【愛情】關於我一覺瞓醒發現喺初戀屋企⋯！: 123. 下一次
「哦⋯係呀⋯」我心虛咁緩緩點頭，餘光見到浩宜悠悠閒咁托住下巴望住知珩
「上次你咁啱忙緊，今次唔忙啦掛？」隨住佢呢句說話講出口，我嘅不安感直線上升，「可以比我抄牌啦掛～」
浩宜仲喺隔離呀！你當住佢面話要抄我牌咩事呀？唔洗知珩講，浩宜親眼見到啦⋯我宜家又心慌又心虛，陣間浩宜以為我係見一個中意一個嗰種人點算呀⋯！
唔係呀，我唔係啲三心兩意嘅人嚟㗎⋯！
「呃⋯」我心虛到覺得喉嚨都有啲乾，大腦高速轉動思考要答啲咩先啱
「你有女朋友咩？」佢喺呢個時候忽然問道，「冇嘅話識多個朋友都唔緊要啦～」
「咁又唔係⋯」我耷低頭拎住枱布分散下自己嘅注意力
「咁咪得囉～」嗰個女仔即刻拎起手機，攞出已經準備好、一定要抄到牌嘅氣勢
我偷偷地望向浩宜，想睇下佢咩反應，結果佢拎起一塊圓形嘅化妝鏡，對住鏡搽唇膏
我咁樣比個IG人，應該真係誤會大了⋯浩宜對我仲係考慮階段，咁樣嘅話我嘅評價會下降⋯
「快啲啦～比個IG都諗咁耐，又唔係有女朋友⋯」嗰個女仔低聲抱怨起嚟
浩宜喺將唇膏用單手擰番落去同時，抬眼望住我，皮笑肉不笑咁望住我嘅眼神同表情，完全就係講緊：「你比嘅話，可以唔洗考慮啦～」
「嗱，打名啦～」嗰個女仔將手機遞比我
我下意識就伸手去接，浩宜望住我一個一個字咁打落去對方嘅手機，喺我將手機物歸原主嘅時候，佢手機嘅頁面係我鎖咗嘅IG profile
「你個account private嘅？」嗰個女仔有啲不悅咁望住手機嘅螢幕，「記得confirm我嘅request啦～」
「我⋯冇帶手機喺身⋯」我移開視線，然後轉身行開，手機冇帶喺身當然係謊言
「037。」知珩呢個時候嗌咗一聲，嗰個女仔即刻行去拎佢嘅咖啡外賣
知珩明明一早就沖完，咁遲先嗌佢拎唔係想睇埋好戲先比佢拎走咩？點解要咁對我呀⋯！？
「拜拜啦～」嗰個女仔拎住咖啡走嘅時候，仲要笑住同我講拜拜
「叮鈴鈴鈴～」
「知珩，我走啦。」浩宜望咗我一眼，然後拎起手袋起身
「哦好呀～」知珩笑一笑，微微點頭
「拜拜啦～」浩宜都唔知係特登定點樣，用同啱啱嗰個女仔一樣嘅語氣嚟同我講拜拜
「拜拜⋯」我有啲慌張，算啦，都唔係有啲啦
「叮鈴鈴鈴～」
「知珩姐呀⋯」我喺門閂上之後，即刻哀怨咁行去搵知珩
「做咩呀？」知珩抿住唇，一副想笑但又唔可以笑出嚟嘅樣，「幾好呀，幾受歡迎呀。」
「係呢個問題咩？你有冇睇到浩宜個表情？死啦點算呀⋯！」我捉住知珩嘅手肘慾哭無淚咁訴苦
「人有適當嘅危機感係好事嚟。」知珩認真咁講，「你唔洗咁擔心啦。」
「我唔擔心就假啦⋯」我無奈咁講
⋯
「所以，你今日做咩約我食飯？」浩宜托住下巴，垂眸望住我倒喺佢杯入面嘅水
「耐冇約你食飯⋯」我小心翼翼咁將裝滿水嘅玻璃樽放喺枱上
「原來你都幾受歡迎。」浩宜突如其來嘅一句，令我嘅心跳直線上升
「吓？呃⋯都唔係嘅⋯」我個腦都慢半拍，一直拎起水杯飲一啖水然後又放低水杯
「唔係親眼見到都唔知，原來你咁受歡迎～」浩宜笑道，睇起嚟好似唔太在意呢件事一樣，「競爭好大呀～」
「咁又唔係嘅，有女朋友嘅話我會拒絕。」我即刻解釋，我唔想佢有咩誤會
浩宜只係輕輕一笑，都足夠令我嘅目光痴喺佢身上；佢望住我嘅時候，我覺得佢好似諗緊啲咩想講一樣
「你之前拍過幾次拖？」浩宜喺沉默一陣過後問我
「兩次。」我如實作答，兩次都唔算好多
「都係同學？」浩宜微微點頭之後追問
「嗯，都係以前同班同學。」我回答
「你明明點睇都係會中意啲可愛嘅乖乖女，點解會中意我？」浩宜嘅表情睇起嚟係單純咁對呢個問題好奇
點解⋯其實我都唔知點解，一見鍾情嘅嘢本來就係冇得解；同我遇過嘅人完全唔一樣嘅類型，佢從容、有魅力、自信，一個眼神對於要令我心動嚟講係簡單嘅事
「唔係所有嘅中意都可以解釋。」我微微一笑回答，「就係⋯第一眼見到就中意⋯」
浩宜嘅笑容比啱啱燦爛咗啲，我定睛望住佢嘅笑容，點解中意佢⋯我都唔知，但係只要佢喺面前，我唔會望其他人⋯
食完飯之後，我一如既往咁將浩宜送到番到屋企樓下
「下次見～」浩宜騰出一隻手同我揮手講拜拜
「你每次都話下次見，咁邊一次先比答覆我⋯？」我忍唔住好奇，到底佢有冇打算比一個答覆我
「你急住要我嘅答覆咩？」浩宜稍微愣一下，視線移開咗兩秒後又側住頭望住我問，「唔係有好多選擇咩？」
「又唔係個個行過嚟嘅我都中意⋯」我自嘲一樣輕笑一聲
「下次⋯下次再見嘅時候，我再話你知。」浩宜朝我伸出手指尾
我有啲遲疑，佢會唔會只係講嚟氹我？我猶疑咗一陣，都係伸出手指尾將佢嘅尾指輕輕勾住，就算係講大話都好⋯
⋯
最近，又冇再見到浩宜，可以見到佢身影嘅地方只有佢嘅IG story
我有啲懷疑佢係唔係逃避緊我，因為上次佢話咗再見嘅時候比答覆我 ，佢係唔係因為唔想比答覆我，所以連cafe都唔嚟⋯？
諗到呢度就覺得莫名煩躁，佢話會比答覆我，但好似轉個頭就避緊我一樣⋯
IG Link: https://www.instagram.com/nd_cotttoncandy/?hl=zh-tw