【愛情】關於我一覺瞓醒發現喺初戀屋企⋯！: 126. 親自承認

喺我將簡單嘅早餐放低喺枱上嘅時候，聽到廁所門咔一聲打開

「我唔知你中意食咩，所以就整咗我食開嘅嘢。」我講道

「哦⋯我咩都食⋯」卓思齊猶疑咁行到嚟餐枱前面

「你洗完面都未醒？」我大步行到佢面前，佢下意識向後縮咗一下，「唔舒服啦？」

「唔、唔係⋯！」佢搖搖頭，一大清早就面紅，睇起嚟完全唔似拍過拖





「定係我素顏，你覺得同你想像中有太大落差呀？」我翹埋雙手問，「心碎啦？」

「冇，你都係最靚⋯」佢嘅笑容都有啲僵硬，不過聽起嚟唔似假話

「唔好發呆啦！食嘢先啦！我肚餓啦！」我輕皺起眉頭，佢聽到我話肚餓，佢即刻九秒九拉開櫈比我

我覺得佢有時係幾可愛，可能因為心入面凝住佢係細過我，所以有時佢一個面紅我都覺得好可愛

我其實一啲都唔了解眼前呢個人，但唔知點解會覺得呢個人好有安全感，可能因為之前比前男友騷擾嘅時候佢一直喺度





喺我同佢完全冇聯絡嘅時候，我忽然覺得自己嘅日子過得好沉悶，就算一如既往同朋友同事一齊去酒吧玩，都覺得色彩有啲暗淡⋯

「點解會突然變到咁悶⋯？」我自己都諗唔明白

番屋企嘅時候都會莫名咁諗起有一個好可愛嘅人喺前一排成日搵我，同我食飯又同我食糖水，喺我沉悶嘅日常之中帶嚟咗亮點

拎起手機又放低手機嘅次數愈嚟愈多，明明係我選擇咗推開佢，但到咗佢唔再send message比我嘅時候，唔習慣嗰個係我⋯

「你唔係餓咩？做咩唔食⋯？」佢見我發呆，伸手喺我面前揮一揮





「食呀食呀。」我回過神，一回神就見到佢定睛望住我

我同佢食嘢嘅時候同平時唔一樣，平時一齊食嘢會傾計，今日反而好安靜，但係心境一啲都唔平靜

我著住鬆身嘅居家服，仲要冇化妝，感覺好隨意

「你唔好一直望住我，好尷尬⋯！」卓思齊尷尬咁耷低頭迴避我嘅視線，耳仔都紅晒

「唔望你望邊個？」我笑問

「我嘅意思係你食咗嘢先⋯！」卓思齊將我手邊嘅叉拎起塞到我手中

「你今日洗唔洗番工？」我轉移話題，免得佢一直咁怕醜

「今日⋯唔洗，冇報更。」佢搖搖頭





「咁你今日有咩行程？」我追問

「冇⋯」佢再搖頭

「哦～咁咪可以全日都陪住我囉？」我用開玩笑嘅語氣咁講

「你想嘅話，我可以，不過我要番屋企⋯沖涼⋯」佢仍然有啲難為情

「好呀。」我托住下巴，原來係要番屋企沖涼，「咁我等你轉頭番嚟搵我啦～」

我其實真係冇講笑，係認真叫佢全日陪我，只有我一個人喺屋企嘅時間，忽然希望佢快啲番嚟⋯

好耐冇試過想見一個人，嗰種期待見到對方嘅感覺令我有啲唔自在，好似唔係我自己有嘅感覺一樣，好唔實在⋯





只要心嘅距離足夠近，其實年齡只係一堆冇用嘅數字，但唔知點解我都係會有所憂慮⋯

我當初同佢講我唔想拍拖之類嘅說話嘅時候，我到底諗緊咩⋯？姊弟戀嘅壓力太大，我雖然對自己嘅外表有自信，但都會怕有一日佢會嫌棄我⋯

「唔係啦⋯快啲趁佢番咗去沖涼未番嚟之前，快啲去敷個面膜先⋯！」我即刻從梳化上起身行去廁所，打開鏡櫃拎塊面膜出嚟

我都會怕有人嫌棄我嘅一日，我都覺得咁樣嘅自己好新奇⋯不過好自然會想將自己最靚嘅一面展露比佢睇，呢個唔係好正常嘅事咩？

⋯

卓思齊再番嚟嘅時候，頭上面戴咗頂cap帽，我有啲好奇佢點解要戴住帽上嚟搵我，睇起嚟好似啲明星拍拖唔可以比人知咁樣⋯

佢企喺我屋企門前郁都唔郁，好似我門口有啲咩封住唔比佢入嚟一樣，我踏前一步，伸手捉住佢嘅衫領，因為佢都只係高我半個頭，所以要錫佢嘅話，腳尖唔洗踮得太高

我拉住佢向後退，喺佢行到入嚟我就伸手閂埋門，佢戴住cap帽，我都睇唔清佢嘅表情，我好輕易咁將佢抵喺門上，佢嘅背緊緊貼住木門





「做咩戴cap帽？好驚比人睇到咩？」我用食指將佢嘅帽檐向上頂起，見到佢嘅神情

「洗咗頭，所以就戴帽⋯」佢低聲解釋

佢身上嘅松木香比沐浴露嘅香味覆蓋咗，唔係本來嘅佢嘅味道⋯我中意佢身上嘅清香，可能因為喺酒吧行嚟搭訕嘅男人身上都有陣刺鼻嘅濃烈古龍水味，反而突顯咗卓思齊嘅清香撲鼻

「卓思齊，你今日都冇認真望過我。」我側住頭望佢

佢聽到我嘅「投訴」之後先勉強咁同我對望，所以話輕輕咁撩佢一下真係好有趣，好中意見到佢面紅耳赤嘅樣

睇起嚟佢好似好努力咁壓抑緊啲咩一樣，我中意佢呢種怕醜同內斂，雖然宜家睇起嚟好似我恰緊佢一樣

我微微踮起腳尖湊近嘅時候，佢下意識就縮咗一下，我不滿咁伸手托喺佢下巴，掐住佢兩邊嘅臉頰





「唔準再避，同我好好錫就係啦，男、朋、友。」




IG Link: https://www.instagram.com/nd_cotttoncandy/?hl=zh-tw