【愛情】關於我一覺瞓醒發現喺初戀屋企⋯！: 127. 所期待的未來
再單獨同知珩約出嚟見面，已經係三個月後嘅事，一坐低就比佢窒咗一輪
「仲以為你連我係邊個都唔知添～」知珩一見到我，即刻就要窒我兩句，「耐冇見到都唔認得你啦⋯」
「咩呀⋯宜家我咪坐咗喺你對面囉！係唔係一嚟就要窒我？」我無奈咁將手袋放喺隔離，「咦，你幾時買咗隻新戒指？好閃。」
「哦係呀～阿立送㗎，嚟緊結婚啦嘛～」知珩望一望手上嘅戒指，臉上寫滿幸福
「終於修成正果啦？好事嚟，唔洗你再成日心掛掛。」我笑道
坦白講，見到知珩宜家個幸福樣，我都覺得開心，知珩本來一直都係心心念念緊同一個人，宜家可以行到最後，都算係佢地嘅關係之間一個完美嘅結果
以前成日聽知珩講呢個人有幾好幾好，雖然令佢傷心咗好耐，但都係冇辦法忘記佢
「阿立唔會講大話呃我，佢講咗半年內會求婚就真係會，所以，我一直都信我同佢會行到呢一步。」知珩有啲感慨咁講道，「我喺同番阿立一齊之後，有時都會諗，到底我喺同佢分開之後嘅日子係點過？好似冇咩特別開心嘅事一樣，但同番佢一齊，就覺得所有嘢都係有意義～」
「就算同樣係被愛，唔啱人就係唔啱人，啱人嘅被愛係幸福，唔啱人嘅被愛係無感，我宜家就覺得每一日都好幸福。」
「你睇起嚟，都好似開心咗好多。」
「我？可能啦⋯」我唔太肯定自己係唔係真係同知珩講嘅一樣，變得開心咗，「開心咗都係好事嚟。」
「嚟緊呢～我想搵你做姊妹，得唔得呀？」知珩笑問道，佢明明知道我會答應佢，但佢都要問多次，「我嘅婚禮，你一定要喺度陪住我！如果唔係，我會好不安好緊張！」
「好呀，揀婚紗記得約我，我可以陪你一齊睇婚紗，比少少意見你嘛～」我點點頭
「都啱嘅，你都可以睇定先～」知珩望住我笑，我聽得出佢內裏嘅意思，「睇定款先啦～」
「宜家講會唔會有啲太快呢？」我無奈咁搖搖頭，「唔係個個都好似你咁，拍拖三、四個月就結婚⋯」
「你冇期待過咩？」知珩問我
我拎起枱上嘅玻璃杯，飲一啖水之後搖搖頭：「我唔急，有排。」
卓思齊嚟緊就要畢業，要出嚟做嘢，由一個階段去另一個新階段會有好多新嘅啟發，所以我唔敢講有冇未來呢一回事，未來存在太多變數
我將玻璃杯放低喺枱上面，手仍然輕掂住杯，喺玻璃杯同雲石枱因觸碰而發出輕微嘅「咚」一聲嘅時候，忽然有種愁緒湧出嚟嘅感覺，明明呢杯係水唔係酒⋯
「諗咩呀？」知珩伸手到我面前揮揮，「怕卓思齊唔要你呀？」
「係怕都係佢怕我唔要佢啦係唔係呀⋯？」我無奈咁笑道，下一秒忍唔住輕嘆一口氣，「不過，我都有做好心理準備，如果佢搵到更中意嘅人，我會主動放手⋯」
「你地先一齊咗冇幾耐，你咁快就諗到佢會中意其他人，你會唔會對佢太冇信心呀？」知珩輕皺起眉頭，語氣中都係滿滿嘅不解同疑惑
「我唔係對佢冇信心，只係覺得要豁達啲，如果佢係會中意其他人，我係可以理解。」我認真咁回答
「佢有嫌棄你咩？睇起嚟佢中意你中意到癲就真，佢IG po嘅嘢全部都係你，驚人唔知佢有女朋友咁⋯佢成個心都得你，我唔覺得佢會中意其他人。」知珩托住下巴，手上嘅戒指閃亮閃亮，係令人羨慕嘅象徵
「咁佢又冇嫌棄我。」「咁你點解咁快就要諗分開？」
知珩一問，我就沉默落嚟，思考緊要點樣表達比知珩聽先會顯得自己認真得嚟又豁達
「因為係認真咁考慮好決定同佢一齊，所以先會諗分開嘅話點算，我總唔可以到知道佢中意其他人嘅時候好似小朋友咁要求佢啲咩。」
「當然我唔希望，我同佢會因為中意其他人呢件事而分開，但係如果佢會，我覺得我有心理準備，我會好好接受。」
我有同卓思齊講過呢番說話，當時佢好堅定咁話我知佢唔會，絕對唔會，我心入面係開心
「見到你咁認真，我作為你嘅朋友覺得好感動！」知珩扮抹眼淚，佢都太誇張
「本來就係認真同佢一齊⋯」我有啲無奈，做咩要講到好似我係搵人攝時間一樣，「唔認真就唔會比佢上我屋企啦⋯」
「我冇聽過嘅？」知珩一臉愕然，我的確冇同佢提起過，「幾時嘅事呀？」
「其實都冇咩特別，就係星期五同星期六佢會喺我度瞓。」我聳肩，一臉淡然咁講，但其實都有啲想睇下知珩嘅反應，「就係咁簡單。」
「你地進展咁快嘅～」知珩露出意味深長嘅笑容，「估唔到你會咁快就留人地喺你屋企瞓～」
「大家成年人，呢啲嘢又唔係我逼佢就可以，都要佢肯先得。」我講道
「再講多啲比我聽嘛～發展到邊一步呀？」知珩罕有咁八卦，平時都唔見佢有咁強嘅好奇心
「你幾時咁八卦？」我無奈咁笑問道
「你拍拖喎～我梗係要打聽下啦～」知珩擺出理所當然嘅態度講道，「好少聽到你講呢啲嘢～」
我拍拖呢件事，做咩突然會變成一件新奇嘅事？我會拍拖都唔出奇呀，或者係因為拍咗拖就少咗搵知珩
放喺枱上嘅手機一震，睇嚟卓思齊打完機有時間睇手機覆我啦～我平時都唔會規限佢太多，佢中意做自己嘅嘢就做自己嘅嘢，我唔會要求佢一定要陪我，星期日都算係各自嘅休息日
「番屋企嗰陣同我講」佢仲要加咗一個可憐嘅表情喺後面
我覺得同佢一齊真係幾開心，可以感受到佢嘅全心全意，我隨口嘅一句佢都會記住，我嘅喜好佢都記得
「總之就⋯我有好好咁回應佢嘅真心啦⋯」我只係作出一個簡單嘅回覆，喺知珩面前講唔出啲太肉麻嘅嘢，「你呀，見到你幸福，我都覺得幸福。」
「我都係，宜家有人好好咁愛你，我就放心啦！」知珩有少少感觸，輕抿唇之後點點頭
我同知珩食完飯，由17樓落到地面，一出𨋢已經可以見到知珩嘅男朋友喺外面等佢
「阿立！」知珩連忙急步行過去，急不及待就要番去搵男朋友
知珩唔知道同佢男朋友講咗啲咩，知珩忽然間轉身望向我
「浩宜！下次見！」知珩對我揮揮手，然後佢又跑番嚟我面前，「希望下次聽到你嘅好消息～」
「你打算幾年後先見我？」我無奈咁笑問道，「你快啲番去啦。」
「好啦，我地再約啦。」知珩微微點頭
我同知珩嘅見面日到咗結束嘅時間，我一個人去搭車，喺行出地鐵站嘅一刻，已經見到卓思齊喺度等我
「你都幾快手，咁快就到啦？」我喺見到佢嘅一刻，嘴角已經自動上揚
「一早ready好出嚟啦～」佢笑道，「想見你。」
我定睛凝視住佢，喺想擁抱嘅衝動湧出嚟之前，我已經先一步伸手將佢攬住，可以感覺到佢嘅回擁
「思齊，我希望，我地會一直落去。」我低聲講道
「呢個算唔算你比我最大嘅肯定？」卓思齊笑道，「你唔好唔要我。」
我將雙臂之間嘅空間又收窄咗，我又點會唔要佢呢⋯？
愛情嘅形態好有多種，有人會一早到你身邊，有人會突然出現；有人後知後覺咁出現，有人會喺你狼狽不堪嘅時候出現
有人堅定守候一個人，亦有人會三心兩意，所以早出現同遲出現亦可以有一樣嘅結果
我抬頭望向卓思齊，忽然間好希望佢係啱嘅嗰個人，不過宜家先3個月，來日方長⋯
「番去啦～」我鬆開佢嘅時候，佢主動伸手拖起我嘅手，喺佢面前我永遠係被愛，「今日係星期五，好開心！」
有時愛情嘅本身就係會比驚喜你，令你踏出一步變得勇敢，將一個可能令你意想不到嘅人帶到你身邊
你會堅定咁守候一個人，定係會三心兩意、思前想後？有時候喺想上前但又擔心太多嘅時候，要勇敢啲踏出一步去捉住眼前嘅機會
我希望我嘅未來都會有佢喺我身邊，至於未來嘅故事，我自己都好期待⋯！
<全文完>
故事喺呢度結束啦～
想知道嚟緊出咩故/會唔會有番外篇，記得㩒下面嘅link follow IG！！！
IG Link: https://www.instagram.com/nd_cotttoncandy/?hl=zh-tw