【已完結】【廣東話】《魔都姬神：退魔巫女千夜》（走甜健全作死日更小說企劃）: 其之三

其之三

「我係唔會將指揮權交俾你！」

「我諗指揮官你搞錯咗啲嘢，退魔協會同我本人都無興趣指揮你或者你手下做嘢。」

黑服一郎行埋去操作台，將隻USB手指遞俾操作員「只係唔想你哋阻住我哋做嘢啫！」

指揮官正想發火將黑服一郎趕出去果陣…





「長…長官！」

「又咩事？」

「方位0130，哨戒無人機偵測到無識別信號小型物體…」

「…果邊係避風塘對出海面喎！」

「…物體…目標X於海面以高速接近，以進行路線估算，大約60秒後到達HQ呢處！」





「麻煩將目標X定義為我方，代號M1，MIKO-1！」黑服一郎好隨意咁指示監控員「…增援嚟。」

而指揮官就好錯愕咁話：「增援？一個？」

———說時遲那時快———


「做咩著住校服嚟？」黑服一郎剛步出裝甲指揮車，一個著住典型日式水手服嘅學生妹就嚟到佢面前。

令在場所有人懷疑自己眼花嘅部份在於，呢位學生妹係由海面上一路「跑過嚟」。





「你話需要增援我咪響商住混合區果面趕過嚟囉，邊會有時間換衫呢？」

呢次令在場人仕懷疑埋耳仔出問題…因為該地距離現場無一粒都半個鐘車程走唔甩，而學生妹係貌似全程用腳跑過嚟…

「現場狀況相當惡劣，你上我架車換衫我一邊同你講解……」黑服一邊打開佢架全黑色豐田Hiace小型客貨兩用車側門，
示意佢上車。

「警方第一小隊，第二小隊同後續增援嘅第三小隊全員十五人全部被困，當中過半數受中等程度以上損傷。」
黑服閂埋車門之後開始講解「優先救出失去意識或重傷者，其次係原安排於上空監察嘅直升機被擊墜…」

「黑服…你講嘅增援…」指揮官走埋去，但黑服無理佢繼續講：「…後續嘗試營救嘅武裝空艇受損逼降，兩部機正副機師連同機組人員應該有十個人，外圍戒備嘅鎮暴隊幾分鐘前已經衝咗入去，不過因為裝備同實力問題，雖然有人數優勢但根本接近唔到LZ…」

「LZ…？」





「…著陸點…」

車門打開，學生妹換好衫落車。

「千夜，呢位係呢次行動嘅指揮官，」黑服講就係咁講「…然後，佢係……」

「協會委託退魔師，封魔神社退魔巫女 神樂千夜 ，指揮官閣下晚安。」

只見千夜從之前的日式水手學生服，換成全套巫女裝束。

「因為事態緊急，以二級限定解除狀況開始行動，而第一封印解除亦已備妥，視需要而定，妳只要口頭通知我就可以。」

「連一級都可以…咁睇來真係好大件事喎……」

［次回待續］