【愛情】【靈異】我啊媽係遊魂野鬼: 第一回 針孔攝錄機

今朝啊爸一醒就大叫「啊！！」左一聲，唔止今朝，啊爸係呢三年入面每朝都係咁，我已經習慣，可能爸爸工作壓力大經常會發惡夢吧。

我爸爸係個生活規律嘅人，每朝六點醒，早餐過後會去跑步，然後番屋企沖涼再番工，基本上每朝都係咁。

我啊媽總會比我爸爸早起身，因為我媽媽每朝都會為全家人煮早餐，今朝啊媽整嘅係香煎雞排包同烚雞蛋，仲有齋啡，啊媽總會因應爸爸嘅口味而決定早餐食咩。

當啊爸跑完步差唔多番到屋企，啊媽就會提早幫佢開定熱水爐，準備好更換衣物等啊爸番黎沖涼。

但係今日，啊爸跑完步番到屋企，竟然冇好似平時咁即刻沖涼，佢氣來氣喘又面青青咁坐左係梳化，我諗啊爸應該係休息得唔好，加上做完有氧運動番到黎先會喘氣同面色唔好。



然後啊爸叫左我一聲「蕭佳懿！」

我就行過去梳化睇下啊爸咩事，「我今日唔係好舒服，你幫我去樓下藥房買盒感冒藥丫。」

雖然覺得奇怪，但我都係照啊爸吩咐幫手落街買藥，因為啊爸一向小病都唔會食藥，居然叫我幫手買藥。

當我番到屋企，發現啊爸已經唔係屋企，一開房門就聽到啊媽係到喊，我問啊媽發生咩事，啊媽又唔肯講，我直覺覺得佢地一定有野瞞住我唔想比我知，所以岩岩啊爸先會駛我落街買藥。

好奇心嘅驅使下，令我不斷猜測到底岩岩佢地到底講左啲咩，發生左咩事，但我真係毫無頭緒，係呢個時候我突然醒起一件事，係新居入伙戈陣，啊媽托我買左幾部針孔攝錄機，因為啊媽唔識呢啲咁高科技嘅野，所以由購買到安裝都係我一手包辦，當時有問啊媽做咩要買針孔攝錄機，啊媽話遲d可能會請個工人姐姐黎幫手，所以裝定個針孔攝錄機以防萬一，呢個係我同啊媽之間嘅秘密，連啊爸都唔知。



唔理咁多啦，我依加剩係想知岩岩啊爸同啊媽發生左咩事，我翻查攝錄機嘅片段，見到啊爸個樣嚴肅又帶點驚恐咁質問啊媽「點解岩岩跑步要跟住我？我連少少私人時間都唔可以有？你平時想見個仔我唔阻止。」而啊媽居然只係講左一句「我都係想同你一齊多d時間啫。」

聽到呢到，我更加不解，啊爸話啊媽跟住佢去跑步？而岩岩啊媽出左去嘅時間只有十五分鐘，如果啊媽要去搵啊爸，剩係來回路程都唔只十五分鐘，點可能跟住啊爸去跑步呢？

同埋岩岩啊爸話「你要見個仔我唔阻止？」我越諗越唔明，啊媽見我有咩問題啊？

我覺得件事真係唔係咁簡單，既然佢地都唔想同我講，我要自己搵真相。啊媽好中意紀錄我地一家人嘅生活，平時出去玩啊媽都會帶埋佢部相機拍下vlog咁，佢真係好珍惜我地一家人相處嘅時間。岩岩啊媽出去戈陣，我記得佢將部相機掛係條頸到，唔知啊媽有冇影到岩岩跑步嘅片段呢。

果然被我搵到真係有今日拍嘅片，我見到啊媽係片入面笑得好開心，同啊爸講「嚟追我丫，哈哈」啊媽跑係啊爸面前同啊爸玩，啊爸又跑得更快去追啊媽，但始終都係啊媽跑得快過啊爸。但係。。。。。。啊媽點可能跑得快過啊爸，啊爸係消防員，每日鍛練，而啊媽完全冇運動習慣，行多兩步都氣喘。



我又倒後條片重新再睇，我發現。。。。。。啊媽唔係跑，啊媽係飄，一直飄係啊爸面前。

我目定口呆，唔通啊爸一早知啊媽係鬼？

咁我每日見到嘅啊媽係。。。。。。