[真人真事改編][校園][愛情]竟然因為IG live而帶來一段突如其來的緣份…: 第七章——「樂天女孩」

第七章——「樂天女孩」
「你呢幾年經歷過啲咩…？」
我合唔上下巴咁樣問Kay。
「由六年班升中學嗰個暑假就發憤減肥…始終唔想再經歷多次以前嘅事呢～」
佢眼神突然暗淡落嚟，
本來嗰一雙炯炯有神嘅眼睛消失咗，
但係過咗唔夠3秒，
佢就變返嗰個滿面笑容嘅女孩子。

「你用咗一個暑假就將自己變成咁…」




我一臉不可思議咁望住佢，
始終呢件事實在太過匪夷所思。
「我都明白好難相信，但係呢個係事實～」
佢用佢雙眼睛凝視着我，
了解佢以前嘅經歷再見到佢既眼神，
呢個女孩子仍然惹人憐愛，
而且佢嘅雙眼有種感覺令人想去了解佢嘅故事，
去保護佢令到佢唔再受到傷害。

「你仲記唔記得阿翊～」




「梗係記得～細個三人組最後一個就係佢。」
「不如搵日我哋三個一齊約出去玩吓？」
「我冇問題吖。我而家搬返去同我婆婆以前個單位一齊住，即係你樓上～」
「咁我哋交換聯絡方式先～」
經過我哋一輪嘅敘舊之後，
母親大人就問Kay晚餐想食咩，
此時此刻先至知道，
原來佢喺我哋屋企出現嘅原因，
就係母親大人搵佢落嚟食飯…





咁喺呢個時候我就把握時間去形容下Kay，
細個嘅佢係一個面圓圓眼大大，
短頭髮嘅肥妹仔，
而小學升中學嗰個暑假經歷完一場「大變革」之後，
依家呢一刻嘅佢依舊係眼大大鼻高高，
而且害羞嘅性格一啲都冇變到，
身高長高到167cm，
而身材方面就…不予置評…
所以我認為上天係公平㗎！
但係Kay只有身材呢方面比較遜色，
其餘方面都可以堪稱接近完美。

然而喺呢一場晚餐亦都冇再發生任何特別嘅事情，
只係單純嘅敘舊，
而送佢哋離開嘅時候，




Kay喺我耳邊細細聲同我講一句
「你同天翊，聽日5:00老地方不見不散。」
隨後佢就同佢婆婆返屋企。
而老土嘅八點檔劇情，亦都喺呢一個時刻拉下帷幕。
* * *

而今日我嘅大腦終於上線，
雖然琴晚做功課嘅時候仍然寫錯自己係中四，
但總比唔記得要返學好！
亦都因為咁，
今日出門口嘅過程係冇遇上阿翊，
而咁樣即係代表我唔會遲到，
呼～放心晒～

今日嘅我放慢腳步咁樣一邊享受音樂，




一邊望住城市嘅繁榮，
但城市嘅繁榮亦都代表着市民嘅壓力同埋勞力，
唉…
一諗到讀咁多書，
就你為咗將來出嚟過住日復日嘅生活就感到好唔甘心，
但係身為一塊可有可無嘅齒輪，
呢個社會又點會有你發聲嘅空間，
我哋嘅工作就係乖乖地做一個推動社會經濟嘅奴隸，
又或者做一隻蜜蜂去為蜂后採花蜜。
喺我一邊思考人生之際，
車到左，
而我亦拋開一堆千年不解之謎，
專心聽歌，
專心留意風景。





轉眼間就已經去到終點站，
換言之就係時候落車，
踏入「監獄」之後，
第一樣嘢見到嘅就係狼群，
而且獅子王嘅直屬部下，
狼王——亦即係Mètis。
「同學早晨。」
「早晨。」
今日佢比平時嘅佢更加靚，
髮型同平時唔一樣，
而且仔細啲睇仲會見到化咗少少妝，
我哋學校化妝係犯校規嘅但係始終佢係狼王，
都冇人可以奈佢何，
可能因為放學約咗人吧，





返到課室之後，
就迅速返埋自己個位，
「辰軒早晨！」
「早晨阿柔。」
晨咁早就已經返到嚟學校嘅阿柔，
仍然元氣滿滿朝氣勃勃咁樣同每一個返到課室嘅人打招呼。
還真是陽光樂天呢。

而阿翊亦都不出所料喺打鐘嘅時候趕入課室，
今日嘅佢比平時嘅佢亦都有啲唔同，
精心裝扮，
可能母親大人同咗家姐講今日放學去見Kay…？
所以佢知道咗就打扮下自己…？
等陣小息問吓先。