【愛情】關於我一覺瞓醒發現喺初戀屋企⋯！: 120. 身同感受
「好熱呀，唔好捉住我⋯」我輕皺起眉頭、縮起手
「等你早啲習慣下⋯！」佢愣咗一下然後縮手，「好心咋～就算呢個唔中意你，你搵定下一個嘛～」
「搵邊個？你呀？」我無奈笑問道，「你中意我咩？」
佢忽然靜咗落嚟，我悄然望佢一眼，面紅但又怕比我睇穿佢真實想法嘅表情⋯
其實我應該一早就肯定佢係，不過我唔想追求真相係咩，按佢呢個性格，中意一個人太明顯⋯
「咁你又唔係中意我⋯」打賭一樣嘅說話，明明知道答案，但都想賭一鋪，想搏一次
「嗯，所以如果係嘅話建議放棄。」我敷衍咁答佢，餘光見到佢有啲受傷嘅表情，笑容都僵住咗
原來講出叫人放棄嘅說話係咁簡單，只係因為佢唔係我所思所想嘅人；我唔會覺得傷害到人，但對方會確確實實咁受傷⋯
「你就⋯唔會比個機會，其他人⋯？」佢婉轉咁表達佢想要嘅機會，人嘅私心喺感情面前真係會表露無遺，「陣間人地唔接受你都唔洗太傷心嘛⋯」
「我唔搵後備。」我喺心入面反咗個白眼，我唔係嗰種喺感情上會為自己搵定後路嘅人
我望向佢嘅時候，佢定睛望住我，眼神裏有少少失望
字裏行間，我冇講一個「我拒絕」，佢亦冇講一個「中意你」，但係表情變化已經代替咗講出口嘅文字
「嗯，好囉！」佢表現得若無其事咁伸手撞我一下，「咁，祝你成功啦！」
「哦，好呀。」我點一點頭，「我會成功。」
「呃，我⋯去一轉7仔買樽咖啡，轉頭先番去⋯！」趙梓穎講完之後就匆匆忙忙咁跑走，但佢手上明明拎住咗一樽咖啡
⋯
「喂，你地有冇睇到？趙梓穎今日好奇怪。」阿銘忽然間喺食飯食到一半嘅時候提起
「趙梓穎？今日見佢番嚟嘅時候都好似眼紅紅咁。」思淼附和道
作為當事人之一嘅我選擇咗沉默，我都冇得再講啲咩，因為我大概係嗰個令佢眼紅紅咁番嚟嘅元兇
「佢有冇同你講啲咩？」思淼傾向我呢邊坐，八卦八到落我度
「冇。」我若無其事咁回答，然後繼續邊食飯邊睇手機
咁啱見到浩宜po咗story，我當然會第一時間就睇浩宜嘅近況，佢影住枱上嘅咖啡杯，我認得杯上嘅logo係我番工嘅cafe，不過佢應該買外賣番公司
「今日又去探知珩？」我reply咗佢嘅story，帶住私心同想見到嘅答案問出呢個問題
喺佢有時間睇手機之前，我又一次㩒入去佢嘅IG profile，睇佢之前po出嚟嘅相，佢大概係對於分享自己嘅美貌毫不掩飾嘅類型，連泳衣相都有，不過我唔敢望太耐⋯
一見鍾情，喺見到佢嘅第一眼，唔係見色起意，而係比佢嘅獨有氣質一下刺中心動嘅機關
如果我喺另一日遇見佢，我會唔會都係一樣一見鍾情？
命運係注定，所以注定我會喺望到佢嘅第一眼就心動，無論係今日、聽日、後日見到佢都好，我都一樣會心動，一樣會行到宜家呢一個過程
「只係順便探佢，忽然好想飲你地cafe嘅咖啡」浩宜回覆我
順便探佢，一個咁簡單明瞭嘅短句都可以令我忍唔住幻想，佢會唔會都係想睇下我喺唔喺cafe？佢會唔會都想見到我？
「哎⋯！」我自己咁樣諗完都覺得難為情，只好耷低頭摸一摸後頸分散注意力
「做咩？」阿銘問我
「冇。」我即刻坐番好，就好似冇事發生一樣繼續食飯
「一個二個都奇奇怪怪咁⋯」阿銘搖搖頭，「趙梓穎係咁你又係咁⋯」
「早知要比你話我奇怪，我今日落咗堂就去番工啦⋯」我不禁慨嘆，我番咗工嘅話就有機會見到浩宜
「宜家番囉～」思淼笑道
「太遲啦⋯」我搖搖頭，拎起手機po咗個同佢地食緊飯嘅story，「可惜可惜⋯」
「有咩可惜呀？唔通你想見邊個？」阿銘聽到我低聲嘅慨嘆，「你之前唔係話你地cafe個咖啡師好靚女㗎咩？想見嗰個係佢？」
「痴咩線，人地有男朋友㗎⋯」我無奈咁講
我想見嗰個係靚女咖啡師嘅朋友，唔係咖啡師本人⋯今日錯失咗一個見浩宜嘅機會，唉～早知番工啦！
⋯
「兩杯都去3號枱。」知珩將啱啱沖好嘅咖啡放喺出單處
「好。」我放低手上嘅抹枱布，轉身行去水吧拎起咖啡
「嗨～」「嗨。」
坐喺3號枱嗰兩個女仔喺我行到過去嘅時候好熱情咁同我打招呼，我即刻禮貌咁微笑回答
「之前見過你好多次㗎啦，不過你應該唔認得我地。」留咗個大波浪髮型嘅女仔笑道
「真係⋯唔太認到。」我笑道
「唔係成日見到你嘅？」另一個短頭髮嘅女仔問我
「我唔係成日番工。」我想快啲逃離呢個位置，早半秒就已經擰轉身準備走
「你有冇IG呀？可唔可以抄你牌？」留咗個大波浪髮型嘅女仔急不及待開口問
「呃—」「卓卓，幫我去執呢份。」
救命恩人⋯！阿逸喺呢個尷尬嘅時候叫咗我一聲，叫我去幫佢出甜品，比咗個藉口我走人
「哦！宜家嚟！」我都急不及待咁回答同轉身走
我行到阿逸面前嘅時候，佢將幾張單塞入我手
「多謝你呀救命恩人⋯！」我鬆一口氣咁拎起單睇
「只係咁啱，你想比嘅話比埋先都唔緊要。」阿逸真係講笑咁講
「唔係！我冇想！」我拎住嗰幾張單快步行去水吧，「做嘢緊要！」
IG Link: https://www.instagram.com/nd_cotttoncandy/?hl=zh-tw