咁樣就當冇事發生，咁我只可以同你保持距離。」我轉頭望向佢嘅時候，佢同時轉過嚟望向我，我同佢嘅視線咁啱就對上咗，「我唔想你討厭我。」
「冇，冇討厭你。」浩宜輕輕搖頭
「嗯，咁就可以啦。」我點點頭，苦笑道，「以後，可以繼續係朋友。」
如果話我喺再一次被拒絕嘅時候唔難過，我一定係講緊大話⋯明明心揪住痛，但都要微笑，感覺更難受⋯
吹過嘅風忽然變得好涼，都可以聽到樹葉磨擦嘅沙沙聲；步伐變得好沉重，行起上嚟好似拖住個大鐵球一樣；心都變到好重，可能因為太多感情壓抑住⋯
我冇辦法忘記嗰一日喺火鍋店見到佢，係我第一次見到佢；我同知珩打招呼嘅時候，佢擰轉頭望我，同佢對上眼嗰一刻，我個腦都空白咗，喺回神嘅時候已經發現心跳嘅節奏完全亂晒⋯
「我唔會勉強你，只要你唔討厭我，我已經好滿足。」我強制自己將嘴角撐起，不過我講嘅都係事實
「朋友呀⋯做朋友滿足啦？」浩宜輕嘆一口氣之後，問咗一個已經有答案嘅問題
我點可能真係做朋友就滿足⋯？點可能？我話做朋友都滿足，只係因為佢對我冇嗰種想法，所以我先逼於無奈咁講
「嗯⋯都係嘅⋯」我低頭望住地上被拉長嘅影子，心入面忍唔住感慨，「都滿足⋯」
不知不覺又行到佢樓下，咁樣又過咗一日⋯都算係最後嘅結果？
「我到啦，你都早啲番去。」浩宜停低落嚟，我知道，呢個係最後嘅答案
「好，你都早啲休息。」我點點頭，都算係承認呢個結果
不過算啦，本來一見鍾情嘅嘢，都唔會有結果，可以仍然係朋友，我都—
「我會好好考慮，拜拜。」浩宜好快咁講完就頭也不回咁行去大堂
啱啱⋯啱啱佢講咩？拜拜之前嗰句⋯佢話「會好好考慮」係唔係？我冇聽錯係唔係？佢係話會考慮我係唔係？
「拜拜！」我喺佢伸手準備推門之前嘅一刻對佢大嗌道
佢擰轉頭對我回眸一笑，佢係唔係知道我對佢嘅笑容冇抵抗力？我諗嚟到我嘅21歲，有三件事會令我心跳加速：上堂比Miss阿sir叫我答問題、行樓梯差錯腳、浩宜對我笑嘅時候
以前聽到中意嘅人嘅答覆嘅時候，我都冇試過咁激動，一切好似好唔真實，好似輕飄飄嘅泡泡一戳即破，會因為激動所以有止唔住心動，會因為緊張所以一直手震
「Yes！」喺浩宜行咗入大堂之後，我忍唔住握緊拳頭、壓抑住聲線嗌咗一聲
雖然唔太肯定最後浩宜嘅答案會係啲咩，但我真係覺得係我意料之外嘅事，我覺得今日嘅收穫唔錯
早喺我喺落車嘅時候，餘光就已經見到佢，亦知道佢望到我行喺佢前面，所以我特登將腳步放慢咗
本來唔應該期望太多嘅事，我都係忍唔住去期待，想再比多個希望自己
今日呢個結果，我覺得係值得我叫自己去繼續等待，真心真係會有人感受到
希望佢最後考慮完之後，結果會係我一直期待嘅咁樣
⋯
今日係晏晝堂，雖然仲有10分鐘就遲到，但我完全唔急住要番學校，因為阿sir應該冇咁早到
平時佢都係遲10分鐘先到，行入嚟嘅時候仲悠悠閒咁飲咖啡，我踩點到都唔緊要
「卓思齊！」我戴住耳機都可以聽到有人叫我，喺我想擰轉頭之際，佢已經跑到我隔離，「仲唔行快啲？遲到啦！」
趙梓穎，最近番學成日都見到佢，唔知係我以前都冇留意定點樣，可能佢平時都係呢個時間番學
「阿sir都冇咁早㗎啦，踩點到唔怕啦。」我跑平靜同佢嘅著急形成咗好明顯嘅對比
「作為學生，早到係你應該做嘅事。」趙梓穎仲好意思理直氣壯咁講
「係咩？咁你仲唔跑番去？」我反問佢，指一指前面冇人擋住嘅路
「你都未跑番去。」佢嘅視線沿住我嘅手所指嘅方向望，然後去收回視線望我
「你又唔係我，我地又唔一樣。」我無奈咁垂低手，「你可以跑番去先。」
「唔洗，既然你話踩點都唔緊要。」佢笑一笑，「咁我都踩點啦，當陪你啦。」
「唔洗陪我都可以。」我低頭望手機
「你睇緊咩呀？」佢又問我，佢行咗過嚟之後，個口都冇停過
「IG。」我簡單咁回答，最主要係唔想再講咁多嘢
有時我都覺得佢幾煩，唔係討厭佢，只係有時覺得佢管太多⋯不過大家係朋友，又會成日見到，所以都唔係幾好意思開口講，免得大家尷尬
「係呢～你⋯同嗰個女仔點呀？琴晚食刨冰見到嗰個。」佢忽然提起浩宜，總覺得佢提得唔係幾合時候
「冇點呀，都係咁。」我敷衍咁答咗就算，唔想講太多比佢知
「人地琴晚見你行去打招呼都唔理你，係唔係你太冷淡激嬲人呀？定係人地見到我地一齊食嘢誤會咗你啦？」趙梓穎探頭望我，「你咁樣點追人呀？快啲氹番人啦～」
「你估人地係你呢啲妹妹仔咩⋯會唔會咁無聊亂估亂諗？」我忍唔住就反咗個白眼，不過我冇將趙梓穎講嘅嘢放喺心
「女仔都係咁㗎啦～除非唔中意，先會唔在乎㗎啫～」趙梓穎拍一拍我膊頭，「人地唔中意你，你咪轉target囉～」
佢點解一朝早就可以咁多嘢講，講極都講唔完⋯？佢自己都單身，到底有咩資格話我⋯？
算啦，唔同佢計較，反正我都係等緊浩宜考慮清楚，然後比答覆我
「你有冇聽我講嘢㗎？」趙梓穎見我冇反應，輕輕推咗我一下
「冇。」我亦如實相告
「唔聽女朋友講嘢係死罪嚟⋯！」趙梓穎可能估唔到我會咁坦白咁答佢，瞪大眼望住我
「你又唔係我女朋友。」我呢刻更誠實
平時好少會咁樣講嘢，但佢今日太多嘢講，管太多啦⋯
「係、係啫⋯！咁你會識女朋友㗎嘛⋯！」趙梓穎好自然咁伸手捉住我嘅手臂
IG Link: https://www.instagram.com/nd_cotttoncandy/?hl=zh-tw