轉眼間,我已經係媽媽懷抱內食奶,仲有人餵我食粥仔
 
而且我都開始爬緊
 
我好鍾意跟住姐姐,佢會成日抱我錫我
 
而哥哥就會成日搵野引我,講故事俾我聽
 
經常性,會有一個同我差唔多大嘅BB女係我面前爬
 


我身體不自覺地跟住佢
 
BB女爬去東,我就爬去東
 
佢爬去西,我就爬去西
 
漸漸地,我地兩個都開始長大,我亦知道,佢叫李慧思
 
「浩翹、慧思!!我地去街啦」
 


已經識得行嘅我地,係見面時總係手拖手一齊行
 
隨住我地慢慢成長,我開始了解到我地兩個屋企之間嘅關係
 
爸爸同姑姐係一對冇血緣關係係兄妹,所以我同慧思係一D關係都冇
 
真好,佢嘅失魂唔會出現係我身上
 
不過身為男仔嘅我,總係會整喊D女仔嘅
 


係5歲K3果年我同慧思爭玩具,係,男仔同女仔都可以爭玩具
 
講明係男仔,當然爭贏果個係我
 
「俾件玩具我呀!!!」慧思不停用手打我
 
所以,我用件玩具一下打落佢個頭到
 
然後,佢眼中充滿淚水走出去搵姑丈
 
「浩翹,你做咩打慧思呀?」媽媽彎低身問我
 
「佢搶我玩具先架」
 
「你唔想同慧思一齊玩咩?」


 
「佢都唔係問我拎玩具,佢係搶玩具」
 
「但係你打左佢一下喎」
 
「咁…咁…」
 
媽媽將我帶到慧思面前,佢係姑丈懷裡嘟長個咀
 
「浩翹,慧思個額頭紅左啦喎,唔靚女啦,你點算呀?」
 
姑丈講到咁,我都要俾個交代佢嘅
 
「咁啦姑丈,我大個就同慧思結婚啦」
 


我咁講後,D大人唔識回答我地
 
「浩翹…你話大個要同慧思結婚?」
 
「係呀!我打左佢一下,娶佢做老婆好正常者」
 
慧思聽到之後走過黎
 
「勾手指尾」
 
「點解呀?」
 
「勾過手指尾就唔可以講大話架」
 
「邊個講架?」


 
「學校老師囉」慧思嘟住咀咁同我講
 
「好啦」我伸出左手尾指同佢勾住
 
「你應承同我結婚架」
 
「知啦」
 
果一刻,我見到慧思眼中非常開心
 
同時間,我都知道自己笑左出黎。而係我地身邊嘅家姐同阿哥,仲有孖女表姐都係到偷笑
 
「浩翹你話要同慧思結婚,咁你洗唔洗錫慧思一下呀?」家姐對住我地講
 


「真係要呀家姐?」
 
「係呀」
 
「咁家姐你又有冇俾男仔錫過呀?」
 
「冇呀!你係唔係錫慧思架?」
 
係家姐威迫下,我錫左慧思塊面一下
 
「我當你係應承架啦,你唔准錫其他女仔架啦」
 
「知道啦」
 
自從果日,我就對身邊其他女仔冇乜興趣。因為我知道應承左人嘅事,就一定要做