佢用3粒Bitcoin買起一間7仔: 第九章 時光這個壞人偏卻決絕如許 三之二

小也然分到一件有士多啤梨嘅蛋糕，走近爹吔隔離坐低食，「嗲吔，乜嘢係未來？」

「未來你都識咁叻仔？時鐘你都係啱啱識得睇咋喎。」

「Francis嗲地話我哋大一歲，會見到未來呀。」

「未來即係未嚟呀，點會睇到呀。」

「咁明天算唔算係未來呀。」





「算。」小朋友大概4歲先了解「早午晚」同「今日明日」，也然爸爸覺得小也然知道明天係未來，非常驚訝，仲有啲高興個仔原來進步得咁快。

「原來見到未來即係見到聽日呀，好嘢，我可以知道聽日食乜茶點。」

小朋友好多嘢，只係一知半解，大人講乜佢講乜，但潛移默化後，會變咗真正識嘅嘢。

開心時間過得特別快，大家收拾細軟後，十四個人分開兩架七人車離開。

小朋友涼慣冷氣，根本唔習慣室外30幾度嘅炎熱天氣，小以琳、小也然、小Francis一到康樂營落車，就成支箭咁衝入活動室，參加佢哋做主角嘅生日會。





一班粗心大意嘅家長，到場竟然準備唔夠生日會飲品，小Francis同小也然爭緊最後一杯可樂。

「嗚！我想飲呀。」小Francis喊得好犀利，一眾家長過去撲火，汽水啫，又冇益，冇得飲咪算咯，但小朋友最鍾意飲甜嘢㗎嘛。小以琳抱住隻白色嘅姆明公仔，走近小Francis，「唔好喊啦，我叫姆明帶你去搵汽水呀，好唔好？」5歲嘅小妹妹，竟然咁識𠱁人，聽到真係心都軟晒，仲點喊落去喎。

也然爸爸買咗車冇幾耐，泊完車就嚟就見到呢一幕，「不如我揸車出市中心買啦？」

「唔使啦林生，一來一回都唔近㗎。」Francis媽媽其實唔主張小朋友飲咁多汽水。

整個生日會，切蛋糕、玩遊戲順利完成。





一班家長執拾好地方，擺返好啲枱櫈，14個人同嚟嗰時一樣，分開兩架車人七離開。

也然爸爸行去攞車時，一邊行一邊翻睇佢用iPhone 4拍嘅短片，發覺拍得好差，個仔5歲生日會只有一次，弊啦，點畀片其他家長呢，好心不在焉。佢諗緊點樣叫公司電腦叻嘅同事救下條片，又或者借故搵個理由，請也然啲同學仔燒嘢食，咁就有機會影多次，但咁細個小朋友根本唔識燒嘢食。

「砰。」

「呀！」兩架車內嘅大人小朋友一齊大叫。

也然爸爸只係新牌仔，揸車唔專心，開車時欄腰撞落以琳媽媽揸嘅七人車。

「你哋有冇事呀？」也然爸爸即刻擰轉頭問，車內一片大亂，呢啲情況，其實問乜都冇用，最緊要慢慢安慰小朋友，畀佢喊一陣、𠱁兩𠱁就自然停。好彩只係輕微碰撞，但已經為呢個生日會留下唔完美嘅句號。

「以琳媽咪，唔好意思呀，你整車錢我賠返畀你丫。」也然爸爸極級唔好意思，兩個同時驗查兩個車嘅傷勢。以琳媽媽㗎ALPHARD 3.5落地冇耐，左邊車尾凹咗，也然架PREVIA車頭都甩咗個揼把。

「遲啲先計啦，小朋友可能再坐呢兩架車會有陰影㗎啦，不如叫的士走？」





「的士好似唔好喎，呢度好少車入嚟，而且分開晒啲小朋友，佢哋可能仲驚。」

「咁點算好呢？」

也然爸爸上車試過再撻車褪後少少，但已經撻唔着，可能架二手車舊電池，撞一撞死埋。

「林生，撻唔着呀？」以琳媽咪見到呢個情況，同也然爸爸你眼望我眼，唔知點好。

「唉，估唔到第一次車也然同同學玩就出事。」

「唔緊要，人冇事先做到世界冠軍㗎嘛。」