其之二十七



「唔得呀…無論係咩火力都打唔穿…」
「…就好似俾塊透明牆擋住咁…」
「唔可以咁快放棄…實有方法嘅!」

被囚嘅退魔巫女明明近在眼前,但眾人完全無辦法再進一步。





「大家聽我講,集中瞄住一點,跟我指令,一聲令下一齊開火!」
「預備…3,2,1…」
「Fire!」

全員火力集中響一點,
終於好似打穿咗一塊無形玻璃一樣

「成功喇!」

但係好快就發現,靈吸怪被子彈打中嘅地方快速恢復原狀,




而且觸手們開始激烈反擊。

「咄…可惡呀!再生能力…」
「而且速度好快…」
「邊避邊打,繼續開火!」
「同佢鬥快!就睇佢回復快唔快得過我哋射爆佢!」
「ok!大家小心啲唔好傷到巫女小姐呀!」
「快啲醒呀!唔好再瞓喇!」

對人外/妖魔特別任務連,通稱AD(Anti Demon)警察,




一身全黑強化裝甲嘅精英,正盡力營救被靈吸怪捕捉住嘅千夜。

「醒呀巫女小姐!」

佢哋一邊避開觸手嘅攻擊,一邊瞄準開火,同時不斷想嗌醒佢。

…另一方面…

除咗裝甲指揮車同車內少數幾名操作員之外,幾乎所有人都撤離到安全地方。

「…估唔到你唔怕死喎!」指摔官對黑服咁講

「…死當然怕,但知道唔會死就無咩好怕。」黑服照舊用無咩感情嘅語氣,
木無表情咁話。





副官見狀就話「因為沉睡嘅女主角一定趕得切準時起身?」

黑服不置可否咁默默緊盯住主螢幕上一個不斷跳動嘅數字……

從來無人想像過,靈吸怪原來吸收靈力有其上限。

直到呢一刻,就好似吸水嘅海綿再大塊能吸嘅水再多,放落大海都無可能將海水吸乾一樣。

隨著一級封印解除,千夜體內嘅靈子生成器官重新運作,就好似多個生體反應爐一樣,
迅速產生大量靈能魔力,好快就超過咗靈吸怪吸收嘅速度。

無思考能力僅靠本能活動嘅下場,就係響完全無法反應下好似過度充氣嘅氣球一樣,
…谷爆。

一行終於救出慢慢甦醒嘅千夜。





「太好喇,巫女小姐妳無事呀嘛?」

「…放心…我無事……」千夜慢慢企返起身,隨住大量靈能響體內運行,
本來受到嘅損傷快速復元,除此之外,馬上注意到周圍狀況……

「首先…唔好意思喇,小妹早過你醒,所以…」

佢抬頭望望個天,本來係想利用佢召喚出不屬此世之物,或者打開連繫兩個世界嘅門,

真理,與及真理之門。

「…請返去對面繼續瞓,無咩事又好,有咩事都好,唔好過嚟喇!」

千夜運起退魔巫女嘅力量,將門關上。





「然後…係破壞呢個魔法陣……」

周圍一切不屬於呢個世界嘅嘢,不但被送返去原來嘅地方,土地更施下重重封印。

情況就好似某個人想打開一道鎖上嘅門,將鎖匙插咗入去,但想轉開嘅時候,
俾千夜搶過嚟,仲將條鎖匙擰斷咗響裡面,再用膠水封住一樣,
呢道門之後就算搵開鎖佬搞,都要額外花多好多功夫先得。

雖然除咗千夜本身現場無人明發生咩事,但因為成個個程只係用咗好短時間,
所以隨住周圍嘅觸手,異形肉塊消失,通訊干擾停止恢復返正常,
佢哋都知道事件得到解決…

…唔係…





「…唔…唔係呀嘛?咁大件事!?」
「大…大家快啲離開呢度!」
「…邊走得切…通知佢哋取消行動啦!」

…無錯,現在時間係0557…

「咩…咩事呀?」千夜嘅疑問,隨住收到黑服一郎嘅電話得到解答。

確認現狀嘅同時,掛彈準備出發嘅艦載機已經馬上取消行動。

但4發大口徑炮彈因為距離同彈速問題,已經射出響半空!

「…放心…等小妹將佢落嚟,大家唔會有事嘅!」千夜笑笑口,
就好似話幫朋友去買罐汽水一樣簡單。

「攔截已經射出響半空嘅炮彈…?!」

「做…得得到咩?」

「…不如話…完全想像唔到用人力可以點做……」

只見千夜雙手結印,默念咒文。

「一級封印限定解除,表示無限制戰鬥及視界外遙距異能許可…」

「三神器之一!」

「…菱花鏡!召還!」

響千里之外嘅虛空之中,太陽光被反射,聚焦。

「…鎖定目標…四發炮彈…」

就好似之前佢講過一樣,唔用肉眼可以睇得更清楚。

「禁咒!蒼羅花音(Solar Cannon)」

經魔力生成鏡面多次反複反射,增幅嘅光線,由衛星軌道直射向炮彈,焦點溫度與太陽表面相同,
持續照射數秒就足以令亞音速飛行中嘅炮彈擊落!

危機,就係咁簡單就順利被千夜解除。

因為靈能魔力只係用於形成鏡面,照準,調整反射角度,光束本身持續照射時間同威力都係來自太陽,
呢招相對只需要少量靈能魔法就能產出巨大威力。

「…所以先嚴重封印,需要申請批准禁止亂用…」副官自言自語咁話「退魔巫女…」

「KIA三個,生還者全員負傷…呢次行動簡直係災難…」指揮官坐返低,一臉煩惱,但總算鬆一口氣…

「辛苦晒咁多位…」黑服一郎一貫不帶多餘感情咁邊講邊步出指揮車「…事件至此告一段落,就此告辭。」

講就咁講,事實上後續要處理嘅事,又多又煩更加係無人想知。

不過呢一刻,大家都唔想去理住。

而千夜同各人道別後就坐上黑服架VAN仔離開。

響朝陽照射下,城市愎慢甦醒。

除咗極少數當事人之外,大部份人都唔知道呢一日發生過一件咁嘅事。

以往係咁,以後都會係咁,呢個世界,就係咁運作。

封魔神社,退魔協會,一眾退魔師,擁有超乎人類想像力量嘅超人,改造人,人造人…
各式各樣嘅異能者,就係咁響不為人知嘅地方為保護日常嘅每一日作出努力。
名為神樂千夜嘅十六歲少女,就係其中一人。

「呢單委託小妹係咪可以賺到好多錢呀?」

「…妳…知唔知道解除封印申請手續需要駛幾多錢?」

「…可唔可以幫我搵啲賺到錢嘅工作呀?」

「…有…之前同妳講過牛奶公司對妳好有興趣…」

「人哋唔係要呢啲呀!」

另一方面,我哋將鏡頭拉遠一啲……

…響暗處不為人見不為人知嘅地方……

「退魔巫女…神樂千夜…」狼王響遠方目送其遠去「總有一日,妳會為老子生下一隻又一隻狼仔!」

[全文完]