[真人真事改編][校園][愛情]竟然因為IG live而帶來一段突如其來的緣份…: 第一章——「開學日」
第一章——「開學日」
一切都要由2021年第一日返學開始講起
「鈴…鈴…鈴…」 呼.. 邊個喺度嘈鬼住人瞓覺，明明仲放緊暑假都要嘈…
咪住先！今日係九月一日…九月一…SHIT!!!
點解可以傻到咁架！
就連咁簡單嘅嘢都唔記得！媽啊，你點解要遺傳個咁冇記性嘅腦俾我吖！
母親大人喺廚房大叫「仔啊，再唔起身就遲到喇！」
「死啦！我唔記得左今日要返學吖！而家著校服落嚟。」
「死蠢！點解可以連返學咁大件事都可以唔記得架。」
「你仲好講！咪就係遺傳咗你同阿爸嘅基因。」
大家千祈唔好誤會，我哋唔係嗌緊交，只不過我哋全家平日都係咁樣溝通。
頭先喺廚房大叫嘅就係我屋企嘅母親大人
佢係一個全職嘅家庭主婦
朝早我返咗學，同埋阿爸返咗工佢就去買餸
買完有時間就會去隔離屋企同佢嘅雀友打麻雀
雖然我已經中五
但係每一日出門口前我同阿爸都有個指定動作，就係錫阿媽一啖。
可能有人會覺得好尷尬
但其實諗深一層都幾溫馨呀～
有時間就留意吓自己嘅屋企人
細心留意吓佢哋嘅變化，眼睛已經冇以前咁精神，而且開始有魚尾紋
可能係因為平日操勞吧。
但就係因為種種歲月嘅痕跡，令到我哋知道屋企人都已經邁入年老
而我阿爸就係一個公司高層，所以由細到大都可以叫做衣食無憂嘅。
講咗咁耐終於到我，我叫方辰軒，Lucas。
同我熟嘅人都會叫我阿軒。
我身為一個中五嘅學生，比香港一個稱為教育制度既無形監獄洗禮咗13年
而下年終於要迎來人生第一個大Boss—— DSE
由細到大屋企人都同我哋講「喺香港一定要入大學」
久而久之就被灌輸左一種思維就係香港呢一個彈丸之地容唔下教育制度下嘅失敗品
所以每一個香港嘅學生，每一日都過住一啲膊頭充滿負擔，透不過氣嘅生活
可悲嘅係每一個人都習慣咗呢一種籠中鳥嘅生活
當然畢業後就會發現其實中學都只不過係一個轉捩點
社會先至係真正嘅高牆，而作為雞蛋亦都只能夠硬食
呢啲都係後話
不然越講越多，返返嚟九月一先。
「死啦，遲到啦！」我以迅雷不及掩耳嘅速度着上校服揹起書包就打開房門
連燈都唔熄就衝出走廊再跑去客廳
「早晨吖！母親大人。」
「早晨～快啲過嚟食早餐啦。」母親大人又話「今日記得帶遮啊！天文台話會落雨。」
「係啦！知道啦。」直接省略了咀嚼嘅過程…
用9秒9嘅時間去吞下母親大人精心調製嘅早餐…
「阿爸早晨，我出門口啦！」當我大叫完呢一句就拎起鎖匙跑出門口。
每次當我趕住就嚟遲到返學嘅時候都總會跌入一個地獄——電梯嘅無限輪迴
心急如焚之際，突然俾人好大力咁俾人拍咗一下背脊
差少少就連頭先嘅早餐都嘔埋出嚟
「早晨喎～死仔！」
「真心建議你下次拍細力啲，你十幾年嚟都係咁真係尾龍骨都就嚟俾你拍斷。」
呢一個係我由細玩到大嘅好兄弟——黃天翊
亦都係唯一一個朋友可以令我喺佢面前卸下我嘅面具
阿翊係學校嘅風頭躉
現代嘅再世潘安
俊俏嘅面孔，鋼鐵般嘅身材，清爽嘅短髮
簡直就係男性嘅完美典範
除咗成績唔係特別出眾之外
無論運動抑或藝術方面都堪稱天才
作為一個毒L企喺佢隔離簡直係相形見絀
有為數不少嘅師姐師妹擲果盈車，嘗試去獲得男神嘅歡心
相信大家都以為佢係一個風流倜儻嘅不羈少年
但佢向卻是一個「A0」
因為佢一直都本着一個信念
「鍾意一個人唔使負責任，但當你同左一個人一齊就有着極大嘅責任。」
佢又話愛係要包容佢嘅全部，而佢暫時未遇到一個人值得佢咁樣做
唉…毒L果然唔會明一個男神嘅思維
明明成日都話想拍拖但係有咁多選擇又視而不見
言歸正傳！
我同呢一位兄弟都係喺一間Band1尾嘅學校裏面服刑
作為學校嘅夾心階層
雖然成績唔算太差，但絕對稱唔上最頂流最乖巧嘅學生
亦都唔係老師嘅心頭好，又或者所謂嘅「模範學生」
但係學校就係一個小型嘅社會
「你的樣子如何你的日子也必如何」
正正因為阿翊英俊瀟灑，風流倜儻嘅魔鬼面孔以及身材
所以擁有喺學校呼風喚雨嘅能力
就正如一個喺社會頂層嘅成功人士
而我作為佢嘅好兄弟亦成功地俾佢連帶效應地成為「阿翊嘅好兄弟」
呢一件事並不風光，甚至招惹大量麻煩。
佢所有嘅追求者都好似當左我係一個儲物櫃，又或者一個郵筒
「阿軒！可唔可以幫我俾啲蛋糕同埋封信天翊BB吖！」
每次當我想拒絕嘅時候，佢哋就會話唔該晒你
然後跑走…
就連拒絕嘅時間都冇…
唉…地位是如此卑微。
話雖如此～
佢絕對係一個好兄弟
好兄弟就係當你需要佢嘅時候，佢會挺身而出幫你
唔開心嘅時候，會開解你
一齊癲！一齊喪！
「贏嘅話，我陪你君臨天下
輸嘅話，我同你東山再起」
雖然佢成日都掛住呢兩句咁肉麻嘅說話喺嘴邊
但係真心我都幾慶幸細個識到呢個好兄弟
「點啊！今年仲打唔打算帶住你嗰個保護自己嘅面具？」
佢所指嘅「面具」
正是我喺同學、老師甚至乎有時屋企人面前一個「冷靜、寡言」嘅形象
好多人都唔明點解要咁做
只係出自我嘅自我保護意識
並非個人意願
「你知道呢件事唔到我揀㗎啦～如果可以放低嘅話我都想」
「可能今年會遇到一個人可以幫到你呢～」
「承你貴言！」
「總之記住喺我面前做返自己！」
而家嘅我諗返起當時阿翊講嘅「遇到一個人」
就對佢嘅「預言」感覺到如此嘅神奇
「入𨋢啦！天翊BB～」
佢回應道「嘔心！」
「今年中五一齊加油啦～」
佢申出拳頭
而我亦都用我嘅拳頭作為回應
希望今年中五能夠平平安安，無風無浪地渡過吧！