[真人真事改編][校園][愛情]竟然因為IG live而帶來一段突如其來的緣份…: 第六章——「給十年後的我」

第六章——「十年後的我們」
「人生如戲，戲如人生」
呢個世界所有嘢都意想不到，
某啲經歷就好似每一晚八點檔嘅節目一樣，
老土卻真實，
荒謬成現實。
正正係我體會緊嘅嘢…

「母親大人，呢位到底何方神聖…」
我悄悄咁樣問母親大人。




「你記唔記得你細個同天翊成日都落去樓下屋苑個公園度玩？」
佢亦都細細聲地回應我。
「呃…有少少印象吧…」
經過一輪時空同記憶嘅錯亂之後，
我就回答道。

* * *
「你好呀！我叫做方辰軒～由今日起我哋就係朋友啦！」
一個男孩子同緊一個素未謀面，
甚至連名都唔知嘅女孩子交談道。




女生經過一番遲疑，
「你…好，唔該晒…」
見到佢慢慢抬高頭，
雙眼因為喊完嘅關係而變得紅腫，
面頰上慢慢淡出兩圈紅暈，
男生亦都伸出雙手，
伸向被推倒的女生，
膝蓋紅腫嘅女生，
亦都將佢嘅雙手伸向男生，
名為友誼嘅契約就由當日男生嘅行為簽定了。




* * *

* * *
由嗰一日起，
我同阿翊本來嘅二人組就變成加埋呢個女仔嘅三人組。
每日小學放學之後就會連同阿翊一同奔向屋苑嘅遊樂場，
睇吓有冇呢個女仔嘅蹤影，
而通常一個禮拜五日，
呢個女仔有三日都會喺度，
每次呢個女仔一見到我哋，
又或者我哋見到個女仔，
大家都會默契地不約而同咁樣走向繩網陣，
每一次我哋嘅固定活動就係鬥快爬上去塔尖。
而當然，
天翊永遠都係第一。




我同個女仔冇一次贏到佢，
而當我哋全部人上到塔尖，
大家就會坐喺最高嗰層，
抬頭仰望天上嘅白雲，
天上嘅飛鳥，
然後一齊講一下各人天馬行空嘅夢想。

我仲好記得細個嘅阿翊一見到飛鳥，
就會話自己將來嘅夢想，
就係可以喺天上面飛，
好似佢哋咁自由自在，無拘無束，
而家呢個夢想應該冇乜可能實現到了。
小時候嘅我哋行每一步都要跟住地下瓷磚嘅紋路，
總係喜歡吵吵鬧鬧，
好小嘅一件事就可以嘈一餐，




但係唔使5分鐘就和好如初。
可能呢一種就係只屬於小時候嘅天真爛漫，
對待每個人都附上真心，
全心全意咁樣去交流。

當大概過咗半年之後，
我附上左我嘅真心，
全心全意咁樣同呢個女仔做朋友，
但係有一日佢就無聲無息咁樣消失咗係我哋嘅生活，
當日我同阿翊放學如常地到遊樂場「放電」，
但係嗰個女仔當日冇嚟到，
我哋都不以為意，
但係日復日地過，
一個星期都冇見到呢個女仔，
心裏面不期然感到低落，




突然之間一個人從你嘅生活裏面消失，
呢種感覺真係好難受。
而三人組正式地變返從一開始嘅兩人組，
亦都慢慢習慣呢個女仔嘅離去，
心裏面對佢嘅印象，
就好似一張充滿墨水嘅白紙放入水裏面，
慢慢化開，
直到最後就連張白紙都變得溶溶爛爛。
亦都冇諗過呢一個女仔，
多年後重新踏入我嘅生活。
而當年破爛嘅白紙，
而家慢慢喺我腦裏面拼接返嚟。
* * *

「呢個就係細個同我哋一齊玩嗰個女仔…？」




我好驚訝地呆望住個女仔而細細聲咁向我母親大人提問。
「係呀，使唔使咁驚訝…俾返啲禮貌，縮番埋個下巴啦！」
佢亦都毫不客氣咁回答。
我會咁驚訝嘅原因係因為我印象中嘅佢細細個係一個肥妹仔，
但係女大十八變，
而家已經成為一個美少女，
仲要係女神級…

「好耐冇見啦…辰軒。」
而家嘅佢微微地垂低頭，
面上泛紅，
就如同當年嗰個女孩子。
「好…耐冇見啦…話說其實當年都未知你叫咩名…？」
「我叫做鍾情～可以叫我Kay。」