【已完結】【廣東話】《魔都姬神：退魔巫女千夜》（走甜健全作死日更小說企劃）: 其之二十六

其之二十六





凌晨五點，港灣再發展區，距廢棄大樓約數公里外，
對人外/妖魔特別任務連，通稱AD(Anti Demon)警察，
前線臨時指揮中心，裝甲指揮車裡面。





「司…司令官！緊急入電！」戰情室操作員神色慌張咁同指揮官講

「咪講過行動中咩電話都唔聽！」但指揮官一於好少理…

「…不…不過對方係……」

「…邊個都一樣，就算係內閣總理大臣打嚟都係咁話！」

「…我以副官權限，命令響主螢幕上接聽…」好少出聲嘅副官少有地做出反應





「…你作反呀？！」想當然爾，令指揮相當不悅，但亦無可奈何。

「…為你好咋……」古語有云跟官咁耐點會唔知官姓乜，副官咁做當然有佢用意。

「早晨，點呀，似乎好大劑喎！」只見螢幕上出現一身官裝軍帽，咬著煙斗嘅鬍鬚佬。

指揮官見到當堂打個突…

…統合軍第一艦隊總司令，古力華中將…





「…通知你一聲，標準時間0600，我方會作出支援射擊，麻煩你安排友軍撤退到安全地方……」

「…詳細資料已經用S級加密SEND咗上共有戰略數據庫，當然，如果你有好消息，例如提早解決咗件事……」

「好歡迎你盡快通知我方。」古力華用好和善嘅語氣，講出令指揮官嬲到震嘅內容。

「艦長艦長…艦橋裡面係禁煙區……」

「哦啊啊…唔好意思…失陪喇……」

隨住通訊結束，指揮官亦無力地坐返低…
…原來以軍事演習為名，想趁機展示火力同施壓為實。

統合海軍太平洋艦隊所屬第一艦隊包含多隻核子潛艇，護衛艦，以及…





最新銳強襲登陸艦戴頓斯，上面部署咗現存人類最大陸上非軌道機動兵器…
其主力武器四連裝400mm口徑液冷式液體推藥加農炮，射程達到160公里，
響衛星直聯修正彈道通稱「神眼」系統下，誤差少於10公尺。

超巨大高速航空母艦普羅米修斯，全長超過五百公尺，
搭載一百五十餘架全領域艦載超音速可變戰鬥機天火，
翼下派龍掛架最多同時可帶六枚對艦對地大型反應彈。

任何一架只要一發就可以將呢一帶夷為平地。

指摔官唯有指示除少數必要成員之外，安排其它人員撤出炮擊預定區域，
同時祈禱身處險境嘅部下能夠收到呢個消息，或者及時解決整件事……

由於地下區域有強烈通訊干擾，所以現場無人知道得返唔夠一個鐘時間。
齊上齊落嘅黑色紅眼機甲兵，好似毫無困難咁一路推進，




雖然並唔知道實際位置，但佢哋好自然咁走向中心點，
亦即係被無數觸手插入體內搾取抽出靈力嘅千夜。

周圍環境已經變到完全超出佢哋想像，
就好似響不經不覺之間。去咗另一個世界咁樣。

人工建築變異成肉質內臟，時空歪曲率急劇上升，
種種跡像都預兆，
虛與實，光與暗，現世與常世…

稱之為

…三途之川…
…地獄之壁…
…或是任何世人命名，




那道絕不應穿越嘅隔壁，
即將被強行打破消滅。

本來隱藏響地下嘅巨大魔法陣，
響貫注來自退魔巫女嘅靈力後，
發出詭異光芒，連毫無異能嘅普通人肉眼都清晰可見。

「喂…你咃睇下！就響前面咋！」

響佢哋面前係因為忙於吸收靈力動彈不得嘅靈吸怪。

響靈吸怪觸手向上延伸之處，
係失去意識嘅巫女系美少女退魔師神樂千夜，
而以此為圓心，一層又一層觸手將佢包圍住。





「Star Gate」
「鬼門」
「連接異相空間嘅奇點」
「虛空之屝」
「超時空通道」

…全部都係指同一樣嘢。

一為全，全為一。
如果想要得到一啲嘢，
就要付出相應代價——
等價交換法則，鍊金術嘅真理。

即將在此顯現。

［次回待續］