【愛情】關於我一覺瞓醒發現喺初戀屋企⋯！: 124. 醉酒
前一段日子發生嘅事我都冇同知珩講，亦冇同任何人講，只有我自己知道自己真係默默咁等待緊嗰個人比一個唔知會唔會有、唔知結果好唔好嘅答覆
我最近睇到浩宜出去玩嘅story嘅時候，我心入面會難受，但係我冇得去管啲咩⋯向來姐姐類嘅都好識得拿捏人心
我好似冇講過我有幾中意佢，但係佢叫我行我就會行，叫我停我就會停，咁樣唔係最明顯咁表達緊我有幾中意佢？
知珩曾經喺某一日放工嘅時候同我講：「唔好問我浩宜打算點，因為我都唔知道；但浩宜揀得比答覆你，即係佢已經深思熟慮諗清楚。」
唉⋯唔諗咁多啦⋯諗咁多都冇用，佢話咗會講就會講㗎啦⋯
我行去地鐵站嗰邊搭車，今日打算直接番屋企，因為我啲嘢其實都已經搬番晒屋企，宿舍嗰邊已經冇太多個人物品，都準備畢業嘅人啦
講起畢業又係另一個另人煩惱嘅地方，我諗緊好唔好搵定一份長工，但我又唔太想離開cafe，我都番咗cafe好一段日子，大家都好好，唔捨得⋯
唔想一畢業就要做社畜咁可憐，我諗可能大概或者都會番住cafe先
「唉～」我企喺車門邊嘅位置莫名嘆氣，耳機入面仲要播緊啲失戀歌
到站之後嘅我拖住腳步行，有種身心都疲倦嘅感覺，明明今日番工都冇好忙，點解會攰到咁樣？完全提唔起勁嗰種
喺上到地面，經過地鐵站隔離間麵包店嘅時候，放喺褲袋嘅手機忽然喺度震，呢個時間邊個打比我？應該唔會係cafe同事啦⋯？
「浩宜⋯？」我有啲不解咁望住來電顯示，之前我拎咗浩宜嘅電話號碼，所以有save低
但浩宜點解會打比我？平時傾計都係用IG，應該唔會要打電話，至少我覺得佢唔係會打電話比我嗰種人
算啦，我都係聽咗先，可能有啲咩緊要事搵我
「喂？喂？」我喂咗一聲之後就忍唔住皺起眉頭，電話對面好嘈，嘈到爆，「喂！？」
「喂！」喺喂咗好幾次之後，終於有人開口大聲喂番過嚟，「聽唔聽到呀！？」
「聽到！」我唔太明點解佢唔可以行去啲靜啲嘅地方講電話，一定要喺嘈到咁嘅環境講嘢咩？
我聽住電話入面嘅嘈吵背景音樂愈嚟愈細聲，睇嚟對方行緊去靜啲嘅位置
「你係浩宜嘅男朋友係唔係？浩宜飲醉咗話要番屋企，但我地仲有下場，你會唔會嚟接佢呀？佢就嚟醉到不省人事啦！」對面嘅女仔好焦急咁講，最後先講一句：「我係佢同事。」
我比佢突然拋出嘅一大堆問題搞到個腦都運作唔嚟，我要答佢咩？佢做咩會問我係唔係浩宜男朋友？浩宜做咩又飲到醉晒？
「你快啲接佢啦！佢唔肯同我地去下場，仲飲到醉晒！」佢同事同我講，「我用浩宜嘅手機send個地址比你呀！」
我都未講啲咩，對面已經收咗線，到底佢班同事係想幫佢定害佢？
先唔講我係唔係佢男朋友，但邊有人會喺有男朋友嘅情況下落club玩，仲要飲到醉晒叫男朋友去接？呢個點睇都唔正確嘅選項
不過萬幸嘅係，我唔係真係浩宜嘅男朋友⋯但係佢地所在嘅位置已經連同GPS一齊send咗過嚟，我喺冇猶疑同冇得揀嘅情況下直接轉身番去地鐵站
我按住佢同事send過嚟嘅地址去到嗰間club嘅門口，一推開門就係又藍又紫嘅燈同震耳欲聾嘅音樂，我即刻皺起眉頭，呢啲地方點解會有人中意嚟，耳膜都就嚟穿
「佢人喺邊？」我自言自語咁四處張望
但周圍都係藍藍紫紫嘅燈，我覺得喺呢啲又多人又暗嘅地方行兩步唔跌親都算係咁，啲光偶爾咁打橫掃過嚟嘅時候真係刺激到眼球
我沿住中間舞池嘅邊行，邊行邊望，佢嘅朋友我都大概認到樣嘅，我一直行到去望最前面嘅舞台比較近嘅位置
其中一個女仔見到我，即刻就伸手捉住伏喺佢隔離嘅女仔搖咗兩下，我認得嗰個女仔係浩宜嘅同事
我加快腳步行過去，浩宜都唔係醉到真係不省人事嘅地步，至少佢都坐到起身，仲可以摸下自己額頭、撥個頭髮
「周浩宜，你男朋友嚟咗接你啦！」佢隔離嘅女仔大聲咁同浩宜講
「嗯⋯」佢有啲迷惘咁望向我，「係喎⋯咁我走啦⋯！」
佢迷迷糊糊咁企起身，行都行得唔穩
「你小心呀小姐！」見佢企唔穩，坐喺佢兩邊嘅同事即刻伸手扶住佢，浩宜行出嚟嘅時候佢地嘅手都冇縮開過
「浩宜嘅袋！」坐喺最左邊嘅女仔伸手一手捉起一個手袋就遞比我
「咁我番去先啦～聽日⋯下星期見⋯！」浩宜行到出嚟行，一手就捉住我嘅手臂，企都企唔穩仲有餘力去講拜拜
「早啲休息啦！」佢啲同事點點頭，「星期一要番工呀！」
「嘻⋯知啦！」浩宜擰轉頭點頭，捉住我就行出去呢個嘈到爆嘅地方
我行喺前面推開門，小心翼翼咁將浩宜拉出嚟，一行到出嚟，佢即刻一手推開我，行到一邊扶住牆嘔
「咳咳⋯！咳咳⋯！」我行到佢身旁拎咗張紙巾比佢，然後再遞咗樽水，「唔該⋯你點解會嚟⋯？」
「你啲同事打電話叫我過嚟接你。」我簡單咁解釋，見佢又要嘔完好似舒服啲之後，我伸手扶住佢，「你到底飲咗幾多會醉到咁？」
「冇數幾多⋯佢地咁都搵到電話⋯」浩宜放慢腳步，可能係為咗等自己每踏出一步之後都可以企得穩
我扶住佢行到的士站，截咗架的士搭番去，佢飲咗咁多酒應該唔太舒服，都冇謂仲搭地鐵番去，搭的士等佢快啲番到去休息仲好
⋯
我將浩宜平安無事咁送到番屋企，閂上大門之後將佢扶到梳化坐低，喺密閉嘅空間入面，高踭鞋嘅鞋踭敲落地面嘅聲音好嘹亮
「你自己一個O唔Okay？」我喺佢坐低喺梳化上之後蹲低喺佢面前問，順便將佢嘅手袋放喺梳化上面
「嗯⋯」浩宜好似比啱啱清醒咗啲，但又未完全清醒晒，拍一拍額頭坐起身
「咁我走啦，你有事再搵我啦。」我講完就起身準備走，我覺得真係有事嘅話佢應該都唔會係搵我，不過我都係順口咁樣講一講
我轉身就走，不過可能因為出於關心所以行咗兩步之後都係回頭望一望佢，見佢好似等緊酒醒，我估佢冇咩事
「同知珩講聲都好，女仔照應會好啲嘅⋯」我拎出手機收回目光再朝門口行
喺我到伸手就可以掂到門鎖嘅時候，我聽到後面傳嚟急速嘅「叩叩」聲，好明顯係高踭鞋嘅聲
IG Link: https://www.instagram.com/nd_cotttoncandy/?hl=zh-tw