佛誕怪奇短篇 - 廢棄村落之浴「罰」節: （三）回憶 - 追尋丁爸

本以為丁爸會十分激動，但回到三椏村後，丁爸卻異常地平靜，平靜到令身旁的人感到一絲不安。
 
『丁爸，你同你老婆休息下先，其他嘢等你哋休息好再處理，小丁佢......』
 
村長幫忙安頓好丁爸一家後，本想先安放好小丁的屍體，但丁爸只是搖了搖頭，村長也沒有強求，放下了一盤熱水後便任由丁爸在屋內隌着小丁和丁媽。
 
『丁爸點呀？』
 
『佢暫時都無咩，由佢休息下先啦。唉，點解會搞成咁。』
 




『村長，你估小丁，係咪被牛屎湖村班人......』
 
『我都唔敢講，但我頭先有望過下小丁，應該可以排除野獸襲擊或者意外嘅可能性。』
 
『唉，如果真係牛屎湖村班人做嘅，咁我哋咪好危險。』
 
『係囉，我記得上年又係佛誕嗰陣，佢哋成班人抬住尊木佛喺牛屎湖村嗰度唔知做埋晒啲咩儀式，諗起都恐怖。』
 
『係呀係呀，我都記得，好在嗰陣我哋幾個無被佢哋發現，如果唔係可能已經被佢哋溶咗。』
 




『我哋不如搬啦，同佢哋住到咁近，容乜易出事。』
 
村民們你一言我一語，紛紛提到牛屎湖村的可怕之處及提出不同建議。
 
『大家冷靜啲先，我哋喺呢度都住咗幾十年，大家都有大有細，唔係話搬就搬。咁啦，等小丁件事處理好，我哋再一齊討論點樣做啦，好嘛？』
 
村長雖然也認為小丁的死亡十分古怪，但要重新尋找新的地方安置所有人，亦不是一時三刻能做到，再者，小丁的死亡原因仍然未明，說不定和牛屎湖村完全沒有關係，要是這樣，搬離的動作不就變成無用功。
 
就在村民仍然對村長的決定感到不安之際，村裡又有新狀況。
 




『村長，你哋快啲過嚟啦，丁爸唔見咗呀！』
 
聽到叫喊聲後，所有人馬上來到丁爸家中，只見屋內只有仍處於半昏迷的丁媽，丁爸和小丁的屍首卻不見了。
 
『點解會咁㗎，你哋有無人留意到丁爸去咗邊？』
 
村長詢問着其他村民，但大家剛才都幾乎聚在一起，沒有人知道丁爸的行蹤。
 
『我，我知道。』年幼的馮伯小聲地說。
 
『小馮你知道？你唔好講大話喎。』
 
『我，我真係知㗎。啱啱你哋出晒去傾計，我諗住去睇下小丁佢點，點知就見到丁爸佢抱住小丁同埋拎住把刀就行咗出村。因為你哋叫我唔好去探小丁，咁我驚被丁爸發現，就即刻匿返入屋度。』
 
年幼的馮伯不明白為甚麼其他大人要阻止他探望小丁，故乘着沒有人注意時跑到小丁家附近，卻目睹了丁爸離開三椏村的一幕。




 
『你個衰仔，我咪同你講小丁病咗，唔好去搵小丁囉，你仲走去。』
 
『算啦算啦，小馮都係關心小丁啫。小馮咁你有無見到丁爸向邊個方向走？』
 
『有呀，佢又走咗去牛屎湖村囉。』
 
其他人聽到後，意識到丁爸接下來想做的事情。
 
『慘啦，大家快啲追丁爸。』
 
『等等，依家已經天黑，我哋準備好先再出發啦。』
 
在村長的指示下，村內的男人把能當作武器的用具都帶上，每人手上拿着火巴，便再次向牛屎湖村出發，留下的女人則幫忙照顧丁媽以及村內的小孩子。
 




眾人根據村內小孩的描述，找到了一尊被染成暗紅色的佛像，四周仍殘留着應該是祭拜用的物品。
 
『村長，前少少應該就係牛屎湖村啦。』
 
『好，大家小心啲，千祈唔好一個人落單，有咩事就大嗌話畀我哋知。我哋搵到丁爸之後就即刻離開。』
 
『如果，如果佢哋攻擊我哋，咁......』一名村民不安地說。
 
『記住我哋唔好亂咁出手，但如果真係受襲，就唔好猶豫，我哋盡量靠近，唔會有事嘅。』
 
眾人商談好後，便越過了佛像，進入到牛屎湖村。
 
據村民事後描述，他們在經過佛像的瞬間，都感到一陣無形的壓力及冰冷的視線。
 
但事已至此，眾人都只想盡快找到丁爸後，離開這條令人毛骨悚然的村落。