正在同一大班朋友瞓緊覺嘅我,突然feel到地震,然後就係響起警鐘
 
「全體人員注意!準備到發射站集合!!! 全體人員注意!準備到發射站集合!!!」
 
「Your attention please!! Report to the gate immediately, this is not a drill!」
 
終於等到呢一日啦,自從90日之前受訓開始,準備嘅就係今日呢一刻
 
震動愈來愈激烈,同時聽到戰場上呼吸聲好勁,隨住一聲大叫
 


我地一群士兵就彈左出去上陣
 
「嘩!!!咁黑嘅!?」「開燈呀兄弟!!!!!」
 
我地各個將頭燈打開之後,就立即遇上強酸
 
「嘩!!!!!酸呀!!!!!!」
 
「白….白血球呀!!!」
 


立即有聚多兄弟陣亡。不過而家唔係悼念佢地嘅時候。
 
我加速游呀,好攰好攰,我果排兄弟已經得返我一個,連同其他連嘅兄弟繼續向目標前進
 
終於,我地見到目標。我立即戴好頭盔,跟住訓練指示一樣,衝過去!!!!
 
「殺呀!!!!!衝呀!!!!!」
 
我地好多兄弟率先撞向目標,眼見佢個防護罩愈來愈薄,而果位兄弟已經陣亡
 


我游過去接替佢個位,一撞
 
入左
 
立即防護罩再一次關上
 
發生咩事呀?!黑店黎架?
 
然後,我就瞓著左
 
「咕嚕咕嚕….咕嚕咕嚕…」我開始聽到聲音,我好似俾D液體包圍住咁
 
我仲聽到…有人講野
 
「雪凝,妳又有左呀?」


「係呀奶奶!!今次又係仔黎架」
「姐姐呀….其實…..」
「咩事呀詩敏?」
「我都有左啦」
「妳唔係話過想二人世界咩?」
「咁…..有左,都好呀」詩敏摸摸自己個肚
「仔定女呀?」
「係囡囡黎架」
「改左名未呢?」
「媽咪幫佢改左名啦,佢都幫妳肚果個改左名啦」
「真嘅奶奶?」
「係呀,雪凝妳個仔叫浩翹,詩敏個女叫慧思」
「程浩翹、李慧思,幾好丫」
「希望佢地兩個生生性性啦」
我係呢個充滿液體嘅空間住得好舒服,而且經常性有幾把聲音同我講野


 
最溫柔嘅聲音,一定係我媽媽。佢經常用手摸我,同我傾計
 
「你呀,乖乖地呀,要健康長大呀」
 
我媽媽真係好溫柔,我每日聽到最多係佢嘅聲音
 
而且有好多人回應佢
 
係媽媽休息果時,有另外兩把聲音黎同我傾計,我認得,係之前同媽媽傾計嘅聲音
 
唔,又有好味嘅野食經媽媽到傳俾我啦,真係好好食
 
每餐後總有兩個人黎同我傾計
 


「喂!!!細佬,我係你家姐呀」
 
「喂!!!我係你哥哥呀,我地要團結,唔好俾家姐蝦呀」
 
佢地每日都同我傾計摸我,當我突然肚餓果時,會打個電話俾room service
 
「room service,有咩幫到你」
 
「你好呀,我想要碗雞翼米線」
 
「好嘅,立即準備」
 
放低電話後,好快就聽到媽媽講野
 
「老公呀…我想食雞翼米線呀」


 
「下…成點鐘啦喎…」
 
「阿仔想食呀…」
 
「好啦…」
 
好快,雞翼米線就到左我到,真好味
 
突然間有一日….我覺得間房好迫好窄。然後個mon出現左密室逃脫開始呢個字。下!?我參加左密室逃脫咩?
 
唔理啦,快快逃出間房先
 
當時嘅環境….
 
「呀!!!!!」
 
係英華女校內嘅F.3B班,教IS嘅老師開始作動
 
「Miss Lam!!!妳肚痛呀?!」
 
然後就有好多學生好緊張
 
「我..好似…生得….」Jessie個額頭開始出汗
 
「校….校長!!!通知校長!!!Miss Cheung呢?」班長開始大叫
 
「Miss Cheung放緊產假啦!!!」
 
「過…過隔離班叫Miss Mak過黎先啦!!!!」有同學立即叫門口同學去搵幫手
 
好快有其他老師趕到
 
「Miss Lam…係…放鬆d…..係….」
 
「穿…穿左水啦!!!!!白車到未呀?」
 
「趕唔切啦!!!!張sir!!!你幫手去隔離診所叫醫生黎啦,bb個頭就出黎啦!!!!」
 
好快,有兩名私家醫生同白車趕到,Miss Lam當時係學校醫療室由兩位診所醫生同救護員協助下緊急分娩
 
30分鐘後,傳出新生嬰兒喊聲後,救護車將母子送去醫院
 
因為小朋友,係差少少屬於早產,所以佢十分虛弱
 
「呢到邊到黎架?我見唔到媽媽嘅?」
 
我好似係個好暖嘅箱仔入邊
 
我好攰…隻手好痛…經常有野流入我隻手
 
我知道好多人係個箱外望住我…我聽到媽媽喊聲……
 
不過我耳邊聲音愈來愈弱,愈來愈遠
 
突然間,個箱打開左,有個朋友瞓左係我隔離,佢伸手捉實我
 
同時間,我雙眼微微打開
 
係我眼前嘅係一個BB,佢對住我笑,而我都回返一個微笑俾佢
 
我地雙手緊握住