[真人真事改編][校園][愛情]竟然因為IG live而帶來一段突如其來的緣份…: 第二章——「時侯不早」

第二章——「時侯不早」
「軒爺，你估今年我哋班會唔會有靚女啊嗱？」
「有又點？冇又點？對我呢啲毒L來講根本冇分別…」
「我同你賭！根據靚女一定喺人哋班嘅定律來講，我買今年冇！」
其實有冇靚女對我嚟講根本冇任何影響
我從來都唔相信愛神邱比特，又或者月老會睇得上我

「咁你都揀咗啦～咁我買有囉～」
雖然話就話對我冇影響，但係其實內心都仲有一絲期望，希望會有！
確實如果有靚女喺班入面




返學嘅意欲都會比較大
阿翊突然出聲講：「以我哋而家嘅步速！一定遲到！」
「遲到對你嚟講雞毛蒜皮啦～」我扮晒嘢咁串佢
「咁不如去食咗早餐先啦！」
我徹底地對呢條友感到無言又無奈。
所以我就一於少理

望住隻錶，仲有25分鐘就會打起遲到嘅鐘聲，
因此，我開始咗同時間競賽，
時間呢一樣嘢係人類嘅不可控力




亦都係人類最大嘅敵人。
感覺上世界嘅一切都係由時間控制，
所有嘅遺憾都係由時間造成。

以人類現今嘅科技唔能夠做到回到過去或穿越未來。
時間一直都流失緊，就似一個沙漏，
又好似一枝箭咁，射咗出去之後你冇辦法控制佢嘅方向。
咁所以我而家呢一刻就係同緊人類最大嘅敵人搏鬥。
電光火石之間，我亦都化身一粒子彈，
迅速地奔向小巴站，




而身為運動健將嘅阿翊亦都不急不慢地追上我，
我眼尾見到佢俾咗個眼神我，
喺呢一瞬間，我明白到男人之間嘅對決要開始了！

我同佢就好似喺馬場嘅馬一樣，專注地奔向終點，
結果亦都好明顯地我輸比佢九條街……
「傻仔，練多幾年先再嚟挑戰我！」
我連條氣都未抖順佢已經可以游刃有餘地講到一句完整說話。
我輸到一敗塗地……
雖然係預料中嘅結果，但係都有啲唔甘心。


當我仍在休息之際，小巴終於到達。
而我同阿翊不慌不忙地上車後，
就坐咗喺二人座位度，




我同佢每次搭車都有一條不明文規定，
就係兩個人一定會戴起耳機聽歌並且唔會打擾對方直至到達目的地。
喺呢個時候Spotify播起MC張天賦嘅『時候不早』
哈……真諷刺……

與此同時，一條名為塞車嘅車龍影響咗我同時間嘅競賽，
而且當我哋到達目的地嘅時候，
我哋就聽到不幸嘅鐘聲響起，
冇錯……我哋遲到了
第一日返學就遲到了……
正所謂「一年之計在於春，一日之計在於晨」
我哋為新嘅一年開咗一個糟糕嘅序章……







我哋一踏入校門，
就見到身被羊皮嘅一堆大灰狼以及帶着皇冠嘅狼王，
亦都即係每個人中學都曾經討厭嘅Prefect，
以及令人聞風喪膽嘅訓導老師——「獅子王」
獅子王呢一個名稱嘅由來，首先係因為佢姓王，
其二係因為佢嘅獅吼功，
最後就係因為佢掌管住幾乎學生最高權力——「Prefect」
唉……

返學第一日就咁黑仔，希望今年真係可以平平安安渡過。
「同學！你哋遲到！快啲寫低你哋嘅姓名，班別，學號！」獅子王叫到。
我就死氣沉沉咁講：「5C班！16號方辰軒！」
而喺我講完呢一瞬間，
我瞬間感受到咩叫差別待遇。
其中一個Prefect說道：「5C班21號黃天翊啊嘛～學校有邊個唔識你～」




「大家咁話啦！Head prefect而且又係校花～符曉晴Métis 同學。」阿翊諷刺地回應道。
佢哋兩個係由中一就鬥到中五嘅同學，
亦都係一對學校極度出名嘅歡喜冤家。

上至天文，下至地理
總之乜都鬥一餐。
如果阿翊係潘安嘅話，咁Metis絕對可以被稱為係西施都不為過！
而係呢五年裏面，
如我剛才所言，有大量女性為阿翊擲果盈車，
而同樣地亦有大量男性拜倒於Métis的石榴裙下。
但同樣地Métis亦都同阿翊一樣，冇拍過拖
原因就不得而知，始終我同佢並唔熟。
對佢嘅了解只係學校嘅女神。
「方辰軒同學以及黃天翊同學快啲返去自己班房，同埋記得今日放學要去留堂！」獅子王叫道。
「係……知道。」我同阿翊死死地氣地回應道。